ઝાલાવાડમાં પડેલા અતિ ભારે વરસાદથી પાકને અસર
વઢવાણ તાલુકામાં કપાસ, મગફળી, ડાંગર, સોયાબીન અને વિવિધ શાકભાજીનો પાક લાંબા સમય સુધી પાણીમાં રહેતા સડી ગયો : ખેડૂતોની ચિંતામાં વધારો
અગ્ર ગુજરાત, સુરેન્દ્રનગર
સુરેન્દ્રનગર જિલ્લામાં પડેલા અતિ ભારે વરસાદે ખેડૂતો માટે મોટું સંકટ ઊભું કર્યું છે. ખાસ કરીને વઢવાણ તાલુકાના અનેક ગામોમાં ખેતરો પાણીમાં ગરકાવ થઈ જતાં કપાસ, મગફળી, ડાંગર, સોયાબીન અને શાકભાજી સહિતનો ઊભો પાક સંપૂર્ણપણે નષ્ટ થઈ ગયો છે. પાણીના ધસમસતા પ્રવાહે ફળદ્રુપ જમીનનું પણ ધોવાણ કર્યું હોવાથી ખેડૂતોને બેવડું નુકસાન વેઠવાનો વારો આવ્યો છે.
હજારો રૂપિયાનો ખર્ચ કરીને તૈયાર કરેલો પાક બગડી જતાં હવે ખેડૂતો સરકાર પાસે તાત્કાલિક સર્વે, યોગ્ય વળતર અને પાક વીમાની સહાયની માંગ કરી રહ્યા છે.
સુરેન્દ્રનગર જિલ્લામાં સતત વરસી રહેલા ભારે વરસાદના કારણે વઢવાણ તાલુકા સહિત આસપાસના ગ્રામ્ય વિસ્તારોમાં ખેતરો પાણીમાં ડૂબી ગયા છે. પાણીના નિકાલની યોગ્ય વ્યવસ્થા ન હોવાથી અનેક ખેતરો તળાવ જેવા બની ગયા છે. પરિણામે કપાસ, મગફળી, ડાંગર, સોયાબીન અને વિવિધ શાકભાજીનો ઊભો પાક લાંબા સમય સુધી પાણીમાં રહેતા સડી ગયો છે. કેટલાક વિસ્તારોમાં પાક સંપૂર્ણપણે આડો પડી ગયો છે. ખેડૂતોની મહેનત પર કુદરતનું પાણી ફરી વળ્યું હોવાનું સ્પષ્ટ જોવા મળ્યું હતું.
ભારે વરસાદ સાથે આવેલા પાણીના જોરદાર પ્રવાહે માત્ર પાકને જ નહીં પરંતુ ખેતરોની ફળદ્રુપ જમીનને પણ ભારે નુકસાન પહોંચાડ્યું છે. અનેક ખેતરોમાં ઉપરનો ઉપજાઉ માટીનો પડ ધોવાઈ ગયો છે, જેના કારણે આગામી સિઝનની ખેતી પણ અસરગ્રસ્ત બનવાની શક્યતા છે. કેટલાક ખેડૂતો દ્વારા કાપીને ખેતરમાં અથવા યાર્ડમાં રાખવામાં આવેલ પાક પણ વરસાદી પાણીમાં પલળી જતાં વેચવાલાયક રહ્યો નથી. હજારો રૂપિયાનું રોકાણ કરીને તૈયાર કરેલો પાક બગડી જતા ખેડૂતોની આર્થિક સ્થિતિ વધુ કથળવાની ભીતિ ઉભી થઈ છે.
ભારે નુકસાનનો સામનો કરી રહેલા ખેડૂતો હવે સરકાર સમક્ષ તાત્કાલિક રાહત પેકેજની માંગ કરી રહ્યા છે. ખેડૂતોનું કહેવું છે કે હજુ સુધી પાકના નુકસાનનો સંપૂર્ણ સર્વે કરવામાં આવ્યો નથી. તેઓ માંગ કરી રહ્યા છે કે વહેલી તકે અધિકારીઓ દ્વારા નુકસાનનું મૂલ્યાંકન કરવામાં આવે અને અસરગ્રસ્ત ખેડૂતોને યોગ્ય વળતર ચૂકવવામાં આવે. ઉપરાંત પાક વીમાની રકમ ઝડપથી ચૂકવવામાં આવે તેમજ આર્થિક સહાય જાહેર કરવામાં આવે, જેથી ખેડૂતો ફરીથી ખેતી શરૂ કરી શકે. ખેડૂતોનું માનવું છે કે સમયસર સહાય નહીં મળે તો આગામી સિઝનની ખેતી કરવી પણ મુશ્કેલ બની શકે છે.
