ભારતીય મહિલા હોકી ટીમનામુખ્ય કોચ હરેન્દ્ર સિંહે રાજીનામું આપી દીધું. સિંહે વ્યક્તિગત કારણો દર્શાવીને તાત્કાલિક અસરથી ટીમમાંથી રાજીનામું આપી દીધું છે. હોકી ઇન્ડિયાએ આ સમાચારની પુષ્ટિ કરતા જણાવ્યું હતું કે ભારતીય હોકી ટીમના કોચે વ્યક્તિગત કારણોસર રાજીનામું આપ્યું છે. હરેન્દ્ર સિંહે એપ્રિલ 2024 માં આ પદ સંભાળ્યું હતું અને 2028 લોસ એન્જલસ ઓલિમ્પિક સુધી ટીમ સાથે રહેવાની અપેક્ષા હતી, પરંતુ તેમણે અધવચ્ચે જ છોડી દીધું.
હરેન્દ્ર સિંહે પોતાના રાજીનામા અંગે શું કહ્યું?
હરેન્દ્ર સિંહે પોતાના રાજીનામા અંગે મીડિયા રિલીઝ જારી કરી. તેમણે રિલીઝમાં જણાવ્યું હતું કે, “ભારતીય મહિલા હોકી ટીમના કોચ બનવું એ મારી કારકિર્દીની એક મોટી સિદ્ધિ રહી છે. મેં વ્યક્તિગત કારણોસર રાજીનામું આપવાનો નિર્ણય લીધો છે, પરંતુ મારું હૃદય હંમેશા આ અદ્ભુત ટીમ સાથે રહેશે. હોકી ઇન્ડિયા સાથેની મારી સફર મારા માટે ખાસ રહેશે, અને હું ભારતીય હોકીને ઉચ્ચતમ સ્તર પર પહોંચાડવાના તેમના પ્રયાસોને સમર્થન આપતો રહીશ.” હોકી ઇન્ડિયાના સૂત્રોના જણાવ્યા અનુસાર, હરેન્દ્ર સિંહે નબળા પરિણામોને કારણે રાજીનામું આપ્યું. ફિટનેસ પણ એક મુખ્ય મુદ્દો રહ્યો છે, કારણ કે ટીમના ઘણા મુખ્ય ખેલાડીઓ ઘાયલ છે.
હોકી ટીમનું પ્રદર્શન છેલ્લા એક વર્ષમાં નિરાશાજનક
FIH પ્રો લીગ 2024-25 માં, ભારતીય ટીમે 16 માંથી ફક્ત બે મેચ જીતી, ત્રણ ડ્રો કરી અને 11 હારનો સામનો કરવો પડ્યો. ભારતીય ટીમ નવ ટીમોના સ્ટેન્ડિંગમાં 10 પોઈન્ટ સાથે છેલ્લા સ્થાને રહી અને આગામી સીઝન માટે ક્વોલિફાય થવામાં નિષ્ફળ રહી. ભારતે નવેમ્બરમાં રાજગીરમાં એશિયન ચેમ્પિયન્સ ટ્રોફી જીતી હતી, પરંતુ ટુર્નામેન્ટમાં જાપાન અને કોરિયાની B ટીમો હતી. એશિયા કપ ફાઇનલમાં હાર્યા બાદ, ભારતીય ટીમ સીધા વર્લ્ડ કપ માટે ક્વોલિફાય થઈ શકી ન હતી અને હવે તેને ક્વોલિફાયરમાં રમવું પડશે. અહેવાલો સૂચવે છે કે 2020 ટોક્યો ઓલિમ્પિકમાં ટીમને શાનદાર પ્રદર્શન તરફ દોરી જનાર કોચ સોર્ડ મારિજને આ પદ પર પાછા આવી શકે છે.
