વિજાપુરમાં એક ઇંચ, હિંમતનગરમાં અડધો ઇંચ વરસાદ પડયો
મધ્ય, ઉત્તર ગુજરાત અને ચરોતરમાં માવઠું : ડાકોર અને નડિયાદમાં મીની વાવાઝોડું : ગરમીથી બચવા લગાવેલી નેટ અને છાપરા ભારે પવનથી ઉડયા
ભાવેણા પંથકમાં ગાજવીજ સાથે વરસાદ ખાબકયો : ભરઉનાળે આવેલા પલટાએ ખેડૂતોની ચિંતામાં વધારો કર્યો
અગ્ર ગુજરાત, વડોદરા
ઉત્તર ગુજરાતમાં ભરઉનાળે ચોમાસુ માહોલ સર્જાયો હોય તેમ એક ઇંચ સુધી વરસાદ વરસ્યો હતો. જેમાં સૌથી વધુ વિજાપુર પંથકમાં ૨૭ મીમી વરસાદથી તમાકુના ખેડૂતોને નુકસાન ભોગવવાનો વારો આવ્યો છે. મહેસાણા જિલ્લાના અન્ય તાલુકાઓમાં પણ અચાનક વરસાદ પડતાં લોકોમાં દોડધામ મચી હતી. આ ઉપરાંત સાબરકાંઠાના હિંમતનગર ૧૨ મીમી વરસાદ વરસ્યો હતો.
વડોદરા શહેર-જિલ્લા સહિત પંચમહાલ, દાહોદ, છોટાઉદેપુર, મહીસાગર ઉપરાંત ભરૂચ અને નર્મદા જિલ્લામાં વીજળીના કડાકા-ભડાકા સાથે ઝાપટાંરૂપે કમોસમી વરસાદ શરૂ થયો હતો. ખેડા જિલ્લામાં નડિયાદ અને ડાકોર સહિતના વિસ્તારોમાં મિની વાવાઝોડા જેવી સ્થિતિ જોવા મળી હતી. ડાકોરના મુખ્ય બજારમાં ગરમીથી બચવા માટે લગાવેલી નેટ અને છાપરા ભારે પવનના વેગમાં ઉડી ગયા હતા. ભાવનગર શહેરમાં ગાજવીજ અને પવન સાથે કમોસમી વરસાદી ઝાપટું પડ્યું હતું.
મહેસાણા જિલ્લામાં ઊંઝા, વિસનગર અને વડનગરમાં ૫થી ૬ મીમી જેટલો નોંધપાત્ર વરસાદ પડ્યો હતો. જ્યારે ૪ વાગ્યા બાદ વિજાપુર સહિત કેટલાક તાલુકાઓમાં વરસાદ પડ્યો હતો. જેમાં સૌથી વધુ વિજાપુર તાલુકામાં ૨૭ મીમી એટલે કે એક ઈંચથી વધુ વરસાદ પડતાં જળબંબાકારની સ્થિતિ વચ્ચે ખેડૂતોની હાલત કફોડી બની હતી. હિંમતનગરમાં ૧૨ મીમી સહિત વિજયનગર, ઇડર, તલોદ, ખેડબ્રહ્મા, પ્રાંતિજ અને પોશીના પંથકમાં વરસાદ વરસ્યો હતો. બાયડ તાલુકામાં ભારે વરસાદની સાથે કરા પણ પડ્યા હતા. આ ઉપરાંત મોડાસા શહેરમાં ધોધમાર વરસાદી ઝાપટું પડતાં રોડ રસ્તા પર પાણી ફરી વળ્યાં હતા.
નડિયાદમાં ભારે પવન ફૂંકાવાને કારણે વાહન ચાલકોને ભારે હાલાકીનો સામનો કરવો પડ્યો હતોમાતર તાલુકાના ભલાડા, સીંજીવાડા અને પરીએજ સહિતના ગામડાઓમાં ગાજવીજ સાથે કમોસમી વરસાદના ઝાપટા પડ્યા હતા. આ ઉપરાંત કઠલાલ અને કપડવંજ વિસ્તારમાં પણ પવન સાથે વરસાદની શરૂઆત થતાં વાતાવરણમાં ઠંડક પ્રસરી હતી.ખેતરોમાં રહેલા તમાકુ જેવા તૈયાર પાકોને આ વરસાદ અને ફૂંકાયેલા ભારે પવનને કારણે નુકસાન થવાની આશંકા ખેડૂતો વ્યક્ત કરી રહ્યા છે. કપડવંજ તાલુકાના ગ્રામ્ય વિસ્તારો સૌથી વધુ પ્રભાવિત થયા હતા. કપડવંજની આસપાસના મોટી ઝેર, નિરમાલી સહિતના ગામડાઓમાં ભારે પવન સાથે કમોસમી વરસાદ અને કરા પડ્યા હતા.
વડોદરા જિલ્લાના ડભોઇ પંથકમાં મેઘરાજાની ધમાકેદાર એન્ટ્રી પડી હતી. પવનના સુસવાટા સાથે વરસાદ શરૂ થઇ જતાં ખેડૂતો ચિંતાતૂર થઇ ગયા હતા. ડભોઇમાં વરસાદના કારણે જનજીવન પ્રભાવિત થયું હતું. મુખ્ય વિસ્તારોમાં પાણી ભરાયા હતા. ભરૂચ જિલ્લાના જંબુસર પંથકમાં દરિયાકાંઠાના ગામો કાવી, કંબોઈ, નહાર, દહેગામ તેમજ આજુબાજુના દરિયા કાંઠા ના ગામોમાં કમોસમી વરસાદ નોંધાયો હતો. દાહોદ જિલ્લામાં પણ ભારે પવન સાથે કમોસમી ધોધમાર વરસાદ વરસ્યો હતો તો જિલ્લાના સુખસર, ફતેપુરા, ગરબાડા, લીમખેડા સહિત અન્ય તાલુકાઓમાં ભારે પવન સાથે વાવાઝોડું ફુંકાયું હતું. ભાવનગર સુભાષનગર, મહિલા કોલેજ, ઘોઘા સર્કલ, ઘોઘા જકાતનાકા અને કાળાનાળા સહિતના વિસ્તારોમાં વરસાદી માહોલ જોવા મળ્યો હતો. હાલમાં જ કેરીનો પાક તૈયાર થયો છે, ત્યારે આ કમોસમી વરસાદ અને પવનને કારણે પાકને મોટાપાયે નુકસાન થવાની ભીતિ સેવાઈ રહી છે.
