– કોસ્ટ ઓફ ફન્ડસ વધવા લાગતા બેન્કોના માર્જિન પર અસર
Updated: Nov 12th, 2023
મુંબઈ : ઊંચા ધિરાણ ઉપાડ વચ્ચે દેશની બેન્કોએ વર્તમાન નાણાં વર્ષના બીજા ત્રિમાસિક ગાળામાં નફામાં વાર્ષિક ધોરણે ૩૩.૫૦ ટકા વૃદ્ધિ હાંસલ કરી છે. ખાનગી તથા જાહેર ક્ષેત્રની બેન્કોના મળીને બીજા ત્રિમાસિકમાં બેન્કોનો એકંદર નેટ પ્રોફિટ રૃપિયા ૭૭૫૬૪ કરોડ રહ્યો છે.
નેટ ઈન્ટરેસ્ટ ઈન્કમ વાર્ષિક ધોરણે ૧૭.૪૦ ટકા વધી રૃપિયા ૧૯૦૨૫૦ કરોડ રહી છે. લોન્સના નવા દર તથા ઊંચા વ્યાજ સાથે લોન્સ છૂટી કરવાની માત્રામાં વધારાને કારણે આવકમાં વૃદ્ધિ જોવા મળી હોવાનું એક બેન્કરે જણાવ્યું હતું.
જૂન ત્રિમાસિકની સરખામણીએ નેટ ઈન્ટરેસ્ટ ઈન્કમમાં ૨.૭૦ ટકા જ વધારો જોવા મળ્યો છે. ૨૨ સપ્ટેમ્બર ૨૦૨૩ સુધીમાં બેન્કોમાં ધિરાણમાં વાર્ષિક ધોરણે વીસ ટકા વધારો થયો હોવાનું રિઝર્વ બેન્કના આંકડા જણાવે છે.
માર્જિન પર અસરને કારણે આગળ જતાં બેન્કોની વ્યાજ મારફતની આવકમાં મોટો વધારો જોવા નહીં મળે.
સપ્ટેમ્બર ત્રિમાસિકમાં ખાનગી બેન્કોના નેટ પ્રોફિટમાં વાર્ષિક ધોરણે ૩૫.૫૦ ટકા વધારો થઈ ૪૩૯૨૧ કરોડ રહ્યો હતો જ્યારે જાહેર ક્ષેત્રની બેન્કોનો નેટ પ્રોફિટ ૩૧ ટકા વધી રૃપિયા ૩૩૬૪૩ કરોડ રહ્યાનું પણ પ્રાપ્ત આંકડા પરથી જણાય છે.
