- US વિદેશપ્રધાન બ્લિન્કનનો જયશંકરને અનુરોધ
- ભારત ગ્લોબલ પ્લેયર તરીકે ઊભરતું હોવાનો પુરાવો
- મ્યુનિખ સિક્યોરિટી કોન્ફરન્સમાં તેનું ઉદાહરણ જોવા મળ્યું
ભારત માત્ર આર્થિક મહાસત્તા જ નહીં, વ્યૂહાત્મક રીતે પણ ગ્લોબલ પ્લેયર તરીકે ઝડપભેર ઉભરી રહ્યું છે. છેલ્લા કેટલાક વર્ષોમાં ભારતનું વર્ચસ્વ આખી દુનિયામાં વધ્યું છે. મ્યુનિખ સિક્યોરિટી કોન્ફરન્સમાં તેનું ઉદાહરણ જોવા મળ્યું છે. અમેરિકી વિદેશપ્રધાન એન્ટોની બ્લિન્કને ભારતના વિદેશપ્રધાનને એક એવો અનુરોધ કર્યો છે કે જે વૈશ્વિક શાંતિ માટે ઘણો મહત્વપૂર્ણ મનાઇ રહ્યો છે. વાત એમ છે કે રશિયા અવકાશમાં પરમાણુ શસ્ત્રો તહેનાત કરવાનું પ્લાનિંગ કરી રહ્યું છે. અમેરિકી ગુપ્તચર એજન્સીઓનું માનવું છે કે રશિયા વર્ષ 2022થી જ આ દિશામાં કાર્યરત છે. અમેરિકા ઇચ્છે છે કે ભારતના વડાપ્રધાન નરેન્દ્ર મોદી રશિયન પ્રમુખ વ્લાદિમીર પુતિન સાથે વાત કરી તેમને આવું ન કરવા મનાવે. યૂક્રેન પર હુમલા દરમિયાન વર્ષ 2022માં રશિયાએ સૈન્ય ઉપગ્રહ લૉન્ચ કર્યો હતો. અમેરિકી ગુપ્તચર એજન્સીઓ એ જાણવા મથી રહી છે કે રશિયા આખરે શું કરી રહ્યું છે? મહિનાઓની તપાસ બાદ અમેરિકાની ગુપ્તચર એજન્સીઓને જાણવા મળ્યું કે રશિયા અવકાશ આધારિત શસ્ત્રો બનાવવાની દિશામાં કામ કરી રહ્યું છે, જેના કારણે અવકાશમાં હજારોની સંખ્યામાં રહેલા ઉપગ્રહો માટે જોખમ ઊભું થઇ શકે છે. ખાસ કરીને વિશ્વના દેશોનો એકબીજા સાથે સંપર્ક તૂટી શકે છે. ગુપ્તચર એજન્સીઓનું માનવું છે કે રશિયા વધુ એક લૉન્ચિંગની તૈયારી કરી રહ્યું છે.
અમેરિકન વિદેશ પ્રધાનને મુદ્દો ઉઠાવ્યો
બ્લિન્કનનું કહેવું છે કે અવકાશમાં પરમાણુ બોમ્બ વિસ્ફોટ થાય તો તેનાથી માત્ર અમેરિકાને જ નહીં પણ સમગ્ર વિશ્વને અસર થશે. ભારત અને ચીનના ઉપગ્રહો પર પણ તેની વિપરીત અસર પડશે. અમેરિકાનું કહેવું છે કે અવકાશમાં પરમાણુ વિસ્ફોટથી વૈશ્વિક સંચાર વ્યવસ્થા ધ્વસ્ત થઇ શકે છે.
