મોરબીના જેતપરમાં બ્લડ ડોનેટનો રેકોર્ડ સ્થપાયો
જગતાતનું ખૂનદાન : વીજકંપનીના વિરોધમાં ૫૫૫૧ ખેડૂતોનું રકતદાન
૯ દિવસથી ચાલતા આમરણાંત ઉપવાસ : મુખ્યમંત્રી લેખિત પત્ર લખી બોલાવશે તો જ ગાંધીનગર મળવા જશેનું ખેડૂતોનું સ્પષ્ટ એલાન : રકતદાનમાં રાજકોટના રિબડાનો રેકોર્ડ તોડયો
અગ્ર ગુજરાત, મોરબી
ખાનગી કંપનીઓ દ્વારા ખેતરમાં વીજ લાઇન નાખવાના વિરોધમાં મોરબી સહિત સૌરાષ્ટ્રભરમાં ખેડૂતો દ્વારા વિરોધ પ્રદર્શન ચાલી રહ્યા છે. મોરબીમાં રાજયમંત્રી કાંતિભાઇ અમૃતિયાના ગામ જેતપરમાં છેલ્લા નવ દિવસથી આમરણાંચત ઉપવાસ ચાલી રહ્યાં છે. જેમાં દૈનિક વિવિધ કાર્યક્રમો દ્વારા વિરોધ પ્રદર્શન કરવામાં આવી રહ્યું છે. જેમાં બુધવારે રકતદાન કેમ્પ યોજાયો હતો. જેમાં ૫૫૫૧ ખેડૂતો રકતદાન કરી રેકોર્ડ નોંધાવ્યો છે.
મોરબીના જેતપર ગામે ખાનગી વીજ કંપની સામે ચાલી રહેલા ખેડૂત આંદોલન દરમિયાન, બુધવારે એક જ દિવસમાં 5,551 ખેડૂતે રક્તદાન કર્યું હતું. આ રક્તદાન કેમ્પ સવારે 9 વાગ્યાથી રાત્રિના 12 વાગ્યા સુધી ચાલ્યો હતો, જેમાં ખેડૂતોએ કંપની દ્વારા થતા કથિત અન્યાય સામે વિરોધ નોંધાવ્યો હતો. આ સાથે, તેમણે રીબડાનો એક જ દિવસમાં સૌથી વધુ રક્તદાનનો રેકોર્ડ તોડ્યો હતો.
જેતપર ગામે ખાનગી વીજ કંપનીની કામગીરીથી નારાજ થઈને ખેડૂતોએ 18 જૂનથી આમરણાંત ઉપવાસ આંદોલન શરૂ કર્યું છે, જેનો આજે આઠમો દિવસ છે. આ આંદોલનમાં કોઈ રાજકીય આગેવાનો સામેલ નથી. સરકારે ખેડૂતોને મંત્રણા માટે બે-ત્રણ વખત આમંત્રણ આપ્યું છે.
ખેડૂતોએ પોતાની માંગણીઓ લેખિતમાં સરકારને મોકલી આપી છે. ખેડૂત આગેવાનોના જણાવ્યા મુજબ, સરકાર તેમની માંગણીઓ અંગે સ્પષ્ટતા કરે અને મુખ્યમંત્રી તેમને મળવા માટે લેખિત પત્ર આપે તે પછી જ તેઓ ગાંધીનગર ખાતે મુખ્યમંત્રી સાથે બેઠક કરવા જશે.
ગુજરાતમાં એક જ જગ્યાએ એક જ દિવસમાં સૌથી વધુ રક્ત એકત્રિત કરવાનો રીબડાનો રેકોર્ડ (5,419 રક્તદાતા) જેતપર ગામના ખેડૂતોએ તોડ્યો છે. જેતપરમાં એક જ દિવસમાં 5,551 બોટલ રક્ત એકત્રિત થયું છે અને કેમ્પ હજુ પણ ચાલુ હોવાથી આ આંકડો વધવાની શક્યતા છે.
આજે પણ કેમ્પ કાર્યરત
આ રક્તદાન કેમ્પ ખાનગી વીજ કંપનીઓ દ્વારા ખેડૂતોના ખેતરોમાં વીજ પોલ ઊભા કરવાના વિરોધમાં યોજાયો હતો. બુધવારે સવારે 9 વાગ્યાથી રાત્રિના 12 વાગ્યા સુધીમાં કુલ 5,551 બોટલ રક્ત એકત્રિત થયું હતું. બ્લડ બેંકો પાસે જરૂરી સાધનસામગ્રી ખૂટી પડતાં ગુરુવારે પણ ઉપવાસી છાવણી ખાતે રક્તદાન કેમ્પ ચાલુ રાખવામાં આવ્યો છે.
