- 8 લાખની ટીપ પોતાના સહકર્મચારીઓ વચ્ચે વહેંચી દીધી
- રેસ્ટોરન્ટ મેનેજમેન્ટે ટીપ લેનાર વેઇટ્રેસને નોકરી માંથી કાઢી મૂકી
- વેઇટ્રેસે ફેસબૂક પર લખ્યું: શું વહેંચીને ખાવું અપરાધ છે?
અમેરિકામાં કામ કરી રહેલ એક વેઇટ્રેસે ટીપના ચક્કરમાં નોકરી ગુમાવવાનો વારો આવ્યો. વેઇટ્રેસે આ ઘટનાને લઈને સોશિયલ મીડિયામાં એક પોસ્ટ પણ કર્યું, જોકે તેને બાદમાં ડિલીટ કરી દીધું હતું. વેઇટ્રેસને 100-200 રૂપિયાની નહીં પરંતુ પૂરા 8 લાખ રૂપિયાની ટીપ મળી હતી. વેઇટ્રેસે જણાવ્યું કે રેસ્ટોરન્ટમાં 32 USD (2692 રૂપિયા)નું જમવાનું જમ્યા બાદ એક કસ્ટમરે તેને 10,000 USD (8 લાખ રૂપિયા)ની ટીપ આપી હતી.
મહત્વનું છે કે, રેસ્ટોરન્ટ ટીપ આપવાનું ચલણ સમગ્ર દુનિયામાં છે. લોકો સારી હોટલ સર્વિસ માટે ટીપ આપવાનું પસંદ કરે છે. માનવામાં આવે છે કે ટીપ આપવાથી હોટલ-રેસ્ટોરન્ટમાં કામ કરતાં લોકોનું મનોબળ વધુ મજબૂત થાય છે અને તેનો વધુ ઉત્સાહ અને ખુશીથી લોકોને સર્વ કરે છે. જોકે, અમેરિકામાં ટીપ લેવું એક વેઇટ્રેસ માટે મોંઘું પડ્યું હતું.
ગ્રાહક આપીને ગયો 8 લાખની ટીપ
એક અંગ્રેજી અખબારના અહેવાલમુજબ, મિશિગનમાં રહેતી લિન્સે બોયડ નામની વેઇટ્રેસે પોતાની સાથે બનેલ અજીબોગરીબ ઘટના અંગે સોશિયલ મીડિયા પ્લેટફોર્મ ફેસબૂક પર લખ્યું. વેઇટ્રેસે જણાવ્યું કે એક દિવસ તેના રેસ્ટોરન્ટમાં એક આધેડ વયનો શખ્સ જમવા માટે આવે છે, તે કઈક ઓર્ડર કરે છે અને વેઇટ્રેસ તેને તેનો કરેલો ઓર્ડર સર્વ કરે છે. જમવાનું પતાવીને આ શખ્સ 32 USD (2692 રૂપિયા)નું બિલ ચૂકવે છે. પરંતુ આશ્ચર્યજનક રીતે તે શખ્સ 10,000 USD (8 લાખ રૂપિયા) ટીપ તરીકે આપીને જાય છે. સાથે જ તે શખ્સ વેઇટ્રેસને કહે છે કે તે આ ટીપ અંગે કોઈને વાત નહિ કરે. આટલી મોટી ટીપ મળતા લિન્સે બોયડ ખૂબ જ ખુશ હતી અને તે ટીપના પૈસા પોતાના સહકર્મચારીઓ વચ્ચે સરખભાગે વહેંચી દે છે.
ટીપના કારણે વેઇટ્રેસની નોકરી ગઈ
વેઇટ્રેસે જ્યારે આ વાત રેસ્ટોરન્ટના મેનેજમેન્ટને જણાવી તો મેનેજમેન્ટે વેઇટ્રેસને નોકરી માંથી કાઢી મૂકી. આખી ઘટનાથી ચોંકી ગયેલ વેઇટ્રેસે ફેસબૂક પર પોસ્ટ કરીને પોતાની આપવીતી લોકો સમક્ષ રજૂ કરી. તેણે સવાલ કર્યો કે શું શેર કરીને ખાવું અપરાધ છે? તો, રેસ્ટોરન્ટ મેનેજમેન્ટ તરફથી કહેવામાં આવ્યું છે કે ટીપ લેવાને કારણે તેને નોકરી માંથી નથી કાઢવામાં આવી પરંતુ ટીપનો ટેક્સ નહિ ભરવાને કારણે તેના સામે કાર્યવાહી કરવામાં આવી છે, અને તેને નોકરી માંથી કાઢી મૂકવામાં આવી છે. જોકે, વેઇટ્રેસે હવે પોતાની પોસ્ટ ફેસબૂક પરથી હટાવી દીધી છે.
