મુખ્ય ભેજું મનાતો લલિત ઝા નામનો છઠ્ઠો આરોપી નાસી ગયો હતો અને આખરે તેને ઝડપી લેવાયો છે ત્યારે ઝડપથી તપાસ થાય અને વિવાદ ના વધે તે જરૂરી
સંસદની અંદર અને બહાર સ્મોક કેનથી દેખાવો કરનારા પાંચ પકડાઈ ગયા હતા, પણ છઠ્ઠો આરોપી લલિત ઝા નાસી ગયો હતો. તેણે જ વીડિયો ઉતાર્યા હતા અને મીડિયામાં ફરતા થાય તે માટે એક એનજીઓને મોકલ્યા હતા. સંસદમાં ધમાલ કરવાની આખી યોજનાનું ભેજું લલિત ઝા હોય તેમ લાગે છે, કેમ કે તેને જ રસ હતો કે મીડિયામાં આ બધું ચમકે. મોંઘવારી અને બેરોજગારી તથા ખેડૂતોના મુદ્દા તરફ સરકારનું ધ્યાન ખેંચવા માટે આવો ખેલ કર્યો, પણ આરોપીઓએ એટલું સમજવું પડે કે સંસદ ગૃહમાં આવું કોઈ પણ કામ ગંભીર ગણાય. બંધારણીય સંસ્થાઓની સલામતી જ નાગરિકો માટે સૌથી સુરક્ષિત સ્થિતિ છે, ત્યારે આવા કૃત્યની પૂરતી તપાસ કરીને ભવિષ્યમાં કોઈ આવી ભાંગફોડ ના કરે તેવી સજા પણ થવી જોઈએ.
બીજી બાજુ સંસદના બંને ગૃહોમાં આ મુદ્દે ધમાલ મચી હતી અને 14 સાંસદોને સસ્પેન્ડ કરી દેવાયા છે. રાજ્યસભામાંથી ડેરેક ઓબ્રાયનને સસ્પેન્ડ કરાયા હતા, જેઓ અગાઉ પણ અધ્યક્ષ સાથે સતત ચર્ચામાં ઉતરતા હતા અને આ વખતે પણ ચર્ચાની માગણી કરી રહ્યા હતા. જોકે જે રીતે વિપક્ષના સભ્યોને તરત સસ્પેન્ડ કરી દેવાની રીત ચાલી રહી છે તેની સામે પણ ગંભીર સવાલો ઊભા થાય છે. યોગ્ય પદ્ધતિએ, પૂરતી ચેતવણી આપીને અને દરેક સભ્યે શું કર્યું તેની વિગતો અને તર્ક આપીને સસ્પેન્ડ કરવાના બદલે નામો નક્કી કરીને સસ્પેન્ડ કરી દેવાયા હોય તેવો આક્ષેપ વિપક્ષ કરે છે. તેનું કારણ એ છે કે પ્રથમ 15 સાંસદોને સસ્પેન્ડ કર્યાની યાદી જાહેર થઈ હતી. પછી ખબર પડી કે ડીએમકેના જે સાંસદને સસ્પેન્ડ કરી દેવાયા, તેઓ ગૃહમાં જ હાજર નહોતા. ગૃહમાં હાજર ના હોય છતાં સસ્પેન્ડ કરી દેવાયા તે દર્શાવે છે કે દરેક સાંસદની પ્રવૃતિ, તેમણે કરેલું વર્તન અને શું બોલ્યા હતા તેની પૂરતી નોંધ કે ચકાસણી થઈ નહોતી.
બીજું બાજુ પ્રતાપ સિમ્હા નામના ભાજપના સાંસદે પાસ આપ્યા હતા, તેમની સામે પણ કોઈ કાર્યવાહી કે તેમની પૂછપરછ કરવાની અને કેવા સંજોગોમાં પાસ અપાયા તેની પ્રોસેસની તપાસ કરવાની ગંભીરતા દાખવવામાં આવી નથી તે પણ સવાલો ઊભા કરે છે.
આવા સવાલો ઊભા કરવાનો આ સમય નથી એ મુખ્ય મુદ્દો છે. મુખ્ય મુદ્દો જ એ છે કે વિવાદ ના વધે તે રીતે ઝડપથી તપાસ કરીને વાતના મૂળ સુધી પહોંચવું જોઈએ. વિપક્ષે પણ એટલું સમજવું પડે કે માત્ર વિવાદ અને વિરોધને બદલે સમગ્ર ઘટનાક્રમને સમજીને, સંસદ તથા બંધારણીય સંસ્થાઓની સુરક્ષા માટે સાથે મળીને શું કરી શકાય તેના ઉકેલને લક્ષ્યમાં લેવું જોઈએ.
મુખ્ય આરોપી લાગતો લલિત ઝા પોતે પોલીસ સામે હાજર થયો. તે રાજસ્થાનના નાગૌર ગયો હતો અને ત્યાંથી મહેન નામના શખસ સાથે દિલ્હી આવીને પોલીસ સામે આવ્યો, પણ મહેશ હજી મળ્યો નથી. તેને પણ સાતમો આરોપી ગણીને તપાસ થશે તેમ લાગે છે ત્યારે ઝડપથી તપાસ આગળ વધે તે જ ઈચ્છનીય છે.
