વર્લ્ડ ટેસ્ટ ચેમ્પિયનશિપનો બીજો દિવસ પણ ફાસ્ટ બોલરોને નામે રહ્યો. 43/4 ના સ્કોર પર બેટિંગ કરવા ઉતરેલી સાઉથ આફ્રિકાની આખી ટીમ પ્રથમ ઈનિંગમાં 138 રન બનાવીને ઓલઆઈચ થઈ ગઈ. કાંગારૂ કેપ્ટન પેટ કમિન્સે જોરદાર ધૂમ મચાવી અને 6 વિકેટ લીધી.
પેટ કમિન્સ WTC ફાઈનલની એક ઈનિંગમાં 6 વિકેટ લેનાર પ્રથમ બોલર બન્યો. પ્રથમ ઈનિંગના આધારે ઓસ્ટ્રેલિયાએ 74 રનની લીડ મેળવી. પરંતુ બીજા ઇનિંગમાં કાંગારૂ બેટ્સમેનોએ પણ સાઉથ આફ્રિકાના ફાસ્ટ બોલરો સામે સંપૂર્ણપણે શરણાગતિ સ્વીકારી લીધી. દિવસની રમતના અંત સુધીમાં ઓસ્ટ્રેલિયાએ બીજા ઈનિંગમાં 8 વિકેટ ગુમાવીને 144 રન બનાવી લીધા છે. ટીમની કુલ લીડ 218 રન પર પહોંચી ગઈ છે.
ઓસ્ટ્રેલિયન બેટ્સમેન રન બનાવવામાં રહ્યા નિષ્ફળ
સાઉથ આફ્રિકાને પહેલી ઈનિંગમાં 138 રન પર ઓલઆઉટ કર્યા બાદ બીજી ઈનિંગમાં પણ કાંગારૂ બેટ્સમેન રન માટે ખૂબ જ ઉત્સુક દેખાતા હતા. ઉસ્માન ખ્વાજા ફરી એકવાર તેના પ્રદર્શનથી નિરાશ થયા અને તે ફક્ત 6 રન બનાવીને આઉટ થયો. કેમરૂન ગ્રીનને કાગિસો રબાડાએ ખાતું ખોલાવ્યા વિના પેવેલિયન પરત મોકલ્યો. માર્નસ લાબુશેને કેટલાક સારા શોટ રમ્યા, પરંતુ તે 22 રન બનાવીને ફરીથી માર્કો યાન્સેનનો શિકાર બન્યો. પહેલી ઈનિંગમાં અડધી સદી ફટકારનાર સ્ટીવ સ્મિથ માત્ર 13 રન બનાવીને આઉટ થયો.
ટ્રેવિસ હેડ વિઆન મુલ્ડરના શાનદાર બોલથી ક્લીન બોલ્ડ થયો. વેબસ્ટર અને કેપ્ટન પેટ કમિન્સ પણ બેટિંગથી કંઈ ખાસ કરી શક્યા નહીં. એલેક્સ કેરીએ શાનદાર બેટિંગ કરી અને મુશ્કેલ પરિસ્થિતિઓમાં 43 રનની મજબૂત ઈનિંગ રમી, પરંતુ દિવસની રમત સમાપ્ત થાય તે પહેલાં કાગિસો રબાડા દ્વારા તેને આઉટ કરવામાં આવ્યો. દિવસની રમતના અંતે, નાથન લાયન 1 રન અને મિચેલ સ્ટાર્ક 16 રન સાથે રમી રહ્યા છે. કાગિસો રબાડા અને લુંગી એનગિડીએ 3-3 વિકેટ લીધી.
પેટ કમિન્સે મચાવી ધૂમ
બીજા દિવસની શરૂઆત સાઉથ આફ્રિકા માટે સારી રહી અને ટેમ્બા બાવુમા અને ડેવિડ બેડિંગહામે અડધી સદીની પાર્ટનરશિપ કરી. પેટ કમિન્સે પોતાના ઘાતક સ્પેલથી સાઉથ આફ્રિકાના બેટિંગ ઓર્ડરને ધ્વસ્ત કર્યો. કાંગારૂ કેપ્ટન પહેલા ટેમ્બા બાવુમાની 36 રનની ઈનિંગનો અંત લાવ્યો. આ પછી કાયલ વેરેન પણ માત્ર 13 રન બનાવીને આઉટ થયો.
પેટ કમિન્સે માર્કો યાન્સનને ખાતું ખોલવાની પણ તક આપી ન હતી અને તેને શૂન્ય પર પેવેલિયન મોકલી દીધો હતો. પેટ કમિન્સે સાઉથ આફ્રિકા માટે એકલા લડી રહેલા ડેવિડ બેડિંગહામને પણ પોતાનો શિકાર બનાવ્યો હતો. કાગિસો રબાડાને 1 રનના સ્કોર પર આઉટ કરવાની સાથે પેટ કમિન્સે સમગ્ર સાઉથ આફ્રિકાની ટીમને ફક્ત 138 રનમાં ઓલઆઉટ કરી દીધી હતી. પેટ કમિન્સે માત્ર 28 રનમાં 6 વિકેટ લીધી હતી, જ્યારે મિચેલ સ્ટાર્કે બે વિકેટ લીધી હતી.
