પીએમ મોદી આજે સાઇપ્રસના પ્રવાસે છે. અહીં રાષ્ટ્રપતિ ભવનમાં પીએમ મોદીનું ભવ્ય સ્વાગત કરવામાં આવ્યું. આ ઉપરાંત પીએમ મોદીને સર્વોચ્ચ નાગરિક સન્માનથી પણ સન્માનિત કરવામાં આવ્યા. સાઇપ્રસના રાષ્ટ્રપતિ નિકોસ ક્રિસ્ટોડૌલિડેસ દ્વારા પીએમ મોદીને સાઇપ્રસનુ સર્વોચ્ચ સન્માન ગ્રેન્ડ ક્રૉસ ઓફ ધ ઓર્ડ ઓફ મકારિયોસ IIIથી સન્માનિત કરાયા. ત્યારબાદ બંને દિગ્ગજોની બેઠક મળી હતી. આ બેઠક બાદ પીએમ મોદીએ સંબોધન કરતા જણાવ્યું કે સંવાદથી જ દરેક સમસ્યાનું સમાધાન નીકળે છે.
આ યુદ્ધનો યુગ નથી- પીએમ મોદી
સાઇપ્રસની સરકારે પહલગામ આતંકવાદી હુમલાને લઇને નિંદા કરી. આતંકવાદ વિરુદ્ધની લડાઇમાં સાઇપ્રસે ભારતનું સમર્થન કર્યું. પીએમ મોદીએ કહ્યું કે સાયપ્રસના રાષ્ટ્રપતિ સાથે વિસ્તૃત ચર્ચા થઇ છે. અમે બંને દેશો સાથે મળીને રક્ષા અને સાયબર મુદ્દે સહયોગ વધારીશું. સાથે મળીને ભવિષ્યને નવો આકાર આપીશું.
આગામી 5 વર્ષનો મજબૂત રોડમેપ બનાવીશું. સાથે જ કહ્યું કે બંને દેશો રક્ષા ઉદ્યોગ પર બળ આપશે. વધુમાં કહ્યું કે પશ્ચિમ એશિયાની સ્થિતિ પર બંને દેશો ચિંતિત છે. તેમણે એમ પણ કહ્યુ કે આ યુદ્ધનો યુગ નથી. પીએમ મોદીએ વધુમાં જણાવ્યું કે અમે બોર્ડર પર આતંકવાદ વિરુદ્ધ ભારતની જંગમાં સાઇપ્રસના સતત સમર્થન માટે આભારી છીએ. આતંકવાદ, નશીલા પદાર્થો અને હથિયારોની તસ્કરી રોકવા અમારી એજન્સીઓ વચ્ચે વાસ્તવિક સમય સૂચનાના આદાન પ્રદાન માટે એક તંત્ર વિકસિત કરાશે.
સાથે મળીને કામ કરવા સહમત- નિકોસ
સાયપ્રસના રાષ્ટ્રપતિ, નિકોસ ક્રિસ્ટોડોલિડ્સએ કહ્યું કે અમે અમારા દ્વિપક્ષીય સંબંધો અને વિવિધ ક્ષેત્રોમાં તાલમેલ વધારવાની ચર્ચા કરી. અમે સંરક્ષણ સહયોગ, કટોકટી વ્યવસ્થાપન, પર્યટન, નવીનતા અને કૃત્રિમ બુદ્ધિમત્તા પર કામ કરવા માંગીએ છીએ. અમે સાથે મળીને કામ કરવા સંમત થયા જેથી અમે નક્કર પરિણામો લાવી શકીએ.
