ભડલી ગામે ખેતરમાં ગાંજાની ખેતી ઝડપાઈ, ગ્રામ્ય SOG એ 37.10 લાખનો જથ્થો જપ્ત કર્યો
પોતાના નશા અને વેચાણ માટે ખેડૂતે એક વર્ષ પહેલાં વાવેલા ગાંજાના છોડ પર પોલીસ ત્રાટકી ; 72 કિલો ગાંજો કબજે
અગ્ર ગુજરાત, રાજકોટ
રાજકોટ ગ્રામ્ય પોલીસને નશાના કારોબાર સામેની કાર્યવાહીમાં વધુ એક મોટી સફળતા મળી છે. વિંછીયા તાલુકાના ભડલી ગામની સીમમાં આવેલી વાડીમાંથી ગેરકાયદેસર રીતે કરવામાં આવેલી ગાંજાની ખેતી ઝડપાઈ છે. ગ્રામ્ય એસઓજીની ટીમે દરોડો પાડી આશરે રૂ.37.10 લાખની કિંમતનો 72 કિલો ગાંજો જપ્ત કર્યો હતો અને ખેડૂત રમેશ રતા જાદવને ઝડપી લઇ કાયદેસરની કાર્યવાહી હાથ ધરી છે.
પોલીસ સૂત્રોના જણાવ્યા મુજબ, જિલ્લા પોલીસ વડા વિજયસિંહ ગુર્જરના માર્ગદર્શન હેઠળ ગ્રામ્ય એસઓજીની ટીમ પેટ્રોલિંગમાં હતી. તે દરમિયાન એએસઆઈ પરબતભાઈને મળેલી બાતમીના આધારે ભડલી ગામની સીમશાળા નંબર-3 પાછળ ડુંગરાળ વિસ્તારમાં આવેલી વાડી પર તાત્કાલિક દરોડો પાડવામાં આવ્યો હતો. ત્યાં તપાસ કરતાં ખેતરમાં ગાંજાના છોડનું વાવેતર થયેલું મળી આવ્યું હતું. પોલીસે સ્થળ પરથી નાના-મોટા 64 જેટલા ગાંજાના છોડ સહિત કુલ 72 કિલો જેટલો જથ્થો કબજે કર્યો હતો.
પ્રાથમિક પૂછપરછમાં સામે આવ્યું છે કે પકડાયેલ ખેડૂત રમેશ જાદવ પોતે ગાંજો પીવાનો બંધાણી છે. પોતાની પાસે રહેલા ગાંજાના બીજ તેણે આશરે એક વર્ષ પહેલાં ખેતરમાં વાવ્યા હતા. હાલ છોડ તૈયાર થઈ જતા તેનો નશો કરવા ઉપરાંત વેચાણ કરવાની પણ તૈયારી ચાલી રહી હતી. જોકે, તે પહેલાં જ એસઓજીની ટીમ ત્રાટકતાં આખો કારોબાર બહાર આવી ગયો હતો.
રાજકોટ ગ્રામ્ય પોલીસે છેલ્લાં ચાર દિવસમાં નશાના જથ્થા અને પેડલરો સામે સતત કડક કાર્યવાહીઓ હાથ ધરી છે. પીઆઈ એફ.એ. પારગીની રાહબરીમાં એસઓજીની ટીમે શાપર અને લોધીકા વિસ્તારમાં પણ દરોડા પાડી ગાંજાના વેપારમાં સંકળાયેલા તત્વોને ઝડપ્યા હતા. ખાસ કરીને શાપરમાં બે જુદા દરોડા પાડી કુખ્યાત પેડલર રહીલની ચેનલ તોડી પાડવામાં આવી હોવાનું ચર્ચાઈ રહ્યું છે.
વિંછીયા પંથક ગાંજાની ખેતી માટે અને શાપર-લોધીકા વિસ્તાર ગાંજાના વેચાણ માટે વારંવાર ચર્ચામાં રહેતો હોવાને કારણે પોલીસે હવે આ સમગ્ર નેટવર્ક પર વધુ કડક નજર ગોઠવી છે. ભડલી ગામમાં ઝડપાયેલી આ ખેતી માત્ર સ્થાનિક સ્તરે નહીં પરંતુ સમગ્ર જિલ્લામાં નશાના જાળાને લગતી ગંભીર ચેતવણી સમાન માનવામાં આવી રહી છે. પોલીસે વધુ તપાસ શરૂ કરી છે કે આ ગાંજાનો જથ્થો માત્ર સ્થાનિક વપરાશ માટે હતો કે તેની પાછળ વધુ મોટી વેચાણ ચેનલ કાર્યરત હતી.
