- દેશમાં સતત ઠંડીના કારણે જનજીવન અસ્તવ્યસ્ત
- ઉત્તર ભારતમાં ગાઢ ધુમ્મસ અને ઠંડીમાં થયો વધારો
- 10 ડિસેમ્બરની આસપાસ લોકોને ઠંડીથી થોડી રાહત મળી શકે
દેશના ઘણા વિસ્તારોમાં સતત વધી રહેલી ઠંડીએ જનજીવન અસ્તવ્યસ્ત કરી દીધું છે. કાતિલ ઠંડી સાથે કમોસમી વરસાદને કારણે લોકો મુશ્કેલીમાં મુકાયા છે. આવી સ્થિતિમાં ભારતીય હવામાન વિભાગ (IMD) આગાહી કરી છે. કમોસમી વરસાદ સાથે કરા પડશે જેને લઇ લોકોની ચિંતામાં વધારો થયો છે. IMDએ ઘણી જગ્યાએ વરસાદ અને કરા પડવાના અપડેટ આપ્યા છે. જો કે થોડા સમય બાદ લોકોને થોડી રાહત મળી શકે છે.
ઉત્તર ભારતમાં ગાઢ ધુમ્મસ અને ઠંડીની સ્થિતિ શું છે?
હવામાન વિભાગના જણાવ્યા અનુસાર ઉત્તર ભારતમાં ગાઢ ધુમ્મસ અને તીવ્ર ઠંડીની સ્થિતિ રહેશે. જે આગામી 24 કલાક સુધી ચાલુ રહેશે. જો કે આ પછી તે ધીમે ધીમે ઘટવા લાગશે. મતલબ કે 10 ડિસેમ્બરની આસપાસ લોકોને ઠંડીથી થોડી રાહત મળી શકે છે. ઉત્તર ભારતમાં જમ્મુ અને કાશ્મીર, ઉત્તરાખંડ, હિમાચલ પ્રદેશ, પંજાબ, હરિયાણા, રાજસ્થાન, દિલ્હી અને ઉત્તર પ્રદેશ જેવા રાજ્યોનો સમાવેશ થાય છે. મતલબ કે ઉત્તર ભારતના લોકોને હજુ થોડા સમય માટે ઠંડીનો સામનો કરવો પડી શકે છે.
પૂર્વ રાજસ્થાનમાં વરસાદ અને કરાનું એલર્ટ
આ સાથે હવામાન વિભાગે પૂર્વ રાજસ્થાનમાં વરસાદ અને કરા સાથે વાવાઝોડાનું એલર્ટ જાહેર કર્યું છે. IMD અનુસાર, 8 અને 9 જાન્યુઆરીએ પૂર્વ રાજસ્થાનમાં વીજળી, ભારે પવન સાથે કરા અને છૂટાછવાયા વાવાઝોડાની શક્યતા છે. IMD એ 9 જાન્યુઆરીએ પશ્ચિમ મધ્ય પ્રદેશ અને 8 જાન્યુઆરીએ તમિલનાડુમાં ભારે વરસાદની આગાહી કરી છે. આ સાથે IMDએ કહ્યું છે કે 8 અને 9 જાન્યુઆરીએ ઉપ-હિમાલયન પશ્ચિમ બંગાળ અને સિક્કિમના કેટલાક વિસ્તારોમાં રાત્રિ અને સવારના સમયે ગાઢથી ખૂબ ગાઢ ધુમ્મસની સંભાવના છે. આ સમયગાળા દરમિયાન દૃશ્યતા 50 મીટરથી ઓછી રહી શકે છે.
હવામાન વિભાગના જણાવ્યા અનુસાર, 8 જાન્યુઆરીએ રાત્રિ દરમિયાન પંજાબના કેટલાક વિસ્તારોમાં ગાઢથી ખૂબ ગાઢ ધુમ્મસની સંભાવના છે. આ સમયગાળા દરમિયાન વિઝિબ્લિટી 50 મીટરથી ઓછી રહી શકે છે. હવામાન વિભાગે પંજાબમાં કડકડતી ઠંડીના દિવસોની આગાહી કરી છે.
લઘુત્તમ તાપમાન 4-8 ડિગ્રી સેલ્સિયસ
IMDએ જણાવ્યું કે સોમવારે સવારે 8:30 વાગ્યા સુધી છેલ્લા 24 કલાક દરમિયાન હરિયાણા, ચંદીગઢ, દિલ્હી, પશ્ચિમ ઉત્તર પ્રદેશ, પંજાબ અને રાજસ્થાનના મોટાભાગના વિસ્તારોમાં લઘુત્તમ તાપમાન 4-8 ડિગ્રી સેલ્સિયસ નોંધાયું હતું. જ્યારે પૂર્વી ઉત્તર પ્રદેશ, ઉત્તર પશ્ચિમ મધ્ય પ્રદેશના વિવિધ ભાગોમાં લઘુત્તમ તાપમાન 9 – 12 ° સે નોંધાયું હતું. હવામાન વિભાગે સોમવારે તમિલનાડુ, પુડુચેરી અને કરાઈકલના અલગ-અલગ સ્થળોએ ભારેથી અતિ ભારે વરસાદની આગાહી કરી છે. IMD અનુસાર, આ વરસાદ 115.6 થી 204.4 mm વચ્ચે હોઈ શકે છે.
