આજે લોકોમાં ગંભીર બીમારીનું પ્રમાણ વધ્યું છે. પ્રખ્યાત ટીવી કલાકાર કેન્સરનો ભોગ બન્યા હોવાનું સામે આવતા તેમના ફેન્સ ચિંતિત થયા છે. ટીવી અભિનેત્રી હીના ખાનને બ્રેસ્ટ કેન્સર અને દીપિકા કક્કરને લીવર કેન્સર નિદાન થયું. જેના બાદ ફરી કેન્સરને લઈને ચર્ચા શરૂ થઈ છે કે આખરે કેવી રીતે કેન્સર શરીરમાં ફેલાય છે. આ મામલે આરોગ્ય નિષ્ણાત કહે છે કે લીવર કેન્સરના સ્ટેજ 1માં જ લક્ષણો દેખાય છે.
યોગ બનશે ફાયદાકારક
પરંતુ લોકો શરીરના આ સંકેતોને અવગણે છે અને ગંભીર કેન્સરના શિકાર થાય છે. લીવર કેન્સરના જોખમને દૂર રાખવામાં યોગાસનો વધુ ફાયદાકારક સાબિત થયા હોવાનું નિષ્ણાતે જણાવ્યું છે. આરોગ્ય નિષ્ણાતના જણાવ્યા મુજબ લીવર શરીરનો મહત્વપૂર્ણ ભાગ છે. પરંતુ ખરાબ જીવનશૈલી અને ખાવાની આદતોને કારણે આજે લીવર સંબંધિત સમસ્યામાં વધારો થયો છે. જો પ્રારંભથી નિયમિતપણે આ યોગાસનો કરવામાં આવે તો લીવર કેન્સરના જોખમને આપણે દૂર રાખી શકીએ છીએ.
લીવર સ્વસ્થ રાખવા આ યોગાસનો વધુ લાભકારક સાબિત થશે
ધનુરાસન : આ આસન કરવા સૌ પ્રથમ તમે પેટ પર સૂઈ જાઓ. પછી બંને પગ વાળો અને તમારા હાથથી પગની ઘૂંટીઓ પકડો. હવે શ્વાસ લેતી વખતે તમારી છાતી અને જાંઘોને ઉપર ઉઠાવો. આ આસન કરવાથી પેટ પર દબાણ આવશે અને પેટ સંબંધિત સમસ્યામાં રાહત મળશે. આ આસન લીવરના કોષોને પુનર્જીવિત કરવામાં અને ઝેરી તત્વોને બહાર કાઢવામાં મદદરૂપ બનશે. આ આસનથી રક્ત પરિભ્રમણ વધશે જે સ્વસ્થ લીવર માટે વધુ લાભદાયક સાબિત થશે.
નૌકાસન : આ આસન કરવા તમે પીઠ પર સૂઈ જાઓ, પછી ધીમે ધીમે તમારા માથા, હાથ અને પગને ઉપર કરો અને તેમને V આકારમાં લાવો. યોગના આ આસનમાં અંતિમ તબક્કામાં શરીરનો આકાર નૌકા (નાવ) સમાન દેખાવાના કારણે તેને નૌકાસન કહેવાય છે. આ આસન પેટની ચરબી ઘટાડવામાં મદદ કરે છે અને લીવરની ક્ષમતામાં પણ વધારો કરે છે. આ ઉપરાંત ફેટી લીવર જેવી સ્થિતિઓથી તમારું રક્ષણ કરે છે.
અર્ધ મત્સ્યેન્દ્રાસન : આ આસન કરવા માટે સૌ પ્રથમ તમે જમીન પર બેસો પછી એક પગ વાળો અને ત્યારપછી બીજો પગ તેના પર રાખો. પછી કમરને તે બાજુ તરફ વાળો જ્યાં પગ છે. આ આસન કરવાથી પેટમાં ખેચાણ આવશે. અને ધીમે ધીમે લીવર પર દબાણ આવે છે, જે તેને સ્વસ્થ રાખશે.આ આસન પાચનતંત્રને સુધારવામાં મદદ કરે છે અને લીવરની બળતરા ઘટાડે છે.
