- દેશમાં ફરી એકવાર કોરોના કેસમાં સતત વધારો
- 24 કલાકમાં કોરોના વાયરસના 756 નવા કેસ
- અત્યાર સુધીમાં 12 રાજ્યમાં JN.1 વાયરસનો પગ પેસારો
દેશમાં ફરી એકવાર કોરોના વાયરસ કહેર મચાવી રહ્યો છે. કોરના સંક્રમણની સંખ્યામાં સતત વધારો થઈ રહ્યો છે. કોરોના ફરી લોકોમાં ભય પેદા કરી રહ્યો છે. સ્વાસ્થ્ય મંત્રાલયના નવા આંકડા પર નજર કરીએ તો એક્ટિવ કેસ 4 હજારને વટાવી ગયા છે. આ સાથે કોરોના JN.1નું નવું સ્વરૂપ પણ ઝડપથી ફેલાઈ રહ્યું છે.
કેન્દ્રીય સ્વાસ્થ્ય મંત્રાલયના જણાવ્યા અનુસાર, દેશમાં છેલ્લા 24 કલાકમાં કોરોના વાયરસના 756 નવા કેસ નોંધાયા છે, જ્યારે કોવિડને કારણે 5 લોકોના મોત થયા છે. કેરળ અને મહારાષ્ટ્રમાં બે-બે અને જમ્મુ-કાશ્મીરમાં એક દર્દીનું મોત થયું છે. આ ઉપરાંત, સક્રિય કેસોની સંખ્યા પણ 4,049 પર પહોંચી ગઈ છે. નવા વર્ષથી કોવિડના નવા કેસ સતત વધી રહ્યા છે.
કર્ણાટકમાં સૌથી વધુ જેએન.1 કેસ છે
તમને જણાવી દઈએ કે કોરોના વાયરસ JN.1 વાયરસનું નવું સ્વરૂપ પણ દેશમાં ઝડપથી ફેલાઈ રહ્યું છે. અત્યાર સુધીમાં 12 રાજ્યો તેનાથી પ્રભાવિત થયા છે અને 4 જાન્યુઆરી સુધી કુલ 619 કેસ નોંધાયા છે. કર્ણાટક નવા પ્રકારથી સૌથી વધુ પ્રભાવિત છે, જ્યાં JN.1 ના 199 કેસ નોંધાયા છે. સાથે જ કેરળ અને મહારાષ્ટ્રમાં સંક્રમિત દર્દીઓની સંખ્યા 100ને વટાવી ગઈ છે.
