કાનપુર પોલીસે રૂ.1,500 કરોડના આંતરરાષ્ટ્રીય છેતરપિંડી કેસના માસ્ટરમાઇન્ડ રવિન્દ્રનાથ સોનીના નેટવર્કને કથિત રીતે પ્રોત્સાહન આપવા બદલ બોલીવુડ અભિનેતા સોનુ સૂદ અને રેસલર ધ ગ્રેટ ખલીને પૂછપરછ માટે કાયદાકીય નોટિસ જાહેર કરી છે. પોલીસ કમિશનર રઘુબીર લાલના જણાવ્યા મુજબ આ છેતરપિંડીનો ભોગ 700થી વધુ લોકો બન્યા છે.
છેતરપિંડીનું આંતરરાષ્ટ્રીય નેટવર્ક
દિલ્હીના માલવિયા નગરના રહેવાસી રવિન્દ્રનાથ સોની લગભગ સાત વર્ષથી આ છેતરપિંડીનું નેટવર્ક ચલાવતો હતો. તેની પ્રાથમિક કંપની બ્લુચિપ કોમર્શિયલ બ્રોકર્સ 2018થી સક્રિય હતી અને બ્લુચિપ ઇન્વેસ્ટમેન્ટ્સ એલએલસી સહિત અન્ય 16 કંપનીઓ સાથે જોડાયેલી હતી. તે રોકાણકારોને ઊંચા વળતરનું વચન આપીને રિયલ એસ્ટેટ અને સોનાની ખાણકામ જેવા ક્ષેત્રોમાં રોકાણ કરવા લલચાવતો હતો. 90% પીડિતો ભારતના હતા, જ્યારે 10% નેપાળ, વિયેતનામ, જાપાન અને યુનાઇટેડ સ્ટેટ્સ જેવા દેશોના વિદેશી રોકાણકારો હતા.
સોની ચાલાકીપૂર્વક દુબઈથી ભાગી ગયો
તપાસમાં બહાર આવ્યું છે કે સોની દુબઈના બુર્જ ખલીફા નજીક એક વૈભવી ઓફિસ ચલાવતો હતો અને વિદેશી રોકાણકારોને આકર્ષવા માટે ભવ્ય કાર્યક્રમોનું આયોજન કરતો હતો. દુબઈના અધિકારીઓને આશ્ચર્ય થયું કે ફરિયાદ બાદ પણ સોની ઓગસ્ટમાં ઓમાન થઈને રણ પાર કરીને છૂપી રીતે ભારત ભાગી આવ્યો હતો.
તપાસ માટે SITની રચના
આ મોટા કૌભાંડના વધતા વ્યાપને ધ્યાનમાં રાખીને પોલીસ કમિશનરે એક સ્પેશિયલ ઇન્વેસ્ટિગેશન ટીમ (SIT)ની રચના કરવાનો આદેશ આપ્યો છે. એડિશનલ DCP ક્રાઇમ અંજલિ વિશ્વકર્મા SITનું નેતૃત્વ કરશે. SIT સોની અને તેના સહયોગીઓના 16 કંપનીઓમાંના નાણાકીય વ્યવહારો, બેંક ખાતાઓ અને ક્રિપ્ટોકરન્સી વ્યવહારો પર નજર રાખશે.
