બુટલેગરો સાથે ભાગીદારી સહિતના અનેક મામલામાં સંડોવાયેલી નીતા ચૌધરી લાપતા થતાં પોલીસ ટેન્શનમાં
બુટલેગરો સાથે દારૂ સહિતના અનેક ધંધામાં ભાગીદાર હેડ કોન્સ્ટેબલ નીતા ચૌધરી કોર્ટમાં હાજર થવાને બદલે લાપતા થતાં પૂર્વ કચ્છ પોલીસમાં દોડધામ મચી ગઇ છે. પોલીસ તંત્રને ધબ્બો લાગે તેવી આ ઘટનામાં નીતા ચૌધરીને ભગાડવામાં જવાબદાર લોકોની શોધખોળ ચાલી રહી છે.
મળતી માહિતી મુજબ હત્યાના પ્રયાસના ગુનામાં નીતા ચૌધરીને મળેલા જામીન મંગળવારે સવારે સેશન્સ કોર્ટે રદ કરી તેને કસ્ટડીમાં લેવા પોલીસને હુકમ કર્યો હતો. જો કે કોર્ટનો હુકમ આવ્યો ત્યારે નીતા ચૌધરી કોર્ટમાં હાજર નહોતી તેની જગ્યાએ તેના વકીલ હાજર રહ્યા હતા. જેથી આદિપુરમાં આવેલી પોલીસ લાઇનમાં રહેતી નીતાના ઘરે ભચાઉ પોલીસ પહોંચી ત્યારે ઘર પર તાળુ હતું. જેથી નીતા ભૂગર્ભમાં ઉતરી ગઇ હોવાનું માલુમ પડયું હતું. નીતા ચૌધરી પાલનપુર બાજુની વતની છે. પોલીસે તેના સાસરીયે તપાસ કરી પરંતુ તેનો પતિ પણ પત્ની કયાં છે તે અંગે અજાણ છે. નીતાનો મોબાઇલ ફોન ગુના સંદર્ભે પોલીસના કબ્જામાં છે. નીતાને પકડવા માટે લોકલ ક્રાઇમ બ્રાંચ સહિતની વિવિધ પોલીસ ટીમોનું ગઠન કરવામાં આવ્યું છે. નીતાના સંભવિત સંપર્કો અને સ્થળો પર પોલીસે સર્વેલન્સ ગોઠવી દીધું છે. પરંતુ પોલીસ ખાતાની પૂર્વ કર્મચારી અને અનુભવી નીતા પોલીસને થાપ આપી ભૂગર્ભમાં ઉતરી ગઇ છે.
