ચેમ્પિયન્સ ટ્રોફી 2025ની નવમી મેચ પાકિસ્તાન અને બાંગ્લાદેશ વચ્ચે રમાવવાની હતી. પરંતુ વરસાદને કારણે આ મેચ રદ્દ કરવામાં આવી હતી. ગુરુવારે પાકિસ્તાન અને બાંગ્લાદેશ વચ્ચે મેચ રમવાની હતી. પરંતુ વરસાદ બંધ ન થતાં મેચ રદ્દ કરવી પડી.
આ બંને ટીમો ચેમ્પિયન્સ ટ્રોફીમાંથી પહેલાથી જ બહાર થઈ ગઈ છે. મહત્વની વાત એ છે કે આ બંને ટીમો ટુર્નામેન્ટમાં એક પણ મેચ જીતી શકી નથી.
પાકિસ્તાન માટે શરમજનક સ્થિતિ
પાકિસ્તાન અને બાંગ્લાદેશ વચ્ચેની મેચ બપોરે 2.30 વાગ્યાથી રમવાની હતી. પરંતુ વરસાદને કારણે ટોસ પણ થઈ શક્યો નહીં. જ્યારે વરસાદ બંધ ન થયો ત્યારે મેચ રદ્દ કરવામાં આવી. આ પાકિસ્તાન માટે ખૂબ જ શરમજનક પરિસ્થિતિ બની ગઈ. આ વખતે તે ટુર્નામેન્ટમાં એક પણ મેચ જીતી શક્યો નહીં. મહત્વની વાત એ છે કે પાકિસ્તાન ચેમ્પિયન્સ ટ્રોફીનું યજમાન છે. પહેલી મેચમાં પાકિસ્તાનનો ન્યુઝીલેન્ડ સામે પરાજય થયો હતો. આ પછી પાકિસ્તાનનો ભારત સામે પણ પરાજય થયો. પાકિસ્તાનની છેલ્લી ગ્રુપ મેચ રદ્દ કરવામાં આવી છે.
ટુર્નામેન્ટમાં આવું રહ્યું બાંગ્લાદેશનું પ્રદર્શન
બાંગ્લાદેશે ચેમ્પિયન્સ ટ્રોફી 2025માં ભારત સામે પોતાની પહેલી મેચ રમી હતી. ટીમે પ્રથમ બેટિંગ કરીને 228 રન બનાવ્યા. આ દરમિયાન તૌહીદ હૃદયોયે સદી ફટકારી. પરંતુ શુભમન ગિલે હૃદયોયની સદી પર પાણી ફેરવ્યું. ગિલે 101 રનની અણનમ ઈનિંગ રમીને ભારતને જીત અપાવી. ભારતે આ મેચ 6 વિકેટથી જીતી લીધી. બાંગ્લાદેશનો બીજો મુકાબલો ન્યુઝીલેન્ડ સામે હતો. ન્યુઝીલેન્ડે તેને 5 વિકેટે હરાવ્યું. હવે ત્રીજી મેચ વરસાદને કારણે રદ્દ થઈ ગઈ.
ટુર્નામેન્ટમાં એક પણ મેચ ન જીત્યું પાકિસ્તાન
પાકિસ્તાને ટુર્નામેન્ટમાં પોતાની પહેલી મેચ ન્યુઝીલેન્ડ સામે રમી હતી. આ મેચમાં ન્યુઝીલેન્ડે શાનદાર પ્રદર્શન કર્યું અને તેને 60 રનથી હરાવ્યું. બીજી મેચમાં ભારતે પાકિસ્તાનનો પરાજય કર્યો હતો. ટીમ ઈન્ડિયા માટે વિરાટ કોહલીએ શાનદાર પ્રદર્શન કર્યું અને સદી ફટકારી. કોહલીની સદીના કારણે ભારતે પાકિસ્તાનને 6 વિકેટે હરાવ્યું. ટીમની ત્રીજી મેચ બાંગ્લાદેશ સાથે હતી, જે વરસાદના કારણે રદ્દ કરવામાં આવી.
પોઈન્ટ ટેબલમાં યજમાન ટીમ છેલ્લા સ્થાને રહી
ગ્રુપ A માં, પાકિસ્તાનની ટીમ 1 પોઈન્ટ સાથે ટેબલમાં સૌથી નીચે રહી. બાંગ્લાદેશ ટીમનો પણ ફક્ત 1 પોઈન્ટ છે, પરંતુ સારા નેટ રન રેટને કારણે, તે ત્રીજા નંબર પર જોવા મળે છે. ન્યુઝીલેન્ડની ટીમ 4 પોઈન્ટ સાથે નંબર 1 પર જોવા મળે છે. ટીમ ઈન્ડિયાના પણ 4 પોઈન્ટ છે, પરંતુ ઓછા નેટ રન રેટને કારણે ભારતીય ટીમ બીજા નંબર પર જોવા મળી રહી છે. આ ગ્રુપની છેલ્લી મેચ 2 માર્ચે ભારત અને ન્યુઝીલેન્ડ વચ્ચે રમાશે. ICC ચેમ્પિયન્સ ટ્રોફીમાં શરમજનક અંત બાદ, પાકિસ્તાન ટીમ હવે તેની ટીમમાં ઘણા મોટા ફેરફારો કરી શકે છે.
ભારત અને ન્યુઝીલેન્ડ સામેની પહેલી બે મેચ હાર્યા બાદ રિઝવાન આર્મી ટુર્નામેન્ટમાંથી બહાર થઈ ગઈ હતી. પાકિસ્તાનની ટીમ બાંગ્લાદેશ સામે જીતીને ઘરઆંગણે પોતાનું સન્માન બચાવવા માંગતી હતી, પરંતુ વરસાદે આખી રમત બગાડી નાખી. પીસીબીના ખરાબ આયોજનને કારણે, ODI મેચ માત્ર 2 કલાકમાં રદ્દ કરવી પડી.
