BCCIએ નવા વર્ષ પહેલા ભારતની સ્થાનિક મહિલા ક્રિકેટરોને એક ખાસ ભેટ આપી છે. તાજેતરમાં જ તેની એપેક્સ કાઉન્સિલની બેઠકમાં BCCIએ સ્થાનિક મહિલા ક્રિકેટરોની મેચ ફી વધારવાનો નિર્ણય લીધો છે.
હવે ખેલાડીઓનો પગાર બમણો થઈ ગયો છે. મહિલા ક્રિકેટના હિતમાં આ એક સારું પગલું છે. તાજેતરમાં ભારતીય મહિલા ક્રિકેટ ટીમે સાઉથ આફ્રિકાને હરાવીને મહિલા ODI વર્લ્ડકપનો ખિતાબ જીત્યો હતો. ત્યારથી મહિલા ખેલાડીઓ ખૂબ ધ્યાન ખેંચી રહી છે.
ઘરેલુ મહિલા ક્રિકેટરોને ખૂબ ઓછા પૈસા મળતા હતા
અત્યાર સુધી મહિલા ક્રિકેટરોને ઘરેલુ ટુર્નામેન્ટમાં ખૂબ જ ઓછી મેચ ફી મળતી હતી. સિનિયર મહિલા ટુર્નામેન્ટમાં પ્લેઈંગ ઈલેવનમાં ખેલાડીઓને દરરોજ 20,000 રૂપિયા મળતા હતા, જ્યારે રિઝર્વ ખેલાડીઓને 10,000 રૂપિયા મળતા હતા. જુનિયર ટીમમાં પ્લેઈંગ ઈલેવનમાં ખેલાડીઓને દરરોજ 10,000 રૂપિયા મળતા હતા, જ્યારે રિઝર્વ ખેલાડીઓને 5,000 રૂપિયા મળતા હતા. પરંતુ T20 ટુર્નામેન્ટમાં આ રકમ તેનાથી પણ ઓછી હોય છે. આ વાતને ધ્યાનમાં રાખીને BCCIએ આ મહત્વપૂર્ણ પગલું ભર્યું છે.
નવા પગાર માળખાથી ખેલાડીઓને ઘણો ફાયદો થશે
નવા પગાર માળખા મુજબ સિનિયર મહિલા ટુર્નામેન્ટમાં પ્લેઈંગ ઈલેવનમાં સામેલ ખેલાડીઓને હવે દરરોજ 50,000 રૂપિયા મળશે, જ્યારે રિઝર્વ ખેલાડીઓને 25,000 રૂપિયા મળશે. T20 મેચો માટે પણ પગારમાં વધારો કરવામાં આવ્યો છે, જેમાં પ્લેઈંગ ઈલેવનમાં સામેલ ખેલાડીઓને 25,000 રૂપિયા અને રિઝર્વ ખેલાડીઓને 12,500 રૂપિયા મળશે.
જુનિયર ટુર્નામેન્ટમાં પ્લેઈંગ ઈલેવનમાં સામેલ ખેલાડીઓને 25,000 રૂપિયા અને રિઝર્વ ખેલાડીઓને 12,500 રૂપિયા મળશે. પરિણામે સ્થાનિક ક્રિકેટમાં મહિલા ખેલાડીઓનો પગાર બમણાથી વધુ થઈ ગયો છે.
એમ્પાયરો અને મેચ રેફરીઓને પણ થશે ફાયદો
આ સિવાય સ્થાનિક ક્રિકેટમાં મેચ અધિકારીઓ, જેમાં એમ્પાયર અને મેચ રેફરીનો સમાવેશ થાય છે, તેમને પણ આ નવી ફી માળખાનો લાભ મળશે. સ્થાનિક ટુર્નામેન્ટમાં લીગ મેચો માટે એમ્પાયર અને મેચ રેફરીઓને દરરોજ 40,000 રૂપિયા મળશે. નોકઆઉટ મેચો માટે દૈનિક મેચ ફી કાર્યકારી જરૂરિયાતોના આધારે નક્કી કરવામાં આવશે. મેચ અધિકારીઓને તે દિવસ માટે આશરે 50,000 રૂપિયાથી 60,000 રૂપિયા મળશે.
આ પણ વાંચો: Virat Kohliએ વિજય હજારે ટ્રોફીમાં કેવું કર્યું છે પ્રદર્શન? જાણો
