ધો.૬ થી ૮ માટે વિવિધ રમતો યોજાઇ
અગ્ર ગુજરાત, સુરત
પીએમ મહારાણા પ્રતાપ પ્રાથમિક શાળા, નાના વરાછામાં વાર્ષિક રમતોત્સવનું શાળાના આચાર્ય મિતેશભાઈ પ્રજાપતિના માર્ગદર્શન હેઠળ સી.પી.એડ શિક્ષક દ્વારા આયોજન કરવામાં આવ્યું હતું. વિદ્યાર્થીઓ દેશી રમતોથી માહિતગાર થાય તથા પોતાનું કૌશલ્ય બતાવી શકે તેવી રમતોની પસંદગી કરવામાં આવી હતી. આ રમતોત્સવના પ્રથમ દિવસે ઉદઘાટન સેરમની રાખવામાં આવી હતી. જેમાં ઈ.એમ. ચેરિટેબલ ટ્રસ્ટના પ્રતિનિધિ રમેશભાઈ વાઘાણી તથા બાબુભાઈ વિરડિયા ઉપસ્થિત રહ્યા હતા. શાળાની સ્કાઉટ ટીમ દ્વારા પરેડ કરી શાળાના ધ્વજને સલામી આપવામાં આવી હતી. તેની સાથે મસાલ રેલી પણ યોજાઈ હતી અને વિધિવત રીતે આ રમતોત્સવને ખુલ્લો મુકવામાં આવ્યો હતો.
પ્રથમ દિવસે ધો 6થી 8 માટેની જુદી જુદી રમતો યોજાઈ હતી. બ્લોક બેલેન્સ, ફુગ્ગા બેલેન્સ, ફૂંકથી કપને ખસેડવી, દોડ, સ્લો સાયકલિંગ વગેરે રમતોમાં 400થી વધારે બાળકોએ ભાગ લીધો હતો. બીજા દિવસે ધો 3 થી 5 માટે દોડ, રીંગણનો રાજા, બટાકા દોડ, ફુગ્ગા ફોડ, સંગીત ખુરશી વગેરે રમતોનું આયોજન કરવામાં આવ્યું હતું. જેમાં 350થી વધુ વિદ્યાર્થીઓએ ભાગ લીધો હતો. ત્રીજા અને અંતિમ દિવસે બાલવાટિકા થી ધો 2 તથા શાળામાં પ્રથમવાર વાલીઓ માટે પણ રમતોનું વિશેષ આયોજન કરવામાં આવ્યું હતું. 250 થી વધુ વિદ્યાર્થીઓએ તથા 200 થી વધુ વાલીમિત્રોએ લીંબુ ચમચી, બેલેન્સ દોડ, નિશાન ટાંક, દોરડા ખેંચ, સંગીત ખુરશી વગેરે રમતોનો આનંદ માણ્યો હતો. રમતોમાં વિજેતા થયેલ સ્પર્ધકોને પ્રથમ, દ્વિતીય અને તૃતીય નંબર તથા લહાણીના મેડલ આપી શાળા ત્રીદિવસીય રમોત્સવનું ભવ્ય આયોજન કરવામાં આવ્યું હતું.
