3૦પ કરોડના ઇન્ટરનેશનલ સાયબર ફ્રોડમાં સંડોવણી
જૂનાગઢમાં ગેમ્બલર ગેંગના ભાજપના કોર્પોરેટર સહિત ૪ આરોપીને સાથે રાખી પોલીસનું રીકન્સ્ટ્રકશન
આરોપીઓ લંગડાતા જોલવા મળ્યા : ચારેયે હાથ જોડીને માફી માંગી : આરોપીઓના ઘરે સર્ચ ઓપરેશન
અગ્ર ગુજરાત, જૂનાગઢ
જૂનાગઢ શહેરમાં છેલ્લા ઘણા સમયથી સંગઠિત ગુનાખોરી અને ગેરકાયદેસર પ્રવૃત્તિઓ ચલાવતી કુખ્યાત ‘ગેમ્બલર ગેંગ’ સામે પોલીસે અત્યાર સુધીની સૌથી મોટી કાર્યવાહી હાથ ધરી છે. ભાજપના ચાલુ કોર્પોરેટર અને પૂર્વ કોર્પોરેટર સહિતના ચાર આરોપીઓ વિરુદ્ધ ગુજસીટોક હેઠળ ગુનો નોંધાયા બાદ પોલીસ કાફલાએ આ આરોપીઓને સાથે રાખી શહેરના સુખનાથ ચોક વિસ્તારમાં રીકન્સ્ટ્રક્શન કર્યું હતું.
305 કરોડના આ કૌભાંડમાં સંડોવાયેલા ભાજપના કોર્પોરેટર સહિત 4 આરોપીઓ જ્યારે પોલીસ તપાસ અર્થે ઘટના સ્થળે રીકન્સ્ટ્રક્શન માટે લઈ ગઈ ત્યારે લંગડાતા જોવા મળ્યા હતા. અને નવાઈની વાત તો એ છે કે પોલીસે કહ્યું ને ચારેય આરોપીઓએ હાથ જોડીને માફી માંગી હતી.
ડીવાયએસપી રવિરાજસિંહ પરમારના નેતૃત્વમાં આજે પોલીસની ટીમે ધરપકડ કરાયેલા ચારેય આરોપીઓ – અબ્બાસ કુરેશી (ચાલુ કોર્પોરેટર ભાજપ), અસલમ ઉર્ફે લાલો કુરેશી (પૂર્વ કોર્પોરેટર), કરીમ સીડા અને શાહબાઝ કુરેશીને સુખનાથ વિસ્તારમાં લાવ્યા હતા. 10 દિવસના રિમાન્ડ દરમિયાન મળેલી માહિતીના આધારે, આરોપીઓ ક્યાં બેસીને આર્થિક વ્યવહારો કરતા અને ગુનાહિત કાવતરાં કેવી રીતે ઘડતા તેનું સ્થળ પર તપાસ કરવામાં આવી હતી. આ દરમિયાન આરોપીઓના ઘરે સર્ચ ઓપરેશન કરીને પાસપોર્ટ, બેંક ચેકબુક, અને ડિજિટલ દસ્તાવેજો કબજે કરવામાં આવ્યા છે.
ગુજરાતના રાજકીય ઇતિહાસમાં આ પ્રથમ ઘટના છે જ્યાં સત્તાધારી પક્ષના કોઈ ચાલુ કોર્પોરેટર સામે સંગઠિત અપરાધ નિવારણનો આટલો કડક કાયદો લાગુ કરવામાં આવ્યો હોય. આરોપી અબ્બાસ કુરેશી વોર્ડ નંબર 3 માંથી બિનહરીફ ચૂંટાયા હતા, પરંતુ તેમની પાછળ ગુનાખોરીનું મોટું નેટવર્ક હોવાનો ખુલાસો થયો છે. અબ્બાસ સામે 12, કરીમ સામે 8, જ્યારે અસલમ અને શાહબાઝ સામે 5-5 ગંભીર ગુનાઓ નોંધાયેલા છે. વર્ષ 2015થી અત્યાર સુધી આ ગેંગ પર હત્યાની કોશિશ, આર્મ્સ એક્ટ અને જુગારધામ ચલાવવા જેવી 14 એફઆઈઆર નોંધાઈ ચુકી છે.
ભાજપના ચાલુ કોર્પોરેટર સામે ‘ગુજસીટોક’ હેઠળ કાર્યવાહી
જૂનાગઢમાં કાયદો અને વ્યવસ્થાની સ્થિતિને પડકારતી કુરેશી ગેંગ વિરુદ્ધ પોલીસે લાલ આંખ કરી છે. શહેરના વોર્ડ નંબર 3ના ભાજપના ચાલુ કોર્પોરેટર અબ્બાસ કુરેશી, પૂર્વ કોર્પોરેટર અસલમ ઉર્ફે લાલો અને તેમના સાગરિતો સામે ગુજસીટોક હેઠળ ગુનો નોંધવામાં આવ્યો છે. આ ગેંગ હત્યાની કોશિશ, સાયબર ફ્રોડ, પોલીસ પર હુમલો અને આર્મ્સ એક્ટ જેવા અનેક ગંભીર ગુનાઓમાં સંડોવાયેલી છે.
