CBSE દ્વારા ધો.૧૦ અને ૧૨ની પરીક્ષાનું ટાઇમટેબલ જાહેર કરાયું
તા.૧૬ ફેબ્રુઆરીએ પ્રથમ પેપર : ૨૬ લાખથી વધુ છાત્રોનું રજીસ્ટ્રેશન
અગ્ર ગુજરાત, રાજકોટ
કેન્દ્રીય માધ્યમિક શિક્ષણ બોર્ડે ધોરણ 10 અને 12ની પરીક્ષાઓ માટે તારીખો જાહેર કરી દીધી છે. સીબીએસઈની પરીક્ષાઓ 16 ફેબ્રુઆરી 2027થી શરૂ થશે. પરીક્ષા સવારે 10:30 વાગ્યાથી શરૂ થશે. CBSE અનુસાર ધોરણ 10માં 26.25 લાખ વિદ્યાર્થીઓ અને ધોરણ 12માં 19.80 લાખ વિદ્યાર્થીઓ પરીક્ષા આપશે. આ ડેટ શીટ પરીક્ષા શરૂ થવાના 101 દિવસ પહેલા જાહેર કરવામાં આવી છે. 6 નવેમ્બરના CBSE નોટિફિકેશન અનુસાર, ધોરણ 10ના વિદ્યાર્થીઓ 83 વિષયોની પરીક્ષા આપશે. જ્યારે ધોરણ 12ના વિદ્યાર્થીઓ 121 વિષયોની પરીક્ષા આપશે.
બોર્ડે જણાવ્યું કે પરીક્ષા કાર્યક્રમ ઘણી બાબતોને ધ્યાને રાખીને તૈયાર કરવામાં આવ્યો છે. જેમાં વિદ્યાર્થીઓ દ્વારા સામાન્ય રીતે એક સાથે પસંદ કરાનાર વિષયોના પેપરો વચ્ચેનું અંતર, મુખ્ય પ્રવેશ પરીક્ષાઓનું શેડ્યૂલ અને દરેક પરીક્ષા કેન્દ્ર પર સામેલ થનાર પરીક્ષાર્થીઓની સંખ્યાને ધ્યાને લેવાઈ છે.
CBSE તરફથી જાહેર કાર્યક્રમ અનુસાર, 10માં અને 12માંની પરીક્ષાઓ 16 ફેબ્રુઆરી 2027થી શરૂ થશે. તમામ પેપર સવારે 10:30 વાગ્યાથી લેવામાં આવશે. વિદ્યાર્થીઓને સલાહ છે કે, તેઓ પોતાના ધોરણની આખી ડેટશીટ ધ્યાનથી જોઈ લે અને દરેક વિષયની પરીક્ષાની તારીખો નોંધી લે. તેનાથી અંતિમ સમયે કોઈપણ ગૂંચવણથી બચી શકાય.
આ વખતે ધોરણ 10માના વિદ્યાર્થીઓ માટે 83 વિષયોની પરીક્ષા લેવાશે. જ્યારે 12માના વિદ્યાર્થીઓ 121 વિષયોની માટે પરીક્ષા આપશે. બોર્ડ અનુસાર ડેટશીટ તૈયાર કરતી વખતે 40 હજારથી વધુ વિષય સંયોજનોનું ધ્યાન રાખવામાં આવ્યું છે. જેનું કારણ એ છે કે, અલગ અલગ વિષય પસંદ કરનાર વિદ્યાર્થીઓની પરીક્ષાએ એક જ દિવસે ન આવે. બોર્ડનું શેડ્યૂલ બનાવતી વખતે એ વાતનું ધ્યાન રાખવાનું છે કે વિદ્યાર્થીઓને પરીક્ષા ટાણે કોઈપણ પ્રકારની સમસ્યાનો સામનો કરવો ન પડે.
CBSEના આંકડાઓ અનુસાર, ધોરણ 10ની બોર્ડ પરીક્ષા માટે 26.5 લાખથી વધુ વિદ્યાર્થીઓએ રજિસ્ટ્રેશન કરાવ્યું છે. જ્યારે ધોરણ 12ની પરીક્ષા માટે 19.8 લાખથી વધુ વિદ્યાર્થીઓએ રજિસ્ટ્રેશન કરાવ્યું છે. એટલે કે બંને ક્લાસ મળીને મોટી સંખ્યામાં વિદ્યાર્થીઓ પરીક્ષામાં સામેલ થશે. એવામાં ડેટશીટ જાહેર થયા પછી વિદ્યાર્થીઓ પાસે પોતાની તૈયારીને અંતિમ રૂપ આપવા માટે પૂરતો સમય છે.
