- કુલ 41 લોકોને હીટસ્ટ્રોક આવતા કરાયા હતા દાખલ
- 41 પૈકી 2 વ્યક્તિના હીટસ્ટ્રોકના કારણે મોત
- આરોગ્ય વિભાગે બંનેના મોતના કેસની વિગતો મંગાવી
સમગ્ર રાજ્યમાં છેલ્લા 3-4 દિવસથી કાળઝાળ ગરમી પડી રહી છે. એટલું જ નહિ અમદાવાદમાં ગરમીએ ગઇકાલે છેલ્લા 8 વર્ષનો રેકોર્ડ પણ તોડી દીધો છે. લોકોને એટલી હદે હીટવેવની અસર થઈ રહી છે કે સરકાર દ્વારા જાહેર સ્થળોએ ORS અને પીવાના પાણીની વ્યવસ્થા ઉભી કરવી પડી રહી છે તો હીટવેવને લઈને વધુ એક ચોંકાવનારી વાત સામે આવી છે. અમદાવાદ સિવિલ હોસ્પિટલમાં હિટસ્ટ્રોકને કારણે 2 લોકોના મોત થયા છે.
હિટસ્ટ્રોકને કારણે 41 દાખલ, 2ના મોત
રાજ્યમાં પહેલીવાર અમદાવાદમાં હિટસ્ટ્રોકથી બેના મોત થાય હોવાનું સામે આવ્યું છે. મળતી માહિતી મુજબ, અમદાવાદ સિવિલ હોસ્પિટલ ખાતે હિટસ્ટ્રોકને કારણે બીમાર પડેલા લોકોનો આંકડો સતત વધી રહ્યો છે. આજે અમદાવાદ સિવિલ હોસ્પિટલમાં હિટસ્ટ્રોકના કારણે 41 લોકોને 108 મારફતે દાખલ કરવામાં આવ્યા હતા. તો આજે દાખલ કરવામાં આવેલ 41 લોકો પૈકી 2 લોકોનું હિટસ્ટ્રોકને કારણે મૃત્યુ થયું છે.
આરોગ્ય વિભાગ થયું દોડતું
તો, અમદાવાદમાં હિટસ્ટ્રોકને કારણે પહેલીવાર મોત થતાં ચકચાર મચી ગઈ છે. આજે હિટસ્ટ્રોકને કારણે થયેલ 2 મોતને લઈને આરોગ્ય વિભાગ અને વહીવટી તંત્ર પણ સતર્ક થઈ ગયું છે. તો, આરોગ્ય વિભાગ દ્વારા બંને મોતના કેસની વિગતો પણ અમદાવાદ સિવિલ હોસ્પિટલ પાસેથી મંગાવવામાં આવી છે.
હિટસ્ટ્રોકના કેસમાં આવ્યો ઉછાળો
ગરમીને કારણે અમદાવાદીઓના આરોગ્યને અસર થઈ રહી હોય તેમ જોવા મળી રહ્યું છે. અસારવા સિવિલ હોસ્પિટલમાં હિટસ્ટ્રોક વોર્ડ દર્દીઓથી ઉભરાઇ રહ્યો છે. ગઈકાલે દર્દીઓની સંખ્યા વધતા તાત્કાલિક અન્ય વ્યવસ્થા ઊભી કરાઈ હતી. રેડ અલર્ટને જોતાં લોકોમાં હિટસ્ટ્રોકની સમસ્યા વધી રહી છે. બપોરના સમયે બહાર નીકળતા લોકોમાં હિટસ્ટ્રોકની અસર વધી છે. જેમાં સતત બે દિવસથી કેસમાં ઉછાળો આવ્યો છે.
લૂ લાગવા, માથુ દુખવુ, બેભાન થઇ જવા જેવા લક્ષણો સામે આવ્યા
લૂ લાગવા, માથુ દુખવુ, બેભાન થઇ જવા જેવા લક્ષણો સામે આવ્યા છે. હિટ સ્ટ્રોકના બે દિવસમાં સિવિલ હોસ્પિટલમાં 41 દર્દીઓ દાખલ થયા છે. તેમાં 41માંથી 10 દર્દીઓની સ્થિતિ સીરિયસ છે. જેમાં ગરમીના કારણે સાંજના સમયે હિટ સ્ટ્રોકના કેસ વધુ જોવા મળ્યા છે. અમદાવાદમાં આજે અને આવતીકાલે રેડ એલર્ટ જાહેર કરવામાં આવ્યું છે. ગુજરાતના અનેક શહેરોમાં છેલ્લા ચાર દિવસથી ગરમીનો પારો 45 ડિગ્રીની આસપાસ નોંધાઈ રહ્યો છે. ગુજરાતમાં રાત્રીનું તાપમાન પણ વિક્રમજનક નોંધાઈ રહ્યું છે. સાથોસાથ ભેજનું પ્રમાણ નહીંવત કહેવાય તેટલું નોંધાતા અસહ્ય ગરમીનો અનુભવ થઈ રહ્યો છે.
સમગ્ર રાજ્યમાં સૌથી વધુ ગરમી અમદાવાદમાં નોંધાઈ
ગરમીના પારાની વાત કરીએ તો સમગ્ર રાજ્યમાં સૌથી વધુ ગરમી અમદાવાદમાં નોંધાઈ છે. અમદાવાદમાં ગરમીનો પારો 45.9 ડિગ્રી પર પહોંચી ગયો છે. આ સાથે અમદાવાદ રાજ્યનું સૌથી ગરમ શહેર બન્યું હતું. સુરેન્દ્રનગરમાં 45.8 ડિગ્રી તાપમાન નોંધાયું હતું, જ્યારે ગાંધીનગરમાં 45.7 ડિગ્રી તાપમાન નોંધાયું હતું. અમદાવાદની અસારવા સિવિલ હોસ્પિટલના હીટ સ્ટ્રોક વોર્ડમાં પાંચ દર્દીઓને દાખલ કરવામાં આવ્યા છે, ગુરુવારે 108 ઈમરજન્સી એમ્બ્યુલન્સ મારફત પાંચ દર્દીઓને સિવિલ ખાતે લવાયા હતા. આ સિઝનમાં પહેલી વાર દર્દીઓને દાખલ કરવા પડયા છે. અગાઉ પણ દર્દીઓ સારવાર માટે આવ્યા છે પરંતુ ઓપીડી બેઝ ઉપર જરૂરી સારવાર આપવામાં આવી હતી. ભારે ગરમીના કારણે લૂની અસર થતાં હાલ પાંચ દર્દી હીટ સ્ટ્રોક વોર્ડમાં સારવાર લઈ રહ્યા છે. ગરમીના કારણે ચક્કર ખાઈને પડી જવા તેમજ ભારે તાવના કેસનું પ્રમાણ વધી રહ્યું છે.
