વેરાવળના સુપાસીમાં ચાલતા ગેરકાયદેસર ગેસ રિફીલિંગ નેટવર્કનો પર્દાફાશ
SOGની ટીમે 30 જેટલા સિલિન્ડર સાથે 1,07,320નો મુદામાલ કબ્જે કર્યો
અગ્ર ગુજરાત, ગીર સોમનાથ
ગીર સોમનાથ જીલ્લામાં ગેરકાયદેસર ગેસ રિફીલિંગના નેટવર્કનો સ્પેશિયલ ઓપરેશન ગ્રુપ (SOG)એ પર્દાફાશ કર્યો છે. જેમાં વેરાવળ તાલુકાના સુપાસી ગામે આવેલી વાવડી રોડ પર ગેસના ગેરકાયદેસર રિફીલિંગ નેટવર્કનો ભંડાફોડ થયો છે, જિલ્લામાં ગેસ સુરક્ષા અંગે ગંભીર પ્રશ્નો ઉભા કરતી ઘટના અંગે SOG ને મળેલ ચોક્કસ બાતમીના આધારે સ્ટાફએ દરોડો પાડતા સ્થળ પરથી આશરે 30 જેટલા ઘરેલુ તેમજ કોમર્શિયલ ગેસ સિલિન્ડર મળી આવ્યા હતા. આ સાથે ગેસ રિફીલિંગ માટે વપરાતા જોખમી અને ગેરકાયદેસર સાધનો મળી આવતા તમામ મુદામાલ કબજે લેવામાં આવ્યો હતો.
આની પ્રાથમિક તપાસમાં બહાર આવ્યું છે કે આ સમગ્ર ગેરકાયદેસર પ્રવૃત્તિ લખમણ વાસા બારડ નામના ઈસમ દ્વારા ચલાવવામાં આવી રહી હતી. જેમાં ઓછા ખર્ચે ગેસ રિફીલિંગ કરી લોકો સુધી પહોંચાડવાનું આ નેટવર્ક લાંબા સમયથી કાર્યરત હોવાની આશંકાના આધારે પૂછપરછ હાથ ધરવામાં આવી છે.
આ દરોડાની કાર્યવાહી જિલ્લા પોલીસવડા જયદીપસિંહ જાડેજાની માર્ગદર્શનમાં SOG પી.આઈ. ડી.એમ. કાગડા, પી.એસ.આઈ રીનાબેન સુવા અને તેમની ટીમ દ્વારા હાથ ધરવામાં આવી હતી. ટીમે ઝડપાયેલા સિલિન્ડર અને સાધનો મામલતદારને સોંપી પુરવઠા વિભાગને જાણ કરી છે. પોલીસે દરોડા દરમ્યાન સ્થળ પરથી ઘરેલુ અને કોમર્શિયલ ગેસના ખાલી-ભરેલા બાટલા – 30 (રૂ. 95,320), ગેસ રીફિલિંગ માટેની ઇલેક્ટ્રિક મોટર – 2 (રૂ. 6,000), રેગ્યુલેટર અને નળીઓ – 4 (રૂ. 1,000), વજન કાંટો – 1 (રૂ. 5,000) કુલ મળી રૂ. 1,07,320 નો મુદામાલ જપ્ત કરી આરોપી સામે કાયદેસરની કાર્યવાહી હાથ ધરવામાં આવી છે. સમગ્ર મુદ્દામાલ વેરાવળ ગ્રામ્ય મામલતદારને આગળની કાર્યવાહી માટે સોંપવામાં આવ્યો છે. હાલ પુરવઠા વિભાગ દ્વારા કાયદેસરની કાર્યવાહી શરૂ કરવામાં આવી છે અને આરોપી સામે કડક પગલાં લેવામાં આવશે તેવી શક્યતા વ્યક્ત કરવામાં આવી રહી છે.
ગેરકાયદેસર રિફીલિંગથી મોટો અકસ્માત બની શકે
વિશેષજ્ઞોના જણાવ્યા મુજબ, ગેરકાયદેસર રીતે ગેસ રિફીલિંગ કરવું અત્યંત જોખમી છે. આવી પ્રવૃત્તિઓમાં સલામતીના કોઈ નિયમોનું પાલન થતું નથી, જેના કારણે આગ અથવા વિસ્ફોટ જેવી મોટી દુર્ઘટનાઓ સર્જાઈ શકે છે. સુપાસી ગામમાં ઝડપાયેલું આ નેટવર્ક પણ આસપાસના વિસ્તારમાં રહેવાસીઓ માટે ગંભીર જોખમ બની શકે તેમ હતું.
ગેસના કાળા બજાર પર કાબૂ લાવવાની જરૂર
આ ઘટનાએ સ્પષ્ટ કર્યું છે કે જિલ્લામાં હજુ પણ ગેસના કાળા બજારનું જાળું સક્રિય છે. સ્થાનિક તંત્ર દ્વારા સતત મોનિટરિંગ અને કડક કાર્યવાહી જરૂરી બની છે જેથી આવી ગેરકાયદેસર પ્રવૃત્તિઓ પર સંપૂર્ણ રોક લગાવી શકાય. સુપાસી ગામે SOG દ્વારા કરવામાં આવેલી આ કાર્યવાહી ગીર સોમનાથ જિલ્લામાં ગેરકાયદેસર ગેસ રિફીલિંગના ધંધા સામે મોટો ઝાટકો સાબિત થઈ છે. હવે જોવાનું રહેશે કે તંત્ર આ મામલે કેટલી ઝડપથી અને કડક કાર્યવાહી કરીને આવા નેટવર્કને જડમૂળથી ઉખેડી શકે છે.
