રામનવમી, ચેટીચાંદ અને રમઝાન સહિતના ધાર્મિક પર્વ પહેલા કામગીરી
અગ્ર ગુજરાત, ગીર સોમનાથ
આગામી રામનવમી, ચેટીચાંદ અને રમઝાન જેવા ધાર્મિક તહેવારો પૂર્વે ગીર સોમનાથ જિલ્લાના પ્રભાસ પાટણ પોલીસ દ્વારા સોમનાથ અને પ્રભાસ પાટણ શહેરમાં સઘન ફૂટ પેટ્રોલિંગ હાથ ધરવામાં આવ્યું હતું. તહેવારોના દિવસોમાં કાયદો અને વ્યવસ્થા જાળવવા તથા શાંતિપૂર્ણ વાતાવરણ સુનિશ્ચિત કરવાના હેતુથી આ પગલું ભરવામાં આવ્યું છે.
પ્રભાસ પાટણ પોલીસ ઇન્સ્પેક્ટર એચ.આર. ગોસ્વામીના માર્ગદર્શન હેઠળ આ પેટ્રોલિંગ યોજાયું હતું. પોલીસ અધિકારીઓ અને જવાનોની ટીમે સોમનાથ તેમજ પ્રભાસ પાટણ શહેરના મુખ્ય બજારો, વ્યસ્ત માર્ગો અને જાહેર સ્થળોએ ફરી વળી હતી. ખાસ કરીને ભીડભાડવાળા વિસ્તારો અને તહેવારો દરમિયાન લોકોની અવરજવર વધુ રહેતા સ્થળો પર વિશેષ ધ્યાન કેન્દ્રિત કરવામાં આવ્યું હતું.
આ ફૂટ પેટ્રોલિંગમાં મહિલા પીએસઆઇ રાઠોડ, પીએસઆઇ શક્તિસિંહ ઝાલા સહિતના અધિકારીઓ, સર્વેલન્સ સ્ટાફ, જીઆરડીના જવાનો, પોલીસ કર્મચારીઓ અને મહિલા પોલીસ સ્ટાફ જોડાયા હતા. પોલીસ ટીમે શહેરના વિવિધ સંવેદનશીલ વિસ્તારોમાં ચેકિંગ હાથ ધરી લોકોમાં સુરક્ષાનો વિશ્વાસ મજબૂત કર્યો હતો.
પોલીસ અધિકારીઓએ વેપારીઓ અને નાગરિકોને તહેવારો દરમિયાન શાંતિ અને સૌહાર્દ જાળવવા અપીલ કરી હતી. કોઈપણ શંકાસ્પદ પ્રવૃત્તિ કે અફવા અંગે તાત્કાલિક પોલીસને જાણ કરવા પણ સૂચના આપવામાં આવી હતી. સોમનાથ વિસ્તારમાં ભક્તોની વધતી સંખ્યાને ધ્યાનમાં રાખીને સુરક્ષા વ્યવસ્થા વધુ સજ્જ બનાવવામાં આવી રહી છે.
પ્રભાસ પાટણ પોલીસ દ્વારા હાથ ધરાયેલા આ સઘન ફૂટ પેટ્રોલિંગથી શહેરમાં સુરક્ષાનો માહોલ મજબૂત બન્યો છે. આ કાર્યવાહી દર્શાવે છે કે પોલીસ તંત્ર તહેવારોને શાંતિપૂર્ણ રીતે ઉજવવા માટે સંપૂર્ણ રીતે સજ્જ છે.
