સરકારી ખરાબાની જમીનો પર દુકાનો, હોટલ, કારખાનાઓ અને ઓરડીઓ ખડકી દેવાય છે
આ વિસ્તારના ભાજપના અગ્રણી તરફ શંકાની સોય : ભાજપના બે જૂથ વચ્ચે લેટરવોરમાં પ્રકાશમાં આવ્યું કૌભાંડ : ‘સિંહ’ના કૌભાંડની સવારીની થશે તપાસ?
રાજકોટના ગોકુલનગર અને મંછાનગરમાં ઓરડી કૌભાંડ અને સરકારી જમીનો પર ગેરકાયદે દબાણના કૌભાંડો ગાજી રહ્યા છે ત્યારે રાજકોટની હદમાં આવેલા કોઠારીયા વિસ્તારમાં સરકારી જમીનોમાં દુકાનો, ઓરડીઓ અને ગેરકાયદે બાંધકામનું એક મસમોટું કૌભાંડ બહાર આવ્યું છે. ભાજપના બે જૂથમાં શરૂ થયેલું પત્રિકાકાંડના પગલે ભાજપના નેતાની સંડોવણી ધરાવતું કૌભાંડ ‘અગ્ર ગુજરાત’ની તપાસમાં પ્રકાશમાં આવ્યું છે.
શહેરના વોર્ડ નં.૧૮માં કોઠારિયા રોડ પર ભાજપના એક નેતાએ સરકારી જમીનમા બાંધકામ કૌભાંડ કર્યાની એક પત્રિકા ફરતી થઇ છે. આ અંગે ‘અગ્ર ગુજરાત’ દ્વારા છાનબીન કરવામા આવતા પુરાવા સાથે હચમચાવી જતો ઘટસ્ફોટ થયો છે. કોઠારિયા ચોકડીથી રણુજા મંદિર તરફ મનપાના પાણીના ટાંકા સામે હરીદર્શન કોમ્પ્લેક્સની બાજુમાં સરકારી ખરાબાની જગ્યામાં એક..બે.. નહીં પણ એકસાથે સાતથી આઠ દુકાન અને એક હોટલ ભાજપના આ નેતાએ ખડકી દીધી હોવાનું સામે આવ્યું છે. ભાજપના નેતાએ તેની પહેલી ‘ટર્મ’માં જ સરકારી જ મીન પચાવી પાડવી, તેના ઉપર બાંધકામ ખડકીને વહેંચી દેવા, ગેરકાયદે ઓરડી-મકાન કે દુકાન ભાડે આપી હજારો નહી, લાખો નહીં પણ કરોડ રૂપિયાની કમાણી કરવી, સુચિત જગ્યામાં બાંધકામ કરવા, બાંધકામ થતા હોય ત્યા મસમોટી ‘પ્રોટેકશન મની’ના ઉઘરાણા કરવા સહિત અનેક કરતૂતોની ‘પ્રેકટિસ’ ધમધકોર ચાલતી હોવાની વાત પણ સામે આવી છે.
‘પેનલ’માં સંપ નહી, ભાગબટાઇમાં બહાર આવ્યું કૌભાંડ
એવુ કહેવાય છે કે, વોર્ડ નં.૧૮માં ભાજપના ચાર નેતાની પેનલમાં સંપ નથી. ક્યારેય એકસાથે બેઠાં નથી. તાજેતરમાં યોજાયેલી પદયાત્રામાં પણ બે નેતા હાજર હતા અને બે નેતા ગેરહાજર હતા. ચારેય વચ્ચે છેલ્લા ઘણા સમયથી ભાગબટાઇને લઇને ચાલતા સામસામે પાડી દેવાના રાજકારણમાં આ જમીન કૌભાંડ બહાર આવ્યુ છે.
કોઠારિયામાં આ એક નહીં આવા તો અનેક કૌભાંડ?
રણુજા મંદિરથી કોઠારિયા ચોકડી મેઇન રોડ પરનું આ એક જ સરકારી જમીન પચાવી પાડવાનું કૌભાંડ નથી. આવા તો અનેક કૌભાંડો હોવાની એક વાત બહાર આવી છે. તિરુપતિ, શ્રમજીવી, કોઠારિયા ગામતળ, રણુજામંદિર પાછળ, શિતળાધાર સહિતના વિસ્તારોમાં તો સરનામા સાથેના બાંધકામ કૌભાંડ થયા હોવાનો ઇશારો ‘પત્રિકા બોમ્બ’માં વિસ્ફોટ થયો છે.
પાનની દુકાનની પાછળ પણ સરકારી જમીન ‘ગાયબ’
પહેલા કપડાનો શો-રૂમ, પછી જમવા માટેની હોટલ ખડકાઇ
મેઇન રોડ પર સરકારી ખરાબાની જમીનમાં સાતથી આઠ દુકાન ઉપરાંત પાનની દુકાનની પાછળ પણ સરકારી જગ્યા ગાયબ થઇ ગઇ છે. આ જગ્યામાં પહેલા કપડાનો શો-રૂમ ખડકાયો અને પછી જમવા માટેની હોટલ ઉભી થઇ ગઇ હતી.
બાંધકામ કૌભાંડના ૫૦ મીટરના અંતરમાં જ કાર્યાલય
જે જગ્યાએ સરકારી જગ્યા પર બાંધકામ કૌભાંડ ખડકાઇ ગયુ છે તેના ૫૦ મીટરના અંતરમાં જ વોર્ડ નં.૧૮નું ભાજપ કાર્યાલય આવ્યું છે. ભાજપનું બોર્ડ પણ લગાવેલુ છે. આમછતાં સરકારી જમીન ભૂ-માફિયા હજમ કરી ગયા હોવાનું ધ્યાનમાં આવ્યુ ન આવે એ બાબત માનવામા ન આવે.
