વર્લ્ડ ટેસ્ટ ચેમ્પિયનશિપ 2023-25ની ફાઈનલ મેચ જ્યારે શરૂ થવાની હતી, ત્યારે ડિફેન્ડિંગ ચેમ્પિયન ઓસ્ટ્રેલિયાનું બધા ક્રિકેટ એક્સપર્ટ પલડું ભારે માની રહ્યા હતા, પરંતુ સાઉથ આફ્રિકાની ટીમે બધાને ખોટા સાબિત કર્યા અને 5 વિકેટથી ટાઈટલ મેચ જીતી લીધી.
લોર્ડ્સના મેદાન પર રમાયેલી WTC ફાઈનલ મેચમાં રમતના પહેલા 2 દિવસમાં કુલ 28 વિકેટ પડી ગઈ હતી, પરંતુ રમતના ત્રીજા દિવસે, દક્ષિણ આફ્રિકાની ટીમના બેટમાંથી એક શાનદાર સદી જોવા મળી, જેના કારણે તેની ટીમ ચોથા દિવસની રમતના પહેલા સેશનમાં 282 રનના ટાર્ગેટનો સફળતાપૂર્વક પીછો કરવામાં સફળ રહી. એડન માર્કરામના બેટમાંથી 136 રનની ઈનિંગ જોવા મળી, જેના માટે તેને પ્લેયર ઓફ ધ મેચનો ખિતાબ પણ મળ્યો, આ સાથે તેનું નામ પણ દિગ્ગજોના લિસ્ટમાં સામેલ થઈ ગયું.
WTC ફાઈનલ મેચમાં પ્લેયર ઓફ ધ મેચ જીતનાર ત્રીજો ખેલાડી બન્યો
અત્યાર સુધીમાં વર્લ્ડ ટેસ્ટ ચેમ્પિયનશિપના કુલ ત્રણ એડિશન રમાઈ ચૂક્યા છે, જેમાં પહેલી ફાઈનલ મેચ વર્ષ 2021 માં રમાઈ હતી જે ભારત અને ન્યુઝીલેન્ડ વચ્ચે રમાઈ હતી. આ મેચમાં કિવી ટીમના ફાસ્ટ બોલર કાયલ જેમિસને પ્લેયર ઓફ ધ મેચનો ખિતાબ જીત્યો હતો. વર્ષ 2023 માં WTC એડિશનની બીજી ફાઈનલ મેચ ભારત અને ઓસ્ટ્રેલિયા વચ્ચે રમાઈ હતી, જેમાં ટ્રેવિસ હેડે પ્લેયર ઓફ ધ મેચનો ખિતાબ જીત્યો હતો. હવે એડન માર્કરામનું નામ પણ આ લિસ્ટમાં સામેલ થઈ ગયું છે. એડન માર્કરામ WTC ફાઈનલ મેચમાં સદી ફટકારનાર ત્રીજો ખેલાડી પણ છે, જેમાં સ્ટીવ સ્મિથ અને ટ્રેવિસ હેડે આ સિદ્ધિ મેળવી હતી.
લોર્ડ્સમાં ICC ફાઈનલ મેચમાં પ્લેયર ઓફ ધ મેચ જીતનાર 7મો ખેલાડી બન્યો એડન માર્કરામ
અત્યાર સુધીમાં લોર્ડ્સના મેદાન પર 7 ICC ટુર્નામેન્ટ ફાઈનલ રમાઈ ચૂકી છે, જેમાં એડન માર્કરામ ICC ફાઈનલ મેચમાં પ્લેયર ઓફ ધ મેચનો ખિતાબ જીતનાર 7મો ખેલાડી બન્યો છે, જેમાં તે હવે ક્લાઈવ લોયડ, મોહિન્દર અમરનાથ અને શેન વોર્ન જેવા દિગ્ગજ ખેલાડીઓના લિસ્ટમાં જોડાયો છે.
ICC ફાઈનલમાં લોર્ડ્સમાં પ્લેયર ઓફ ધ મેચનો એવોર્ડ જીતનારા ખેલાડીઓ
- ક્લાઈવ લોયડ (વેસ્ટ ઈન્ડીઝ) – વનડે વર્લ્ડકપ, 1975
- વિવિયન રિચર્ડ્સ (વેસ્ટ ઈન્ડીઝ) – વનડે વર્લ્ડકપ, 1979
- મોહિન્દર અમરનાથ (ભારત) – વનડે વર્લ્ડકપ, 1983
- શેન વોર્ન (ઓસ્ટ્રેલિયા) – વનડે વર્લ્ડકપ, 1999
- શાહિદ આફ્રિદી (પાકિસ્તાન) – T20 વર્લ્ડકપ, 2009
- બેન સ્ટોક્સ (ઈંગ્લેન્ડ) – વનડે વર્લ્ડકપ, 2019
- એડન માર્કરામ (સાઉથ આફ્રિકા) – વર્લ્ડ ટેસ્ટ ચેમ્પિયનશિપ ફાઈનલ, 2025
એડન માર્કરામે હાંસલ કરી આ સિદ્ધિ
સાઉથ આફ્રિકાની ટીમે જ્યારે 2014 માં ICC અંડર-19 વર્લ્ડકપનું ટાઈટલ પોતાને નામ કર્યું હતું ત્યારે ત્યારે ટીમનું નેતૃત્વ એડન માર્કરામ કરી રહ્યો હતો. આ પછી લિમિટેડ ઓવરના ફોર્મેટમાં કોઈપણ ICC વર્લ્ડકપ ટુર્નામેન્ટમાં ટીમ પહેલી વાર વર્ષ 2024 માં T20 વર્લ્ડકપમાં ફાઈનલમાં પહોંચી હતી, જ્યાં તેમની ટીમને ભારત સામે હારનો સામનો કરવો પડ્યો હતો. હવે જ્યારે સાઉથ આફ્રિકાની ટીમે વર્લ્ડ ટેસ્ટ ચેમ્પિયનશિપનો ખિતાબ જીત્યો છે, ત્યારે એડન માર્કરામએ બેટથી મહત્વપૂર્ણ ભૂમિકા ભજવી છે.
