- પ્રવાસીઓથી ભરેલી બસ નદીમાં ખાબકતા અકસ્માત સર્જાયો
- ડ્રાયવરે બસના સ્ટેરિંગ પરથી કાબૂ ગુમાવતા બની ઘટના
- અકસ્માત બાદ પોલીસે ડ્રાયવરની કરી ધરપકડ
રશિયાના સેંટ પિટર્સબર્ગમાં એક દુ:ખદ ઘટના સામે આવી છે. આ દુર્ઘટનામાં એક પ્રવાસી બસ પુલ નીચે જતી મોયકા નદીમાં ખાબકી હતી. આ સમગ્ર અકસ્માતનો વીડિયો સામે આવ્યો છે. વીડિયોમાં જોઈ શકાય છે. પૂરપાટ જતી બસ અન્ય વાહનોને અથડાઈ મારતા પુલથી નીચે નદીમાં પડી ગઈ હતી. જે સમયે ગોઝારો અકસ્માત થયો એ સમયે બસમાં આશરે 20 લોકો સવાર હતા. રશિયન આંતરિક મંત્રાલયના જણાવ્યા પ્રમાણે આ ઘટના શુક્રવારે બપોરે 12 વાગ્યે થઈ હતી. મળતી માહિતી અનુસાર ડ્રાયવરે બસના સ્ટેરિંગ પરથી કાબૂ ગુમાવી દેતા આ ભીષણ અકસ્માત થયો હતો. ઘટનાને પગલે લોકોનાં ટોળાં એકઠા થયા હતા અને બસના પ્રવાસીઓની શોધખોળ હાથ ધરવામાં આવી હતી. જો કે ઘટનાસ્થળે નદીમાં પ્રવાસીઓ ડૂબી જવાની અને તણાઈ જવાનું સામે આવ્યું હતું. આમ છતાં પોલીસ અને ફાયર બ્રિગેડે ભારે જહેમત બાદ લોકોને બહાર કાઢયા હતા. તો કેટલાક બસના પ્રવાસીઓ જાતે તરીને કિનારે આવી ગયા હતા.
અકસ્માત બાદ પોલીસ ઘટનાસ્થળે પહોંચી હતી
રશિયન ગૃહ મંત્રાલયના પ્રાદેશિક વિભાગ અનુસાર, પોલીસને માહિતી મળી હતી કે બોલ્શાયા મોરસ્કાયા સ્ટ્રીટ નજીક મોયકા નદી પરના પુલ પરથી એક પેસેન્જર બસ પડી ગઈ છે. માહિતી મળતાં જ પોલીસની ટીમ ઘટનાસ્થળે પહોંચી હતી. પોલીસે રૅસ્ક્યૂ ઓપરેશન શરૂ કરી બસમાં ફસાયેલા લોકોને બહાર કાઢ્યા હતા. અકસ્માતમાં ઘાયલ થયેલા લોકોને સારવાર માટે હોસ્પિટલમાં ખસેડવામાં આવ્યા છે.
અકસ્માતગ્રસ્ત બસના ડ્રાયવરની ધરપકડ
મળતી માહિતી અનુસાર આ ગોઝારા અકસ્માતમાં કુલ ત્રણ લોકોનાં મોત થયા હતા અને છ લોકો ઈજાગ્રસ્ત થયા છે. બચાવ કાર્ય અને તપાસ હજી યથાવત્ છે. હાલ પૂરતું તો પોલીસે બસના ડ્રાયવરની ધરપકડ કરી લીધી છે. મંત્રાલયના જણાવ્યા પ્રમાણે બસના ડ્રાયવર વિરુદ્ધ ગુનાકીય કેસ નોંધવામાં આવ્યો છે.
