જ્યારે ભારતીય મહિલા બ્લાઇન્ડ ક્રિકેટ ટીમે કોલંબોથી ટ્રોફી ઉપાડી અને પ્રથમ T20 વર્લ્ડ કપ જીત્યો,ત્યારે સમગ્ર દેશ ગર્વથી ભરાઈ ગયો હતો.પરંતુ બહુ ઓછા લોકો જાણે છે કે આ ઐતિહાસિક જીત પાછળના ખેલાડીઓને પ્રતિ મેચ કેટલી રકમ મળે છે.આઘાતજનક રીતે,ભારતીય બ્લાઇન્ડ ક્રિકેટ ટીમને હજુ પણ BCCI દ્વારા માન્યતા આપવામાં આવી નથી.આનો અર્થ એ થયો કે આ ખેલાડીઓ તેમની મેચ ફી BCCI પાસેથી નહીં, પરંતુ એક ખાનગી ટ્રસ્ટ અને કેટલાક પ્રાયોજકો પાસેથી મેળવે છે.
બ્લાઇન્ડ ક્રિકેટરોને BCCI નથી ચુકવતી કોઈ ફી
હા,તમે બરાબર વાંચ્યું છે. એક એવા દેશમાં જ્યાં ક્રિકેટનું સન્માન કરવામાં આવે છે અને ક્રિકેટરોને ભગવાન માનવામાં આવે છે.ત્યાં બ્લાઇન્ડ ક્રિકેટ અને બ્લાઇન્ડ ક્રિકેટરો અંધેરામાં ધકેલાઈ જાય છે.ભારતીય ક્રિકેટ કંટ્રોલ બોર્ડ વિશ્વનું સૌથી ધનિક બોર્ડ છે,જે તેના ખેલાડીઓને ટેસ્ટ મેચ માટે 15 લાખ રૂપિયા,વનડે માટે 6 લાખ રૂપિયા અને T20 મેચ માટે 3 લાખ રૂપિયા ચૂકવે છે.તે જ દેશમાં બ્લાઇન્ડ ક્રિકેટ ટીમની મેચ ફી ફક્ત હજારોમાં છે.
બ્લાઇન્ડ ક્રિકેટરોની મેચ ફી કેટલી છે?
મીડિયા રિપોર્ટ્સ અનુસાર બ્લાઇન્ડ ક્રિકેટ ટીમના ખેલાડીઓને મેચ ફી તરીકે ફક્ત 3,000 રૂપિયા મળે છે.આ ફક્ત બ્લાઇન્ડ મહિલા ટીમ સાથે જ નહીં,પણ બ્લાઇન્ડ પુરુષોની ટીમ સાથે પણ થાય છે.આ ખેલાડીઓ અંધારામાં રમીને પ્રકાશ ફેલાવે છે,તેથી આશા છે કે આ ઐતિહાસિક જીત પછી,તેમને તે પ્રકાશ મળશે જેને તેઓ લાયક હતા.
ખેલાડીઓના જુસ્સાને સલામ
BCCIદ્વારા બ્લાઇન્ડ ક્રિકેટને સત્તાવાર માન્યતા ન મળવાનો અર્થ એ છે કે બ્લાઇન્ડ ખેલાડીઓ ફક્ત તેમના જુસ્સા પર આધાર રાખે છે, જ્યારે ક્રિકેટ એસોસિએશન ફોર ધ બ્લાઇન્ડ ઇન ઇન્ડિયા (CABI) અને કેટલાક ઉદાર સ્પોન્સર બધો ખર્ચ ઉઠાવે છે.વિદેશી ટુર્નામેન્ટ્સ,કિટ્સ અને ટ્રેનિંગ કેમ્પ આ દાન અને સમર્થન પર આધાર રાખે છે.દરમિયાન,પાકિસ્તાન ક્રિકેટ બોર્ડ તેના બ્લાઇન્ડ ક્રિકેટરોને સેન્ટ્રલ કોન્ટ્રાક્ટ આપે છે. ઓસ્ટ્રેલિયા, ઈંગ્લેન્ડ, શ્રીલંકા, બાંગ્લાદેશ, ન્યુઝીલેન્ડ અને ઝિમ્બાબ્વે જેવા દેશોએ પણ બ્લાઇન્ડ ક્રિકેટને માન્યતા આપી છે.
વર્લ્ડ ચેમ્પિયન ટીમને ફક્ત 1 લાખ રૂપિયા ઇનામ
પ્રશ્ન ફક્ત પૈસાનો નથી, આદર અને સમાનતાનો છે.જ્યારે કોઈ નેશનલ ટીમ વર્લ્ડ ચેમ્પિયન બને છે, ત્યારે શું તેની જીતને તાળીઓ સુધી મર્યાદિત રાખવી વાજબી છે? દરેક વર્લ્ડ કપ વિજેતા ખેલાડી ફક્ત ટ્રોફી કરતાં વધુનું સ્વપ્ન જુએ છે, તેઓ વધુ સારા જીવન અને સામાજિક સન્માનનું સ્વપ્ન જુએ છે. તમને એ જાણીને આશ્ચર્ય થશે કે 2025 માં બ્લાઇન્ડ માટે મહિલા T20 વર્લ્ડ કપ ક્રિકેટ જીતનાર ભારતીય ટીમને ઇનામની રકમમાં ફક્ત 1 લાખ રૂપિયા મળ્યા હતા અને તે પણ ચિન્ટેલ્સ ગ્રુપ તરફથી.
એક પણ મેચ હાર્યા વિના વર્લ્ડ કપ જીત્યો
ભારતીય મહિલા બ્લાઇન્ડ ક્રિકેટ ટીમને કદાચ સમર્થનનો અભાવ હોય શકે છે,પરંતુ તેમની પ્રતિભા કોઈથી ઓછી નથી.બ્લાઇન્ડ મહિલા T20 વર્લ્ડ કપમાં ભારત એકમાત્ર ટીમ હતી જે અજેય રહી હતી.તેઓએ સાત મેચ રમી અને બધી મેચ જીતીને ચેમ્પિયન બની.આ દરમિયાન તેઓએ ઓસ્ટ્રેલિયા અને પાકિસ્તાન જેવી ટીમોને પણ હરાવી.
