- જયસ્વાલ ઈંગ્લેન્ડ સાથે રમાઈ રહેલી ટેસ્ટ સીરિઝમાં શાનદાર ફોર્મમાં છે
- યશસ્વી જયસ્વાલે ટેસ્ટ ક્રિકેટમાં મોટી સિદ્ધિ મેળવી છે
- ડોન બ્રેડમેનના વિશિષ્ટ ક્લબમાં શામેલ થયો જયસ્વાલ
ટીમ ઈન્ડિયાનો યુવા ઓપનિંગ બેટ્સમેન યશસ્વી જયસ્વાલ ઈંગ્લેન્ડ સાથે રમાઈ રહેલી ટેસ્ટ સીરિઝમાં શાનદાર ફોર્મમાં જોવા મળી રહ્યો છે. આ સીરિઝમાં અત્યાર સુધીમાં જયસ્વાલે 2 બેવડી સદી ફટકારી છે. જે બાદ હવે યશસ્વી જયસ્વાલે ટેસ્ટ ક્રિકેટમાં મોટી સિદ્ધિ મેળવી છે. યશસ્વી જયસ્વાલ હવે ઓસ્ટ્રેલિયાના ભૂતપૂર્વ મહાન બેટ્સમેન ડોન બ્રેડમેનના વિશિષ્ટ ક્લબમાં શામેલ થઇ ગયો છે.
જયસ્વાલે ટેસ્ટ સીરિઝમાં 600થી વધુ રન બનાવ્યા
ઇંગ્લેન્ડ સામેની ટેસ્ટ સીરિઝમાં યશસ્વી જયસ્વાલના બેટથી રનોનો વરસાદ થઇ રહ્યો છે. રાંચી ટેસ્ટ મેચના બીજા દિવસે પ્રથમ દાવમાં ભારતીય ટીમ માટે યશસ્વી જયસ્વાલે સૌથી વધુ રન બનાવ્યા હતા. રાંચી ટેસ્ટ મેચની પ્રથમ ઇનિંગમાં જયસ્વાલે 73 રન બનાવ્યા હતા. આ પહેલા તેણે આ સિરીઝમાં 2 બેવડી સદી પણ ફટકારી છે.
આવું કરનાર બીજો ભારતીય
યશસ્વી જયસ્વાલે આ ટેસ્ટ સીરિઝમાં અત્યાર સુધીમાં 618 રન બનાવ્યા છે. જયસ્વાલ હવે સર ડોન બ્રેડમેન, સર ગારફિલ્ડ સોબર્સ, સુનીલ ગાવસ્કર, ગ્રીમ સ્મિથ અને જ્યોર્જ હેડલી અને નીલ હાર્વે સાથે 23 વર્ષની વય પહેલા ટેસ્ટ સીરિઝમાં 600 થી વધુ રન બનાવનારા બેટ્સમેનોની યાદીમાં સામેલ થઈ ગયા છે.
23 વર્ષની ઉંમર પહેલા ટેસ્ટ સીરિઝમાં 600 થી વધુ રન બનાવનાર બેટ્સમેન
- ડોન બ્રેડમેન vs ઈંગ્લેન્ડ, વર્ષ 1930 (974 રન)
- ગેરી સોબર્સ vs પાકિસ્તાન 1957-58 (824 રન)
- સુનીલ ગાવસ્કર vs વેસ્ટ ઈન્ડિઝ 1970-71 (774 રન)
- ગ્રીમ સ્મિથ vs ઈંગ્લેન્ડ 2003 (714 રન)
- જ્યોર્જ હેડલી vs ઈંગ્લેન્ડ 1929-30 (703 રન)
- નીલ હાર્વે vs દક્ષિણ આફ્રિકા 1949-50 (660 રન)
- યશસ્વી જયસ્વાલ vs ઈંગ્લેન્ડ 2024 (618* રન)
આવો રહ્યો રાંચી ટેસ્ટનો ચોથો દિવસ
રાંચી ટેસ્ટ મેચની પ્રથમ ઈનિંગમાં બેટિંગ કરતા ટીમ ઈન્ડિયાએ બીજા દિવસે 7 વિકેટના નુકસાન પર 219 રન બનાવ્યા હતા. રાંચી ટેસ્ટ મેચમાં ભારતીય ટીમ પર ઈંગ્લેન્ડની ટીમનો દબદબો જોવા મળી રહ્યો છે. ભારતીય ટીમ હજુ પણ ઈંગ્લેન્ડથી 134 રન પાછળ છે. બીજા દિવસે ઈંગ્લેન્ડના બોલરોએ શાનદાર બોલિંગ કરી હતી. ખાસ કરીને શોએબ બશીરે પોતાની શાનદાર બોલિંગથી ભારતીય બેટ્સમેનોને ખૂબ જ પરેશાન કર્યા હતા. બીજા દિવસે શોએબ બશીરે 4 વિકેટ પોતાના નામે કરી હતી.
