સુરતમાં ૬ કરોડનું કોબ્રા સાપનું ઝેર પકડાયું
૬.પ એમએલ સાથે સાત શખ્સોની અટકાયત : અમદાવાદના સોની વેપારી પાસેથી લઇ આવ્યાની કબૂલાત : વન્યજીવ સુરક્ષા અને ગેરકાયદેસર ડ્રગ્સ નેટવર્ક અંગે ગંભીર સવાલો
અગ્ર ગુજરાત, સુરત
સુરત એસ.ઓ.જી. પોલીસને એક મોટી સફળતા મળી છે. જેમાં ગુજરાતમાં સૌપ્રથમ વખત 5.85 કરોડની કિંમતનું કોબ્રા સાપનું ઝેર ઝડપી પાડવામાં આવ્યું છે. આ ઓપરેશનમાં લસકાણા પોલીસે સાત આરોપીની ધરપકડ કરી છે, જેઓ કરોડો રૂપિયાની કિંમતનું આ ઝેર વેચવાની પેરવીમાં હતા. પકડાયેલા આરોપીઓ પાસેથી અંદાજે 6.5 ml કોબ્રા વેનોમ જપ્ત કરવામાં આવ્યું છે, જેની બજાર કિંમત આશરે 5,85,00,000 રૂપિયા હોવાનું સામે આવ્યું છે.
પ્રાથમિક તપાસમાં બહાર આવ્યું છે કે આ ઝેર અમદાવાદના એક સોની પાસેથી લાવવામાં આવ્યું હતું અને આરોપીઓ તેને સુરતમાં વેચવાની પેરવીમાં હતા. નોંધનીય છે કે સાપના ઝેરનો ઉપયોગ બ્લડપ્રેશરની દવાઓ બનાવવા માટે થતો હોય છે, પરંતુ છેલ્લા કેટલાક સમયથી રેવ પાર્ટીઓમાં નશો કરવા માટે પણ તેનો ગેરકાયદેસર ઉપયોગ વધ્યો છે, જેને પગલે પોલીસ હવે આ નેટવર્કના મૂળ સુધી પહોંચવા વધુ તપાસ કરી રહી છે.
ધરપકડ કરાયેલા 7 આરોપીમાં સુરતના 2 અને વડોદરાના 5 શખસનો સમાવેશ થાય છે. જેમાં 67 વર્ષીય મનસુખ ઘીનૈયા, 60 વર્ષીય ચીમન ભુવા, 41 વર્ષીય સમીર પંચાલ, 74 વર્ષીય પ્રવીણ શાહ, 50 વર્ષીય કેતન શાહ, 54 વર્ષીય મકરંદ કુલકર્ણી અને 40 વર્ષીય પ્રશાંત શાહ સામેલ છે. પોલીસ તપાસમાં બહાર આવ્યું છે કે આ ઝેર અમદાવાદના એક સોની પાસેથી લાવવામાં આવ્યું હતું. આરોપીઓ લસકાણા અને સરથાણા વિસ્તારમાં આ કિંમતી ઝેરના વેચાણ માટે નેટવર્ક ફેલાવી રહ્યા હતા, પરંતુ પોલીસની સતર્કતાને કારણે તેમનો ઈરાદો સફળ થઈ શક્યો નહીં.
આ ઓપરેશન બાદ હવે સુરત પોલીસ આ ઝેરના સપ્લાય ચેઈનની ઊંડી તપાસ કરી રહી છે. ખાસ કરીને અમદાવાદના એ સોનીની શોધખોળ ચાલી રહી છે જેણે આ ઝેર પૂરું પાડ્યું હતું. ગુજરાતમાં આ પ્રકારના કૌભાંડનો પર્દાફાશ થતા વન્યજીવ સુરક્ષા અને ગેરકાયદેસર ડ્રગ્સ નેટવર્ક અંગે ગંભીર સવાલો ઊભા થયા છે.
આ કરોડોના કાળા કારોબારની કડીઓ અમદાવાદથી સુરત સુધી જોડાયેલી છે. અમદાવાદના આરટીઓ સર્કલ પાસે રહેતા મુખ્ય સૂત્રધાર ઘનશ્યામ સોનીએ વડોદરાના પ્રશાંત અને મકરંદને આ ઝેર વેચવા માટે આપ્યું હતું.
આ ટોળકી સુરતમાં મેરેજ બ્યુરો ચલાવતા મનસુખ ગીનયાના સંપર્કમાં હતી, જ્યાં આ ઝેરનો સોદો 9 કરોડ રૂપિયામાં ફાઈનલ થયો હતો. આટલી માતબર રકમના સોદામાં દરેકના કમિશન નક્કી હતા, પરંતુ સોદો પૂરો થાય તે પહેલા જ પોલીસે ફિલ્મી ઢબે ત્રાટકીને વડોદરાના એક એડવોકેટ સહિત સાતેય આરોપીઓના મનસૂબા પર પાણી ફેરવી દીધું હતું.
રેવ પાર્ટીઓમાં સ્નેક બાઇટ તરીકે થતો હોવાની શંકા
આ કોબ્રા વેનમનો ઉપયોગ માત્ર જીવનરક્ષક દવાઓ કે એન્ટી-વેનમ બનાવવા માટે જ નહીં, પરંતુ હાઈ-પ્રોફાઈલ રેવ પાર્ટીઓમાં નશા માટે ‘સ્નેક બાઈટ’ તરીકે પણ થતો હોવાની આશંકા છે. પોલીસ માટે હવે સૌથી મોટો પડકાર ઘનશ્યામ સોનીને પકડવાનો છે, કારણ કે તેના પકડાયા બાદ જ ખબર પડશે કે આટલું મોંઘું ઝેર ક્યાંથી લાવવામાં આવ્યું હતું અને આ પાછળ કઈ મોટી ગેંગનો હાથ છે. હાલમાં આ સાત ઇસમોની પૂછપરછમાં અનેક મોટા ખુલાસા થવાની શક્યતા છે.
એસઓજીના ડીસીપી રાજદીપ સિંહ નકુમે જણાવ્યું હતું કે,આ જે વેનમ છે એ પ્રતિબંધિત છે અને એની એક mlની કિંમત 90 લાખ રૂપિયા ઇન્ટરનેશનલી ગણાય છે અને આનો જે ઉપયોગ છે એ અલગ અલગ દવાઓ જેમ કે બીપીની દવા પછીaa લોહી ગંઠાવાની દવા હાર્ટ એટેકથી બચવા માટે થાય. તેમજ સાપનું ઝેર જે હોય છે એ ઝેર સાપ કરડ્યા પછી તેના ઉપચારની અંદર એન્ટીવેનમ તરીકે પણ આનો ઉપયોગ થાય છે અને મોટી મોટી જે રેવ પાર્ટીઓમાં હોય છે કે અમુક લોકો જે છે સ્નેક બાઇટ અથવા સાપના ઝેરથી નશો કરતા હોય છે તો આવી રેવ પાર્ટીઓમાં પણ આનો ઉપયોગ થતો હોય છે.
