બાબરાના ચમારડી ગામના સબ સેન્ટરનું નબળું કામ તોડી પડાશે
ગાંધીનગર સુધી ફરિયાદ થતા આરોગ્ય મંત્રીનું આદેશ
અગ્ર ગુજરાત, અમરેલી
અમરેલી જિલ્લાના બાબરા તાલુકાના ચમારડી ગામે બની રહેલા નવા આરોગ્ય સબ સેન્ટરના બાંધકામમાં ગંભીર ગેરરીતિ અને નબળી ગુણવત્તા સામે આવતા રાજ્ય સરકારે કડક વલણ અપનાવ્યું છે. આ મામલે રાજ્યના આરોગ્ય મંત્રી પ્રફુલ પાનસુરીયાએ તાત્કાલિક એક્શન લેતા ભ્રષ્ટાચાર અને બેદરકારી સામે લાલઘૂમ થઈ આકરા પગલાં ભર્યા છે.
સ્થાનિક કક્ષાએથી મળેલી ફરિયાદો અને પ્રાથમિક તપાસમાં બાંધકામની ગુણવત્તા અત્યંત ખરાબ હોવાનું સાબિત થતાં નવા બની રહેલા આ આરોગ્ય સબ સેન્ટરના નબળા બાંધકામને ડિમોલેશન કરવાનો નિર્ણય લેવામાં આવ્યો છે. આ સાથે જ ફરજ પ્રત્યે ઘોર બેદરકારી દાખવવા બદલ સંબંધિત એન્જિનિયરને તાત્કાલિક અસરથી કારણ દર્શાવી નોટિસ ફટકારી ખુલાસો માંગવામાં આવ્યો છે. આ અંગે કડક ચેતવણી આપતા આરોગ્ય મંત્રી પ્રફુલ પાનસુરીયાએ જણાવ્યું હતું કે, રાજ્ય સરકાર વિકાસના કાર્યો માટે પૂરેપૂરા પૈસા આપે છે, તેથી કામગીરીમાં કોઈપણ પ્રકારની ગેરરીતિ કે નબળું કામ જરાપણ ચલાવી લેવામાં નહીં આવે. અને ભવિષ્યમાં પણ જો ક્યાંય આવી બેદરકારી જણાશે તો જવાબદારો સામે આનાથી પણ વધુ કડક વહીવટી અને કાનૂની કાર્યવાહી કરવામાં આવશે. ચમારડી ગામના આ સબ સેન્ટરની તમામ સામગ્રીની હવે ટેકનિકલ લેબોરેટરી તપાસ કરાવીને નવેસરથી નિયમ મુજબ મજબૂત બાંધકામ કરવામાં આવશે.
