કેએલ રાહુલે તોડ્યો રોહિત શર્માનો મોટો રેકોર્ડ, આ કારનામું કરનાર પ્રથમ ભારતીય

• નેધરલેન્ડ સામે કેએલ રાહુલે 102 રનની ઇનિંગ રમી
  
• વર્લ્ડકપમાં ભારત તરફથી સૌથી ઝડપી સદી
  
• કેએલ રાહુલે 62 બોલમાં 100 રન પૂર્ણ કર્યા
  

વર્લ્ડકપ 2023માં ભારત માટે વિકેટકીપર બેટ્સમેન તરીકે રમી રહેલા કેએલ રાહુલે રવિવારે નેધરલેન્ડ સામે શાનદાર બેટિંગ કરી હતી. તેણે 64 બોલમાં 102 રનની તોફાની ઇનિંગ રમી જેમાં 11 ફોર અને ચાર સિક્સનો સમાવેશ થાય છે. આ ઇનિંગમાં રાહુલે માત્ર 62 બોલમાં પોતાની સદી પૂરી કરી અને ભારત માટે એક ખાસ રેકોર્ડ બનાવ્યો હતો. તેણે આ મામલે પોતાના જ કેપ્ટન રોહિત શર્માને પાછળ છોડી દીધો હતો.

કેએલ રાહુલે રોહિત શર્માને પાછળ છોડ્યો

કેએલ રાહુલની આ સદી ODI વર્લ્ડકપના ઈતિહાસમાં ભારત માટે સૌથી ઝડપી સદી પણ છે. આ વર્ષની શરૂઆતમાં રોહિતે અફઘાનિસ્તાન સામે 63 બોલમાં સદી ફટકારીને આ રેકોર્ડ બનાવ્યો હતો. પરંતુ આ રેકોર્ડ રોહિતના નામે વધુ સમય સુધી રહી શક્યો નહીં અને હવે કેએલ રાહુલે આ રેકોર્ડ પોતાના નામે કરી લીધો છે. કેએલ રાહુલે આ ટૂર્નામેન્ટમાં પોતાની પ્રથમ સદી ફટકારી હતી. આ તેની ODI કારકિર્દીની 7મી સદી હતી.

વર્લ્ડકપમાં ભારત માટે સૌથી ઝડપી સદી

1. 62 બોલ – કેએલ રાહુલ વિ નેધરલેન્ડ, 2023 વર્લ્ડકપ
2. 63 બોલ – રોહિત શર્મા વિરુદ્ધ અફઘાનિસ્તાન, 2023 વર્લ્ડકપ
3. 81 બોલ – વીરેન્દ્ર સેહવાગ વિ બર્મુડા, 2007 વર્લ્ડકપ
4. 83 બોલ – વિરાટ કોહલી વિરુદ્ધ બાંગ્લાદેશ, 2011 વર્લ્ડકપ

ભારતે બીજી વખત 400 પ્લસનો સ્કોર

કેએલ રાહુલની આ શાનદાર ઈનિંગની મદદથી ટીમ ઈન્ડિયાએ 410 રનનો વિશાળ સ્કોર બનાવ્યો. ટીમ ઈન્ડિયાએ વર્લ્ડકપમાં બીજી વખત 400ના આંકડાને સ્પર્શ કર્યો છે. આ પહેલા ભારતે 2007માં બર્મુડા સામે 413 રન બનાવ્યા હતા. રાહુલ સિવાય શ્રેયસ અય્યરે આ ઇનિંગમાં અણનમ 128 રનની શાનદાર ઇનિંગ રમી હતી. આ સિવાય શુભમન ગિલ અને વિરાટ કોહલીએ 51-51 રન બનાવ્યા હતા. કેપ્ટન રોહિત શર્માએ પણ 61 રનની ઇનિંગ રમી હતી.