રાજકોટમાં મુખ્ય ચોકમાં હોર્ડિગ્સ રૂપે ઝળુંબતું જોખમ

મુંબઇ જેવી દુર્ઘટના ન સર્જાય તે પહેલા આ જોખમી હોર્ડિગ્સો ઉતારી લેવા અત્યંત જરૂરી

તબેલામાંથી ઘોડા છુટયા બાદ તંત્ર જાગ્યું : હોર્ડિગ્સ બેનરોની ચકાસણી કરવા આદેશ

બે દિવસ પહેલા આવેલા વાવાઝોડાના કારણે મુંબઇમાં હોર્ડિગ્સ ધરાશાય થયું હતું. જેમાં ૧૪ લોકોના મોત નિપજવાની ઘટના બની હતી. આ ઘટના ઉપરથી ઉધડો લઇને રાજકોટ મહાનગરપાલિકા દ્વારા શહેરમાં વિવિધ જગ્યાએ રહેલા હોર્ડિગ્સની ચકાસણી કરવા માટેના આદેશ આપવામાં આવ્યા હતા. પરંતુ તબેલામાંથી ઘોડા છૂટી ગયા બાદ જેવો ઘાટ સર્જાયો છે. શહેરમાં અનેક જગ્યાએ જોખમી હોર્ડિગ્સો આજે પણ લટકી રહ્યા છે. તેની માત્ર સમીક્ષા કે ચકાસણી કરવાથી દુર્ઘટના અટકી શકશે નહી પરંતુ તાકીદે આવા જોખમી હોર્ડિગ્સો ઉતારવાની કામગીરી કરવામાં આવે તેવી પ્રજાજનોમાં લાગણી ઉઠી છે.

રાજકોટમાં કિસાનપરા ચોક, યાજ્ઞીક રોડ, બસ પોર્ટ, ગોંડલ ચોકડી, કાલાવડ રોડ અંડરબ્રીજ, લક્ષ્મીનગર અંડરબ્રીજ, આમ્રપાલી અંડરબ્રીજ, રૈયા ચોકડી, કેકેવી હોલ સહિતના વિવિધ મુખ્ય ચોક ઉપર મોટા-મોટા હોર્ડિગ્સ લટકાવવામાં આવ્યા છે. ગાજવીજ સાથે પડેલા વરસાદના કારણે આ હોર્ડિગ્સો નબળા પડી ગયા છે અને આગામી વાવાઝોડામાં આ હોર્ડિગ્સ કડડભૂસ થઇને નીચે પણ પડી શકે છે અને મોટી જાનહાની થવાની શકયતા રહેલી છે. ત્યારે વહેલી તકે આ હોર્ડીગ્સની ચકાસણી કરી તેને નીચે ઉતારી લેવાની કામગીરી મનપા દ્વારા કરવામાં આવે તો આગામી દિવસોમાં મોટી જાનહાની ટળી શકે તેમ છે.

મનપા દ્વારા શહેરમાં હોર્ડિંગ બોર્ડની સાઈટ ભાડે આપવામાં આવે છે. મનપા પાસે પણ ૨૧૮ સાઈટ છે. ખાનગી એજન્સીઓએ પણ પોતાના સ્ટ્રકચર સાથે ૩૩૪ ખાનગી સાઈટ વિકસાવેલી છે. આગામી ચોમાસા દરમિયાન મુંબઈ જેવી કોઈ દુર્ઘટના ન સર્જાય તે માટે મનપાના એસ્ટેટ વિભાગ દ્વારા સાઈટની ચકાસણી કરીને સ્ટેબિલીટી રિપોર્ટ આપવાનો રહેશે. આ ઉપરાંત એજન્સીઓ દ્વારા જે સ્ટ્રકચર રિપોર્ટ પાંચ વર્ષની મુદ્દત માટે રજૂ કર્યા છે તેની પણ ચકાસણી કરવામાં આવી રહી છે. જેમની પાંચ વર્ષની મુદ્દત પુરી થતી હશે તેવી સાઈટોમાં ફરી સ્ટ્રકચર રિપોર્ટ સાથે પ્રમાણપત્રની માગણી કરવામાં આવનાર છે. એસ્ટેટ ઓફિસર દિપેન ડોડીયાએ કહયું હતું કે, અમે પ્રિમોન્સુન એકટીવીટી માટે તપાસણી શરૂ કરી છે. આગામી ચોમાસા દરમિયાન કોઈ દુર્ઘટના ન સર્જાય તે માટે હોર્ડિંગ સાઈટની ચકાસણી કરીને રિપોર્ટ માંગવામાં આવ્યા છે.અમારી પાસેના ડેટા છે તેમાં પણ પાંચ વર્ષની મુદ્દત પુરી થતી હોય તો સાઈટની સ્ટેબિલીટી અંગે નવેસરથી પ્રમાણપત્ર પણ માંગવામાં આવનાર છે.