ચેમ્પિયન્સ ટ્રોફી 2025માં અફઘાનિસ્તાને મોટો અપસેટ સર્જ્યો છે. એક રોમાંચક મેચમાં, અફઘાનિસ્તાને ઈંગ્લેન્ડને 8 રનથી હરાવ્યું. આ હાર સાથે, જોસ બટલર અને કંપની ચેમ્પિયન્સ ટ્રોફીમાંથી બહાર થઈ ગયા છે.
અફઘાનિસ્તાને સેમિફાઈનલમાં પહોંચવાની આશા જીવંત રાખી છે. અફઘાનિસ્તાન તરફથી બેટિંગ કરતા ઈબ્રાહિમ ઝદરાને 177 રનની તોફાની ઈનિંગ રમી. આ દરમિયાન બોલિંગમાં અઝમતુલ્લાહ ઉમરઝાઈએ ધૂમ મચાવી અને 5 વિકેટ લીધી.
ઈંગ્લેન્ડની ખરાબ શરૂઆત
326 રનના લક્ષ્યાંકનો પીછો કરતી વખતે ઈંગ્લેન્ડની શરૂઆત સારી રહી ન હતી. ફિલ સોલ્ટ માત્ર 12 રન બનાવીને આઉટ થયો. આ પછી ત્રીજા નંબરે આવેલા જેમી સ્મિથ બેટિંગમાં કંઈ ખાસ કરી શક્યો નહીં અને 9 રન બનાવીને મોહમ્મદ નબીનો શિકાર બન્યા. હેરી બ્રુક પણ 21 બોલમાં 25 રન બનાવીને આઉટ થયો, જે નબીના હાથે તેની જ બોલિંગમાં કેચ આઉટ થયો.
બેન ડકેટે કેટલાક શક્તિશાળી શોટ ફટકાર્યા પરંતુ સારી શરૂઆતનો લાભ લઈ શક્યો નહીં અને રાશિદ ખાન દ્વારા 38 રન બનાવીને આઉટ થયો. આ પછી જો રૂટ અને કેપ્ટન જોસ બટલરે મળીને પાંચમી વિકેટ માટે 83 રનની પાર્ટનરશિપ કરી.
જો રૂટની સેન્ચુરી ન અપાવી શકી જીત
બટલરે 38 રન બનાવ્યા બાદ ખોટા સમયે પોતાની વિકેટ આપી દીધી. આ પછી રૂટ સાથે જેમી ઓવરટન જોડાયો અને બંનેએ અડધી સદીની ભાગીદારી કરી. રૂટે શાનદાર બેટિંગ કરી અને લગભગ પાંચ વર્ષ પછી ODI ક્રિકેટમાં સદી ફટકારી. ઈંગ્લિશ ટીમના અનુભવી બેટ્સમેને 111 બોલમાં 120 રનની શાનદાર ઈનિંગ રમી. પરંતુ રૂટ ઈંગ્લેન્ડને જીત તરફ દોરી શક્યો નહીં અને ઈનિંગની 45મી ઓવરમાં પેવેલિયન પાછો ફર્યો. 48મી ઓવરમાં ઓવરટનના આઉટ થવાની સાથે જ ઈંગ્લિશ ટીમની આશાઓ પણ પૂર્ણ થઈ ગઈ. આખી ઈંગ્લેન્ડ ટીમ 317 રન બનાવીને ઓલઆઉટ થઈ ગઈ.
લાહોરમાં ઈબ્રાહિમ ઝદરાને મચાવી ધૂમ
ટોસ જીતીને પહેલા બેટિંગ કરવા આવેલા અફઘાનિસ્તાનની શરૂઆત સારી રહી ન હતી. ગુરબાઝ બેટથી કંઈ ખાસ કરી શક્યો નહીં અને માત્ર 6 રન બનાવીને આઉટ થયો. અટલ અને રહેમત શાહ પણ સસ્તામાં પેવેલિયન પરત ફર્યા. 37 રનના સ્કોર પર ત્રણ વિકેટ ગુમાવ્યા બાદ મુશ્કેલીમાં મુકાયેલી દેખાતી અફઘાનિસ્તાનની ઈનિંગને ઈબ્રાહિમ ઝદરાન અને કેપ્ટન શાહિદીએ સ્થિર કરી.
ઈબ્રાહિમ ઝદરાને બેટથી જોરદાર ધૂમ મચાવી અને ઈંગ્લિશ બોલરોને આડે હાથ લીધા. અફઘાન બેટ્સમેને 106 બોલમાં પોતાની સદી પૂર્ણ કરી. શાહિદી 40 રન બનાવીને આઉટ થયો. ઝદરાને બીજા છેડેથી પોતાની વિસ્ફોટક બેટિંગ ચાલુ રાખી અને ચેમ્પિયન્સ ટ્રોફીના ઈતિહાસમાં સૌથી મોટી ઈનિંગ રમી. તેને 146 બોલમાં 177 રન બનાવ્યા. ઈબ્રાહિમ ઝદરાને તેની ઈનિંગ દરમિયાન 12 ચોગ્ગા અને 6 છગ્ગા ફટકાર્યા. અંતિમ ઓવરોમાં, મોહમ્મદ નબીએ પણ 24 બોલમાં 40 રન ફટકાર્યા, જેના પરિણામે અફઘાનિસ્તાન 50 ઓવરમાં 7 વિકેટ ગુમાવ્યા બાદ સ્કોરબોર્ડ પર 325 રન બનાવવામાં સફળ રહ્યું.
