- શહેરમાં ભારે વાહનો પર પ્રતિબંધ છતાં કોઇ રોકટોક નહી
- કોયલી ગામે 6 દિવસ પહેલા થયો હતો અકસ્માત
- વૃદ્ધ નોકરી પરથી પરત ફરતી રહ્યા હતા તે સમયે બની ઘટના
વડોદરા નજીક આવેલા કોયલી ગામના અંકોડિયા ત્રણ રસ્તા પાસે નોકરી પરથી સાયકલ લઈને ઘરે જતા વૃદ્ધને સિમેન્ટ મિક્સ્ચરે અડેફેટે લીધા હતા.આ ઘટનામાં વૃદ્ધ પર મિક્સ્ચરનું આગલું ટાયર ફરી વળતા ઘટના સ્થળે જ વૃદ્ધનું મોત થયુ હતુ.અરેરાટી ફેલાવી દેતી આ અકસ્માતની ઘટના ગત 1 જૂનની છે, જેના સીસીટીવી સામે આવ્યાં છે.
સિમેન્ટના મિકસ્ચરનુ હતુ ડમ્પર
સીસીટીવીમાં દેખાઈ રહ્યું છે તે પ્રમાણે જો વૃદ્ધએ સાયકલ રોકી દીધી હોત તો બચી જાત. હાલ આ સમગ્ર મામલે જવાહરનગર પોલીસે સિમેન્ટ મિક્સ્ચરના ચાલક સામે ગુનો નોંધી કાર્યવાહી હાથ ધરી હતી.અંકોડિયા ગામ સીતારામ મહોલ્લામાં રહેતા 59 વર્ષીય કાલીદાસ ખોડાભાઈ કોયલી રિફાઈનરીમાં લેબર વર્ક કરતા હતા. તેઓ રોજ સાયકલ લઈને નોકરી અને નોકરીથી ઘરે જતા હતા.તે દરમિયાન સાંજે પાંચ વાગ્યાની આસપાસ કોયલી ગામ અંકોડિયા ત્રણ રસ્તા પાસે એક સિમેન્ટ મિક્સ્ચરના ચાલકે કાલીદાસભાઈને અડફેટે લીધા હતા. આ સમગ્ર ઘટનાના હવે CCTV બહાર આવ્યા છે. જેમાં દેખાય છે કે, સિમેન્ટ મિક્સ્ચર વળાંક લઇ રહ્યું હોય છે, ત્યારે એક સાયકલ ચાલક ત્યાંથી પસાર થતો હોય છે અને સિમેન્ટ મિક્સ્ચર તેને અડફેટે લે છે.
અકસ્માત કરી ડ્રાઈવર થયો હતો ફરાર
આ ઘટનાને પગલે આસપાસના લોકો દોડી આવ્યા હતા.મૃતકને માથાના ભાગે તેમજ શરીરના અન્ય ભાગે ગંભીર ઈજા પહોંચી હતી. જેથી તેમનું સ્થળ પર જ મોત નિપજ્યું હતું. જોકે, અકસ્માત સર્જીને સિમેન્ટ મિક્સ્ચરનો ચાલક તેનું વાહન સ્થળ પર જ છોડીને ફરાર થઈ ગયો હતો.
પોલીસે ઝડપ્યો આરોપીને
જવાહરનગર પોલીસે કાલીદાસભાઈના મૃતદેહને પોસ્ટમોર્ટમ માટે સયાજી હોસ્પિટલમાં મોકલી આપ્યો હતો. કાલીદાસભાઈના પુત્રની ફરિયાદના આધારે આ મામલે વધુ કાર્યવાહી હાથ ધરી હતી અને મોડી રાત્રે સિમેન્ટ મિક્ષરના ચાલકને પોલીસે ઝડપી પાડયો હતો.
પ્રતિંબધ છત્તા ભારે વાહનો પ્રવેશે છે
વડોદરા શહેરમાં ડમ્પર સહિતના ભારદારી વાહનોની અડફેટે અનેક લોકો જીવ ગુમાવે છે. વડોદરામાં ભારે વાહનોની શહેરમાં પ્રવેશબંધી હોવા છતાં શહેરમાં ભારે વાહનો પ્રવેશે છે અને ઘણીવાર અકસ્માતો સર્જે છે અને લોકો પોતાના જીવ ગુમાવે છે.
