- સાઇબર ક્રાઇમે IPC અને IT એક્ટ હેઠળ ગુનો નોંધ્યો
- બધી જ સ્કૂલોની એક જ ફરિયાદ નોંધવામાં આવી
- સાઇબર ક્રાઈમે તમામ ઇમેઇલ મંગાવી તપાસ શરૂ કરી
આજે લોકસભા ચૂંટણીના મતદાનના એક દિવસ પહેલા અમદાવાદની 25 જેટલી સ્કૂલોને બોમ્બથી ઉડાવી દેવાની ધમકી આપતા ઈમેલ મળ્યા હતા. જેને લઈને સ્કૂલ સંચાલકોમાં ફફડાટ ફેલાયો હતો. ધમકીને લઈને સ્કૂલો દ્વારા શહેર પોલીસને જાણ કરવામાં આવી હતી. ત્યારે હવે આ મામલે મોટા સમાચાર મળી રહ્યા છે. આ કેસમાં સાયબર ક્રાઇમ દ્વારા ગુનો દાખલ કરવામાં આવ્યો છે. સાયબર ક્રાઇમ દ્વારા IPC અને IT એક્ટ હેઠળ ગુનો નોંધ્યો છે. ત્યારે મહત્વનું છે કે બધી જ સ્કૂલોની એક જ ફરિયાદ દાખલ કરવામાં આવી હતી. તમામ ઇમેઇલ સાઇબર ક્રાઈમે મંગાવી તપાસ કરતા ડોમીન આઇડી એક જ હોવાનુ સામે આવ્યુ છે. સમગ્ર મામલે સાયબર ક્રાઇમે વધુ તપાસ શરૂ કરી છે.
ધમકી મળનાર સ્કૂલો માંથી 11 સ્કૂલમાં મતદાન મથક
અમદાવાદની કુલ 25 શાળાઓને મેલથી ધમકી મળી હતી. જેમાં અમદાવાદ શહેરની 12 શાળા, ગ્રામ્યની 4 શાળાને ધમકી મળી છે. તેમાં રશિયન ડોમેઇનથી બોમ્બથી ઉડાવી દેવાની ધમકી અપાઇ હતી. તેમાં 14 શાળાઓમાં ચેકિંગ પૂર્ણ કરાયું છે. જેમાં પોલીસે જણાવ્યું છે કે અત્યાર સુધી કંઇ શંકાસ્પદ મળ્યુ નથી. વાલીઓ, વિદ્યાર્થીઓએ ગભરાવવાની જરૂર નથી. ધમકી મળનાર 12માંથી 11 સ્કૂલમાં મતદાન મથક છે.
શંકાસ્પદ વસ્તુ ન મળતા પોલીસે રાહતનો શ્વાસ લીધો
અમદાવાદમાં સ્કૂલોને બોમ્બથી ઉડાવી દેવાની ધમકીમાં ઘાટલોડિયાની અમૃતા સ્કૂલ, ONGC કેન્દ્રીય વિદ્યાલય, શાહીબાગની આર્મી કેન્ટોનમેન્ટ સ્કૂલ, સેટેલાઇટની આનંદ નિકેતન, બોપલ DPS સ્કૂલ તથા ડ્રાઇવ ઇન રોડ પર આવેલી એશિયન સ્કૂલને ધમકી મળી છે. તેમાં ધમકી વાળી સ્કૂલો પર પોલીસે જઈ ચેકિંગ હાથ ધર્યું છે. તેમજ બોમ્બ ડિસ્પોઝલ સ્કવોડ પણ સ્કૂલોમાં પહોંચી છે. હાલ ક્યાંયથી કોઈ વાંધાજનક વસ્તુઓ મળી નથી, જેમાં શંકાસ્પદ વસ્તુ ન મળતા પોલીસે રાહતનો શ્વાસ લીધો છે. ગૃહમંત્રાલયે જણાવ્યુ છે કે બોમ્બ મળ્યાની ધમકી અફવા છે. રશિયન સર્વરમાંથી ધમકી આવ્યાનું અનુમાન છે. દિલ્હીની માફક એક પછી એક સ્કૂલમાં મેલ આવી રહ્યા છે. જેમાં SPGની ટીમ નિશાન સ્કૂલમાં પહોંચી છે.
દિલ્હીની માફક એક પછી એક સ્કૂલમાં મેલ આવી રહ્યા છે
દિલ્હીની માફક એક પછી એક સ્કૂલમાં મેલ આવી રહ્યા છે. અગાઉ દિલ્હી અને નોઈડાની ઘણી સ્કૂલોમાં ધમકીભર્યા ઇમેઇલ મોકલવામાં આવ્યા હતા, જેમાં આ સ્કૂલોમાં બોમ્બ મૂકવાના સમાચારે હડકંપ મચાવી દીધો હતો. જેમાં નોઈડાની ડીપીએસ સિવાય દ્વારકાની ડીપીએસ, મયુર વિહારની મધર મેરી સ્કૂલ અને નવી દિલ્હીની સંસ્કૃતિ સ્કૂલ જેવી હાઈપ્રોફાઈલ સ્કૂલોનો સમાવેશ થયો હતો. જો કે થોડી વાર પછી ગૃહ મંત્રાલયે આ ધમકીને અફવા ગણાવી હતી.
