પ્રશ્ન : મારી ઉંમર 18 વર્ષ છે, છેલ્લા બે મહિનાથી મને વ્હાઇટ ડિસ્ચાર્જ થઇ રહ્યું છે, આવું શા કારણે થાય છે એ સમજાતું નથી. આ પ્રવાહી વ્હાઇટ નથી હોતું, પાણી કલરનું હોય છે. એ વળી હું થોડી ઉત્તેજિત હોઉં ત્યારે જ નીકળે છે, મતલબ કે હું કોઇ ફિલ્મમાં કિસિંગ સીન જોતી હોઉં કે એવો કોઇ સીન આવતો હોય ત્યારે જ તે થાય છે. આવું કેમ થતું હશે? મને એનો કોઇ ઉપાય કે દવા જણાવશો. મારે ડૉક્ટરને નથી બતાવવું.
જવાબ : તમને વ્હાઇટ ડિસચાર્જ નથી થતું. તમે એક્સાઇટ હો ત્યારે વજાઇનામાંથી પ્રવાહી ઝરે છે, જે એકદમ નોર્મલ બાબત છે. આવું દરેક સ્ત્રીને થાય, આ અંગે તમારે સહેજ પણ ટેન્શન લેવાની જરૂર નથી.
પ્રશ્ન : મારી ઉંમર 15 વર્ષ છે, મારે ત્રણ મહિના પહેલાં જ માસિક આવવાનાં શરૂ થયાં છે. મારી બધી જ મિત્રને માસિક સમયે પેટમાં ખૂબ દુખાવો થતો હોય છે, એ સમયગાળામાં તેમને ખીલની સમસ્યા પણ રહે છે. મને આવું કશું નથી થતું. મને માસિક વખતે ખીલ પણ નથી થતા અને પેટમાં દુખાવો પણ નથી થતો. હા, કમરમાં થોડો દુખાવો રહે છે, પગ પણ દુ:ખે છે પણ વધારે પડતા નહીં. મારી મિત્રને તો એ સમયે રજા લેવી પડે એટલો દુખાવો થાય છે. મારે જાણવું છે કે શું મને કોઈ બીજી સમસ્યા તો નહીં હોયને? મને માસિક બરાબર આવતું તો હશેને? બ્લીડિંગ બે દિવસ સારું થાય છે, ત્રીજા દિવસે સાવ ઓછું હોય છે અને ચોથા દિવસે પણ સાવ ઓછું જ હોય છે. મેં સાંભળ્યું છે કે માસિક સરખું આવે તો જ આગળ જતાં બાળકો થાય, મને બહુ ટેન્શન થાય છે, મને કોઇ સમસ્યા તો નહીં હોયને? મમ્મીને કહેતાં પણ ડર લાગે છે, કારણ કે એ મને ગાયનેક પાસે લઇ જાય.
જવાબ : બહેન તું નાહક ડરે છે. દરેક બહેનને પેટનો અતિશય દુખાવો થાય એવું જરૂરી નથી. તું તારી જાતને નસીબદાર માન કે તને એ પીડા નથી, જેને હોય તેને પૂછજે કે એ કેટલી ખરાબ હોય છે. તને કમરમાં દુખાવો થાય છે અને પેટમાં નથી થતો એ કોઈ સમસ્યા નથી. એ અંગે ટેન્શન લેવાની સહેજ પણ જરૂર નથી. તારું માસિક બીજી છોકરીઓ જેટલું જ નોર્મલ છે.
