સચિન તેંડુલકરે ભારતને તેની ઐતિહાસિક જીત પર અનોખી રીતે પાઠવ્યા અભિનંદન

• ભારતીય ટીમે શ્રીલંકાને 302 રનથી હરાવ્યું
  
• સચિન તેંડુલકરે ભારતીય ટીમને અભિનંદન પાઠવ્યા
  
• તેંડુલકરે અનોખા અંદાજમાં ટીમને અભિનંદન પાઠવ્યા
  

ભારતીય ટીમે ગુરુવારે ODI વર્લ્ડ કપમાં શાનદાર જીત નોંધાવી હતી. શ્રીલંકા સામે વાનખેડે સ્ટેડિયમમાં રમાયેલી મેચમાં ભારતીય ટીમે શ્રીલંકાને 302 રનથી હરાવ્યું હતું. આ જીત આ અર્થમાં પણ ખાસ હતી કારણ ભારતીય ટીમે 2011ના વર્લ્ડકપની ફાઇનલમાં શ્રીલંકા સામે આ મેદાન પર જ જીત મેળવી હતી. તેથી સચિન તેંડુલકર માટે પણ આ અવસર ખાસ બની ગયો હતો. તેંડુલકરે અનોખા અંદાજમાં આ રેકોર્ડ જીત પર ભારતીય ટીમને અભિનંદન પાઠવ્યા હતા.

અનોખા અંદાજમાં ટીમને અભિનંદન પાઠવ્યા

તેંડુલકરે ટ્વીટ કરીને લખ્યું- “ખાસ રમતમાં ખાસ જીત! #TeamIndia આજે તેમના શાનદાર પ્રદર્શનથી દરેક વિભાગમાં પ્રભુત્વ ધરાવે છે, જેમ કે તેઓ આ #CWC23 માં કરી રહ્યા છે. વર્લ્ડ કપ મેચમાં વાનખેડે ખાતે શ્રીલંકા સામે ભારતની જીત મને ‘દેજા વુ’ ની અનુભૂતિ કરાવે છે.”વાસ્તવમાં, ‘દેજા વુ’એ એવી અનુભૂતિ છે જેનો તમે પહેલેથી જ અનુભવ કર્યો છે, જો કે સચિન તેંડુલકર માટે મુંબઈનું મેદાન ખૂબ જ ખાસ રહ્યું છે. ગુરુવારે તેમની પ્રતિમાનું અનાવરણ પણ કરવામાં આવ્યું હતું.

મોહમ્મદ શમી અને સિરાજનો જાદુ

ભારતીય ટીમની 302 રને રેકોર્ડ જીતમાં મોહમ્મદ શમી અને મોહમ્મદ સિરાજે બોલિંગમાં કમાલ કરી હતી. 358 રનના ટાર્ગેટનો પીછો કરવા આવેલી શ્રીલંકાની ટીમ શમી-સિરાજની ખતરનાક બોલિંગ સામે માત્ર 55 રનમાં જ પત્તાની જેમ ખરી ગઈ હતી. શમીએ 5 ઓવરમાં 18 રન આપીને 5 વિકેટ લીધી હતી જ્યારે સિરાજે 7 ઓવરમાં 16 રન આપીને 3 વિકેટ ઝડપી હતી. રવિન્દ્ર જાડેજા અને જસપ્રિત બુમરાહને એક-એક વિકેટ મળી હતી. સાતમાંથી સાત મેચ જીત્યા બાદ ભારતીય ટીમે સેમીફાઈનલમાં પ્રવેશ કરી લીધો છે. પોઈન્ટ ટેબલમાં ભારતીય ટીમ 14 પોઈન્ટ સાથે ટોપ પર છે. હવે તેની આગામી મેચ 5 નવેમ્બરે સાઉથ આફ્રિકા સામે છે.