US રાષ્ટ્રપતિ ડોનાલ્ડ ટ્રમ્પના વધુ એક નિર્ણય સામે તીવ્ર વિરોધ નોંધાયો છે. H-1B વિઝા ધારકો પર અતિશય $100,000 ફી લાદવાના પગલાંએ દેશભરમાં રાજકીય અને કાનૂની સંઘર્ષને જન્મ આપ્યો છે. 50માંથી 20 રાજ્યોએ મળીને આ નિર્ણય સામે કોર્ટનો દરવાજો ખખડાવ્યો છે. રાજ્યોનું દલીલ છે કે આ ફી માત્ર ગેરકાયદેસર જ નથી, પરંતુ શિક્ષણ, આરોગ્યસંભાળ અને સંશોધન જેવા ક્ષેત્રોને ગંભીર અસર પહોંચાડશે.
રાજ્યોની મુખ્ય દલીલ શું છે?
કેલિફોર્નિયાના એટર્ની જનરલ રોબ બોન્ટાના નેતૃત્વ હેઠળ આ મુકદ્દમો દાખલ થયો છે. રાજ્યોનો આરોપ છે કે ગૃહ સુરક્ષા વિભાગે 19 સપ્ટેમ્બરે આ ફી લાગુ કરીને પોતાના અધિકારક્ષેત્રનો ભંગ કર્યો છે. તેમનું કહેવું છે કે કોંગ્રેસે ક્યારેય રાષ્ટ્રપતિ કે વહીવટીતંત્રને H-1B વિઝા માટે આવી અતિશય ફી લાદવાનો અધિકાર આપ્યો નથી. રોબ બોન્ટાએ સ્પષ્ટ કર્યું કે કોંગ્રેસે H-1B પ્રોગ્રામ માટે મર્યાદાઓ, ફી અને નિયમો નક્કી કર્યા છે, પરંતુ $100,000 જેવી દંડરૂપ ફી ક્યારેય મંજૂર કરી નથી.
ફી વધારાથી શું અસર પડશે?
રાજ્યોનું કહેવું છે કે આ પગલાથી શાળાઓ, હોસ્પિટલો અને યુનિવર્સિટીઓને સીધું નુકસાન થશે, કારણ કે આ ક્ષેત્રોમાં મોટી સંખ્યામાં H-1B વિઝા પર કામ કરતા વ્યાવસાયિકો કાર્યરત છે. કેલિફોર્નિયાએ ખાસ કરીને ચિંતા વ્યક્ત કરી છે કે આ નિર્ણય હાલની મજૂર અછતને વધુ ગંભીર બનાવશે. અમેરિકા પહેલેથી જ ડોકટરો અને શિક્ષકોની તીવ્ર અછતનો સામનો કરી રહ્યું છે. ઉપલબ્ધ આંકડાઓ અનુસાર, અંદાજે 30,000 શિક્ષકો અને 17,000 આરોગ્યસંભાળ વ્યાવસાયિકો H-1B વિઝા પર USમાં કામ કરી રહ્યા છે, જ્યારે આવનારા વર્ષોમાં ડોકટરોની અછત 86,000 સુધી પહોંચવાની શક્યતા વ્યક્ત કરવામાં આવી છે.
હાલની ફી અને પ્રસ્તાવિત વધારો
હાલમાં H-1B વિઝાની કુલ ફી આશરે $960 (₹86,930)થી લઈને $7,600 (₹6,88,198) સુધી છે. રાજ્યોનું કહેવું છે કે તેને સીધી રીતે $100,000 (લગભગ ₹90 લાખ) સુધી વધારવી અયોગ્ય અને વ્યવહારુ નથી. આવા નિર્ણયથી માત્ર વિદેશી પ્રતિભા નહીં, પરંતુ અમેરિકન નાગરિકો માટે આવશ્યક સેવાઓ પણ પ્રભાવિત થશે.
વહીવટીતંત્ર પર આરોપ
મુકદ્દમામાં એવો પણ આરોપ મૂકવામાં આવ્યો છે કે ટ્રમ્પ વહીવટીતંત્રે જરૂરી નિયમ ઘડતર પ્રક્રિયાઓનું પાલન કર્યું નથી અને આ નિર્ણય US બંધારણ તથા વહીવટી કાયદાનું ઉલ્લંઘન કરે છે. રોબ બોન્ટાના જણાવ્યા મુજબ, જાન્યુઆરી પછીથી એકલા કેલિફોર્નિયાએ ટ્રમ્પ વહીવટીતંત્ર સામે 49 મુકદ્દમા દાખલ કર્યા છે.
દાવો દાખલ કરનાર રાજ્યો
એરિઝોના, કેલિફોર્નિયા (મુકદ્દમાનું નેતૃત્વ), કોલોરાડો, કનેક્ટિકટ, ડેલવેર, ઇલિનોઇસ, મેરીલેન્ડ, મેસેચ્યુસેટ્સ (સહ-નેતૃત્વ), મિશિગન, મિનેસોટા, નેવાડા, ન્યૂ જર્સી, ન્યૂ યોર્ક, ઉત્તર કેરોલિના, ઓરેગોન, રોડ આઇલેન્ડ, વર્મોન્ટ, વોશિંગ્ટન અને વિસ્કોન્સિન.
