ફ્લોરટેસ્ટમાં કોને કરશે સપોર્ટ? નારાજગી વચ્ચે છલકાયું જીતન રામ માંઝીનું દર્દ

• એક રોટલીથી પેટ નથી ભરાતું, વધુ કામ કરવું છે, વધુ ભાગીદારી આપો: માંઝી
• “ફ્લોર ટેસ્ટમાં NDA ગઠબંધનના સમર્થનમાં મજબૂત રીતે સાથે રહીશું”
• આગામી 12 ફેબ્રુઆરીના રોજ બિહારની નવી સરકારનું થશે ફ્લોરટેસ્ટ 

બિહારના પૂર્વ મુખ્યમંત્રી જીતન માંઝી રામનું દર્દ ફરી છલકાયું છે. તેમણે કહ્યું કે એક રોટલીથી પેટ નથી ભરાતું. તેમણે કેબિનેટ વિસ્તરણ અંગે તેમની ભાગીદારી વધારવાની માંગ કરી હતી. જણાવી દઈએ કે માંઝી નવી સરકારમાં તેમની ભાગીદારી અંગે સતત નિવેદનો આપી રહ્યા છે. આ જ ક્રમમાં જહાનાબાદમાં પત્રકારો સાથે વાત કરતાં તેમણે કહ્યું કે એક રોટલીથી પેટ નથી ભરાતું, તેમને વધુ ભાગીદારી જોઈએ છે. માંઝીના આ નિવેદનથી બિહારમાં ફરી એકવાર રાજકીય વાતાવરણ ગરમાઈ ગયું છે. માંઝી પટનાથી પોતાના ગામ મહાકર જતા જહાનાબાદમાં પત્રકારો સાથે વાત કરી રહ્યા હતા.

ફ્લોર ટેસ્ટને લઈને મોટી જાહેરાત

બિહારના પૂર્વ મુખ્યમંત્રી જીતન રામ માંઝીએ કહ્યું, “હું એક ગામડામાંથી આવું છું. મને શહેર સાથે કોઈ લેવાદેવા નથી. હું 43 વર્ષથી કામ કરી રહ્યો છું. લોકો મારી પાસેથી કંઈક કામ કરવાની અપેક્ષા રાખે છે. જો મને કોઈ મંત્રાલય મળે તો વધુ કામ થઈ શકે છે. મને નથી ગમતું કે હું આખો સમય એક જ વિભાગની દેખરેખ રાખું. અમને થાય છે કે અમારા સમાજની જાણી જોઈને અવગણના કરવામાં આવી રહી છે. આ કોઈ દુશ્મનાવટ નથી. એટલે સમર્થન આપવા કે ન આપવાથી કોઈ ફરક નથી પડવાનો. અમે નીતીશ કુમાર અને NDA સાથે છીએ અને રહીશું. અમે 12 ફેબ્રુઆરીએ યોજાનારી ફ્લોર ટેસ્ટમાં NDAને મજબૂતપણે સમર્થન આપીશું.”

અગાઉ તેમણે કહ્યું હતું કે અપક્ષોને પણ કેબિનેટમાં સ્થાન મળી રહ્યું છે અને સાંભળવા મળી રહ્યું છે કે તેમને પણ ઈચ્છિત વિભાગ મળી રહ્યો છે. માંઝીએ તો એમ પણ કહ્યું કે તેમણે પોતાની માંગ કેન્દ્રીય ગૃહમંત્રી અમિત શાહ, કેન્દ્રીય મંત્રી નિત્યાનંદ રાય અને મુખ્યમંત્રી નીતિશ કુમાર સમક્ષ મૂકી છે. મહાગઠબંધન દ્વારા સીએમની ઓફર આવી હતી, પરંતુ મેં તેને ફગાવી દીધી હતી. તેમણે કહ્યું કે હું ક્યારેય પૈસા અને હોદ્દાનો લોભી નથી, જે લોકો આ વિચારે છે તેઓ ગેરસમજ કરી રહ્યા છે. માંઝીએ અનિલ કુમાર સિંહને મંત્રી બનાવવાની પાર્ટીની માંગ ઉઠાવી અને કહ્યું કે આમ ન કરવું અન્યાય થશે. તે ઉચ્ચ જાતિના સમુદાયમાંથી આવે છે.