ભારતીય શેરબજારમાં મંગળવાર અમંગળ રહ્યો છે તેમ કહી શકાય કારણ કે આજે શેરબજાર 500 પોઇન્ટના ઘટાડા સાથે બંધ થયું છે. સેન્સેક્સ અને નિફ્ટી બંને લાલ રંગમાં બંધ થયા છે. બપોરે 3.30 કલાકની સ્થિતિ વિશે વાત કરીએ તો565 પોઇન્ટના ઘટાડા સાથે 84,648.12 અંકે બંધ થયો. જ્યારે નિફ્ટી 175.20 પોઇન્ટના ઘટાડા સાથે 25,852.10 અંકે બંધ થયો.
રૂપિયો ઓલ ટાઇમ લૉ
વેપાર ખાધમાં ઘટાડો થવાથી પણ રૂપિયાને કોઈ ટેકો મળ્યો ન હતો. મંગળવારે, ઇન્ટ્રાડે ટ્રેડિંગમાં રૂપિયો 36 પૈસા ઘટ્યો, જે પ્રથમ વખત યુએસ ડોલર સામે 91 ના સ્તરને પાર કરી ગયો. સવારે 11:45 વાગ્યે, રૂપિયો ડોલર સામે 91.14 પર ટ્રેડ થઈ રહ્યો હતો, જે તેના પાછલા બંધ કરતા 36 પૈસા નીચે હતો. વિદેશી સંસ્થાકીય રોકાણકારો (FII) દ્વારા સતત વેચવાલી અને ભારત-યુએસ વેપાર સોદા અંગે સ્પષ્ટતાના અભાવે રૂપિયા પર દબાણ રહ્યું.
છેલ્લા 10 ટ્રેડિંગ સત્રોમાં રૂપિયો 90 થી ઘટીને 91 પ્રતિ ડોલર થયો છે. છેલ્લા પાંચ સત્રોમાં જ રૂપિયો 1 ટકા ઘટ્યો છે. જોકે, ફોરેક્સ વેપારીઓના મતે, ડોલરમાં નબળાઈ અને વૈશ્વિક ક્રૂડ ઓઇલના ભાવમાં ઘટાડાથી રૂપિયામાં વધુ ઘટાડો કંઈક અંશે મર્યાદિત રહ્યો હતો.
વૈશ્વિક બજારોની શું છે સ્થિતિ ?
મંગળવારે એશિયાના શેરબજારો નીચા સ્તરે ટ્રેડ થયા, જેના કારણે વોલ સ્ટ્રીટ પર થયેલા નુકસાનનો સામનો કરવો પડ્યો. રોકાણકારોએ યુએસ આર્ટિફિશિયલ ઇન્ટેલિજન્સ (AI) સંબંધિત શેરોમાંથી નાણાં ઉપાડવાનું ચાલુ રાખ્યું. જાપાનનો નિક્કી 225 ઇન્ડેક્સ 1.27 ટકા ઘટ્યો. દક્ષિણ કોરિયાનો કોસ્પી સતત બીજા સત્રમાં 0.75 ટકા ઘટ્યો. ઓસ્ટ્રેલિયાનો S&P/ASX 200 લગભગ સ્થિર રહ્યો.
યુએસમાં, વોલ સ્ટ્રીટના મુખ્ય સૂચકાંકો સોમવારે નીચા સ્તરે બંધ થયા. રોકાણકારો આર્થિક ડેટાના વ્યસ્ત સપ્તાહની તૈયારી કરી રહ્યા હતા અને સંભવિત ફેડરલ રિઝર્વ ઉમેદવારોના સમાચાર તેમજ નીતિ નિર્માતાઓના નિવેદનોમાંથી વ્યાજ દરના વલણ વિશે સંકેતો શોધી રહ્યા હતા. S&P 500 એ તેનો પ્રારંભિક લાભ ગુમાવ્યો અને 0.16 ટકા ઘટ્યો. ડાઉ જોન્સ ઇન્ડસ્ટ્રિયલ એવરેજ 0.09 ટકા થોડો ઘટ્યો, જ્યારે નાસ્ડેક કમ્પોઝિટ, જેમાં ટેક સ્ટોક્સનો સમાવેશ થાય છે, 0.59 ટકા ઘટીને બંધ થયો.
Gold Silver Price Today: સોનાના ભાવમાં થયો ઘટાડો, જાણો 10 ગ્રામ સોનાનો લેટેસ્ટ રેટ
