ઈજામાંથી સ્વસ્થ થયા બાદ મેદાનમાં પરત ફરેલા સ્ટાર ઓલરાઉન્ડર હાર્દિક પંડ્યાનું બેટ કટકમાં દક્ષિણ આફ્રિકા સામેની પ્રથમ T20 આંતરરાષ્ટ્રીય મેચમાં જોરદાર ગરજ્યું હતું. મુશ્કેલ પરિસ્થિતિમાં બેટિંગ કરવા આવેલા હાર્દિકે માત્ર 28 બોલમાં 59 રનની વિસ્ફોટક અને અણનમ ઇનિંગ રમી હતી, જેમાં તેણે માત્ર 25 બોલમાં પોતાની અડધી સદી પૂર્ણ કરી હતી.
4 વિકેટ પડ્યા બાદ હાર્દિકની ધમાકેદાર ઇનિંગ્સ
ટોસ હાર્યા બાદ પ્રથમ બેટિંગ કરતા ભારતીય ટીમ 4 વિકેટે 78 રનના સ્કોર પર સંઘર્ષ કરી રહી હતી. તિલક વર્માના આઉટ થયા બાદ હાર્દિક પંડ્યા ક્રિઝ પર આવ્યો. તેણે મેદાન પર આવતાની સાથે જ આક્રમકતા બતાવી, બીજા બોલ પર છગ્ગો ફટકાર્યો અને પછી 210ના સ્ટ્રાઇક રેટ સાથે પ્રોટીઝ બોલરોની ધુલાઈ કરી.હાર્દિકે પોતાની ઇનિંગ્સમાં છ ચોગ્ગા અને ચાર જબરદસ્ત છગ્ગા ફટકાર્યા હતા, જેના કારણે ટીમ ઈન્ડિયા 20 ઓવરમાં 6 વિકેટ ગુમાવીને 175 રનના સન્માનજનક સ્કોર સુધી પહોંચવામાં સફળ રહી હતી.
T20Iમાં છગ્ગાની સદી પૂરી કરી
પોતાની આ ધમાકેદાર ઇનિંગ્સ દરમિયાન હાર્દિક પંડ્યાએ T20 આંતરરાષ્ટ્રીય ક્રિકેટમાં છગ્ગાની સદી (100 છગ્ગા) પણ પૂરી કરી હતી. આ સિદ્ધિ મેળવનાર તે ચોથો ભારતીય બેટ્સમેન બન્યો અને તેણે કેએલ રાહુલ (99 છગ્ગા) ને આ બાબતમાં પાછળ છોડી દીધો.
T20Iમાં સૌથી વધુ છગ્ગા ફટકારનાર ભારતીય ખેલાડીઓ:
રોહિત શર્મા, 205 છગ્ગા, સૂર્યકુમાર યાદવ, 155 છગ્ગા, વિરાટ કોહલી, 124 છગ્ગા. હાર્દિક પંડ્યા, 100+ છગ્ગા હાર્દિક ઉપરાંત, તિલક વર્માએ 26 રન અને અક્ષર પટેલે 23 રનનું યોગદાન આપ્યું હતું, જ્યારે અંતમાં જીતેશ શર્માએ 5 બોલમાં 10 રન ફટકારીને સ્કોરને મજબૂત બનાવ્યો હતો.
