ગંભીર રીતે ઘાયલ બાળકને સારવાર માટે હોસ્પિટલ ખસેડાયો : લોકોમાં ભય
જૂનાગઢ પંથકમાં વન્ય પ્રાણીઓનો માનવ વસ્તી પર હુમલાનો સિલસિલો યથાવત રહ્યો છે. જૂનાગઢના બગડુ ગામે ખેતરમાં મજૂરી કરી ગુજરાન ચલાવતા એક શ્રમિક પરિવારના 9 વર્ષના બાળક પર દીપડાએ હિંસક હુમલો કરતા ચકચાર મચી ગઈ છે. પિતાની નજર સામે જ દીપડો બાળકને ખેંચીને વાડીની બીજી તરફ લઈ ગયો હતો. ગંભીર રીતે ઇજાગ્રસ્ત થયેલા બાળકને સારવાર અર્થે જૂનાગઢ સિવિલ હોસ્પિટલમાં ખસેડવામાં આવ્યો છે.
જૂનાગઢના રહેવાસી રવિભાઈ સોલંકી બગડુ ગામ પાસે ખેતરમાં ભાગ રાખીને ખેતીકામ કરે છે. આજે તેઓ પોતાના 9 વર્ષના પુત્ર માન સોલંકી સાથે ખેતરમાં બેઠા હતા, ત્યારે અચાનક ઝાડીઓમાંથી ધસી આવેલા દીપડાએ માસૂમ બાળક પર હુમલો કર્યો હતો. દીપડો એટલો હિંસક હતો કે રવિભાઈ કઈ સમજે તે પહેલા જ તે બાળકને મોઢામાં પકડીને ખેતરની બીજી બાજુ ખેંચી ગયો હતો.
બાળકના પિતા રવિભાઈએ જણાવ્યું હતું કે, “દીપડો અચાનક આવ્યો અને મારા દીકરાને મારી નજર સામે જ ખેંચી ગયો. મેં હોબાળો મચાવતા દીપડો બાળકને મૂકીને નાસી છૂટ્યો હતો. પરંતુ ત્યાં સુધીમાં દીપડાએ મારા દીકરાના ડોક, છાતી અને વાંસાના ભાગે ગંભીર ઇજાઓ પહોંચાડી હતી. અમે તેને તાત્કાલિક લોહીલુહાણ હાલતમાં જૂનાગઢ સિવિલ હોસ્પિટલ લઈને આવ્યા છીએ.
આ હુમલા બાદ બગડુ ગામ અને આસપાસના સીમ વિસ્તારના ખેડૂતોમાં ભારે ફફડાટ જોવા મળી રહ્યો છે. વન્ય જીવો હવે દિવસે પણ ખેતરોમાં હુમલા કરી રહ્યા હોવાથી ખેતમજૂરોમાં ડરનો માહોલ છે. ભોગ બનનાર પરિવારે વન વિભાગ પાસે માંગ કરી છે કે આ નરભક્ષી બનેલા દીપડાને તાત્કાલિક પાંજરે પૂરવામાં આવે જેથી તે અન્ય કોઈ નિર્દોષનો ભોગ ન લે.
સરકાર પાસે સહાયની માંગ
ઈજાગ્રસ્ત બાળકના પિતાએ સરકાર પાસે આર્થિક સહાયની પણ માંગ કરી છે. ખેતરમાં મજૂરી કરીને ગુજરાન ચલાવતા આ પરિવાર માટે બાળકની મોંઘી સારવારનો ખર્ચ ઉઠાવવો મુશ્કેલ છે, જેથી વન વિભાગના નિયમ મુજબ વળતર અને તબીબી સહાય વહેલી તકે મળે તેવી લાગણી વ્યક્ત કરવામાં આવી છે. હાલ સિવિલ હોસ્પિટલના તબીબો બાળકની સારવાર કરી રહ્યા છે અને વન વિભાગને આ અંગે જાણ કરવામાં આવી છે.
