સામાન્ય નાગરિકોને મોંઘવારીના મોરચે મોટો આંચકો લાગ્યો છે. લાંબા સમયની રાહત બાદ, દેશમાં રિટેલ ફુગાવાનો દર (Retail Inflation Rate) ફરી એકવાર વધી ગયો છે, જે સીધો તમારા ઘરના બજેટને અસર કરશે. સરકારી આંકડાઓ અનુસાર, ભારતમાં રિટેલ ફુગાવો નવેમ્બર મહિનામાં વાર્ષિક ધોરણે વધીને 0.71 ટકા પર પહોંચી ગયો છે, જે ઓક્ટોબરમાં રેકોર્ડ નીચલા સ્તર 0.25 ટકા પર હતો. એટલે કે, માત્ર એક મહિનામાં ફુગાવામાં 0.46 ટકાનો નોંધપાત્ર વધારો થયો છે.
ખાદ્ય પદાર્થોની કિંમતોમાં આવેલી મજબૂતીને કારણે મોંઘવારી વધી
આ વધારો મુખ્યત્વે ખાદ્ય પદાર્થોની કિંમતોમાં આવેલી મજબૂતીને કારણે થયો છે. ઘણા મહિનાઓની સતત રાહત બાદ, ખાદ્ય પદાર્થોની કિંમતોમાં હવે વધારો જોવા મળી રહ્યો છે. ઉલ્લેખનીય છે કે, રિટેલ ફુગાવો સતત દસમા મહિને રિઝર્વ બેંક ઓફ ઈન્ડિયા (RBI) ના 4 ટકાના મધ્યમ ગાળાના લક્ષ્યથી નીચે રહ્યો છે, જે થોડી રાહતની વાત છે. તેમ છતાં, ગ્રાહક ભાવ સૂચકાંક (CPI) બાસ્કેટમાં લગભગ અડધો હિસ્સો ધરાવતા ખાદ્ય પદાર્થોના ભાવમાં નવેમ્બરમાં માસિક ધોરણે 111 બેસિસ પોઈન્ટ્સનો વધારો થયો છે.
https://x.com/PTI_News/status/1999444502097154339
વૃદ્ધિને પ્રોત્સાહન આપવા માટે સંતુલિત અભિગમ
બીજી તરફ, RBI ની મોનેટરી પોલિસી કમિટી (MPC) એ આ નાણાકીય વર્ષ માટે તેના ફુગાવાના અંદાજમાં ઘટાડો કર્યો છે, જે હવે અગાઉના 2.6 ટકાના અંદાજની સરખામણીએ સરેરાશ 2 ટકા રહેવાનો અંદાજ છે. MPC એ તાજેતરમાં પોલિસી રેટમાં પણ 25 બેસિસ પોઈન્ટ્સનો ઘટાડો કરીને 5.25 ટકા કર્યો છે, જે વૃદ્ધિને પ્રોત્સાહન આપવા માટે સંતુલિત અભિગમ દર્શાવે છે. આ સાથે જ, સમિતિએ નાણાકીય વર્ષ 2025-26 માટેના GDP વૃદ્ધિના અંદાજને પણ વધારીને 7.3 ટકા કર્યો છે. જોકે, RBI વૃદ્ધિ પર ધ્યાન કેન્દ્રિત કરી રહી છે, ખાદ્ય મોંઘવારીમાં આવેલો ઉછાળો સામાન્ય માણસ માટે ચિંતાનો વિષય છે.
