તમામ ઓફિસરોને પ્રોબેશન પર ભારતીય પોલીસ સેવામાં નિમણૂક કરવા અને ગુજરાત કેડરમાં ફાળવવાનો આદેશ
ગુજરાતમાં ચૂંટણીના સમયમાં ૮ આઇપીએસ ઓફિસરોના પ્રમોશનના ઓર્ડર નીકળ્યા છે. પોલીસ તંત્રમાં આઇપીએસ અધિકારીઓની ઘટ નિવારવા માટે તાત્કાલીક આદેશ નીકળ્યા હોવાનું સૂત્રોએ જણાવ્યું છે. કેન્દ્ર સરકારે આઠ અધિકારીઓને ભારતીય પોલીસ સેવા (આઈપીએસ)માં પ્રોબેશન ધોરણે પ્રમોશન આપવાનો આદેશ કર્યો છે. આ તમામ પોલીસ અધિકારીને ગુજરાત કેડરમાં સમાવવામાં આવશે.
ભારતીય પોલીસ સેવા (ભરતી) નિયમો ૧૯૫૪ના નિયમો પ્રમાણે મળેલી સત્તાનો ઉપયોગ કરીને ગુજરાત પોલીસ સેવાના આઠ અધિકારીઓને પ્રોબેશન પર ભારતીય પોલીસ સેવામાં નિમણૂક કરવામાં આવી છે. કેડરના નિયમો પ્રમાણે આ તમામને ગુજરાત કેડર ફાળવવા માટે મંજૂરી આપવામાં આવી છે. UPSCની ૨૮મી માર્ચે મળેલી સિલેક્શન કમિટીની બેઠકમાં ૨૦૨૧ અને ૨૦૨૨ની કેડર – તૈયાર કરવામાં આવી છે.
કેન્દ્ર સરકારની મિનિસ્ટ્રી ઓફ હોમ અફેર્સના આદેશ પ્રમાણે સિલેક્ટ લિસ્ટ ૨૦૨૧માં યુવરાજસિંહ જે જાડેજા, બળદેવભાઈ સી દેસાઈ, ગૌરવ જી જસાણી, ઇમ્તિયાઝ જી શેખ, બળદેવસિંહ સી વાઘેલા અને લખધીરસિંહ એ ઝાલા તેમજ સિલેક્ટ લિસ્ટ ૨૦૨૨માં નરેશકુમાર એમ કણજરિયા અને ફાલ્ગુનીબેન આર પટેલને આઈપીએસ તરીકે પ્રમોટ કરવામાં આવ્યા છે.
રાજ્યમાં હાલ આઈપીએસ અધિકારીઓની ઘટ છે અને લોકસભા ચૂંટણી દરમ્યાન પોલીસની બદલીઓ પેન્ડીંગ રહેલી છે ત્યારે કેન્દ્રના આ પગલાંથી પોલીસમાં ખાલી જગ્યાઓ અને વધારાના હવાલા સામે આ અધિકારીઓના પોસ્ટીંગ કરવામાં આવશે. હાલ આ અધિકારીઓને એક વર્ષના પ્રોબેશન પિરીયડ પર તાલીમમાં જવાનુ થશે અને ત્યારબાદ તેમના રેગ્યુલર પોસ્ટીંગ કરવામાં આવશે.
