લિયોનેલ મેસ્સીની હાજરીને કારણે ફિફા ક્લબ વર્લ્ડ કપની ઉદઘાટન મેચમાં હાર્ડ રૉક સ્ટેડિયમમાં ભારે ભીડ જોવા મળી હતી.
તે ઇન્ટર મિયામીને જીત અપાવવા માટે પૂરતી નહોતી કારણ કે શનિવારે રમાયેલી આફ્રિકન દિગ્ગજ અલ-અહલી સાથેની મેચ 0-0થી ડ્રોમાં પરિણમી હતી. મેચમાં મેસ્સીએ શાનદાર રમતનું પ્રદર્શન કર્યુ હતું અને છેલ્લી સેકન્ડમાં બોલ ક્રોસબાર પર લાગ્યો હતો પરંતુ ટીમ ગોલ કરી શકી નહોતી. આર્જેન્ટિનાના સુપરસ્ટાર ખેલાડીની હાજરીને કારણે 65 હજારની ક્ષમતા ધરાવતા સ્ટેડિયમમાં લગભગ 61 હજાર જેટલા પ્રેક્ષકો હાજર હતા, જેના કારણે નવા ક્લબ વર્લ્ડ કપમાં પહેલીવાર 32 ટીમ સાથે રમાનારી આ ટૂર્નામેન્ટના આકર્ષણ વિશે ચિંતાઓ સમાપ્ત થઇ જશે. મજબૂત ઘરેલુ સમર્થન હોવા છતાં ઇન્ટર મિયામી ઝડપી શરૂઆત નહોતું કરી શક્યું.
અલ અહલી પાસે શરુઆતમાં બે સારી તક હતી પરંતુ ટીમ તે તકનો લાભ નહોતી ઉઠાવી શકી. આ પહેલા મિયામીના ગોલકીપર ઓસ્કર ઉત્સારીએ ટ્રેગેટની ખરાબ પેનલ્ટી કીકને બચાવી લીધી હતી, જ્યારે ટેલાસ્કો સેગોવિયા દ્વારા બોક્સમાં જીજોને ફાઉલ કરાયો હતો. મેસ્સીએ થોડા સમય માટે ખતરો પેદા કર્યો હતો. બ્રેક બાદ મિયામીએ પોતાની રમતમાં પરિવર્તન કર્યુ હતું અને ગોલ માટે તક બનાવવાની શરૂઆત કરી હતી અને આફ્રિકન દિગ્ગજોને પાછળ ધકેલ્યા હતા. મેસ્સીએ 25 મીટર દૂરથી મારેલી ફરી કિક પોસ્ટ અને સાઇડ નેટિંગ સાથે ટકરાઇ હતી જેના કારણે લોકોને લાગ્યું કે તે ગોલ છે પરંતુ રેફરીએ તેને ગોલ નહોતો આપ્યો. અંતે મેચ 0-0થી ડ્રોમાં પરિણમી હતી.
