2008ને ભૂલશો નહીં… ભારત સરકાર માટે મોટું સરપ્રાઇઝ
ગુજરાતની જેલો, DGP-કલેક્ટર કચેરી અને મંદિરને બોમ્બથી ઉડાવવાની ધમકી
ખાલિસ્તાનના નામે DGP કચેરીના સત્તાવાર ઈ-મેઈલ પર ધમકી મળતાં સમગ્ર ગુજરાતમાં ખળભળાટ : રાજકોટ, અમદાવાદની સાબરમતી અને વડોદરા સહિત રાજ્યની જેલોમાં સઘન તપાસ, બોમ્બ ડિસ્પોઝલ અને ડોગ સ્ક્વોડ તૈનાત
અગ્ર ગુજરાત, રાજકોટ
ગુજરાતમાં ફરી એક વખત બોમ્બથી ઉડાવી દેવાની ધમકીભર્યા ઈ-મેઈલથી સુરક્ષા એજન્સીઓમાં દોડધામ મચી ગઈ છે. આ વખતે અજાણ્યા શખસે ખાલિસ્તાનના નામે ગુજરાત પોલીસ મહાનિર્દેશક (DGP) કચેરીના સત્તાવાર ઈ-મેઈલ પર ધમકી મોકલી છે. જેમાં ‘2008ને ભૂલશો નહીં, ભારત સરકાર માટે મોટું સરપ્રાઇઝ’ તેવો ઉલ્લેખ કરી ગાંધીનગર સ્થિત DGP કચેરી, કલેક્ટર કચેરી, એક મંદિર તેમજ ગુજરાતભરની જેલોને બોમ્બથી ઉડાવી દેવાની ચીમકી આપવામાં આવી છે. ઈ-મેઈલમાં પાકિસ્તાન જિંદાબાદ, ખાલિસ્તાન જિંદાબાદ અને અલ્લાહુ અકબર જેવા ઉશ્કેરણીજનક નારા પણ લખવામાં આવ્યા હોવાનું જાણવા મળ્યું છે.
ધમકીભર્યો ઈ-મેઈલ મળતાં જ રાજ્યનું પોલીસ તંત્ર અને જેલ વહીવટી તંત્ર સતર્ક થઈ ગયું છે. રાજકોટ સબ જેલ, અમદાવાદની સાબરમતી સેન્ટ્રલ જેલ, વડોદરા સેન્ટ્રલ જેલ સહિત રાજ્યની અન્ય જેલોમાં સુરક્ષા વ્યવસ્થા સઘન બનાવી તપાસ શરૂ કરવામાં આવી છે. બોમ્બ ડિટેક્શન એન્ડ ડિસ્પોઝલ સ્ક્વોડ (BDDS), ડોગ સ્ક્વોડ અને સ્થાનિક પોલીસની ટીમો દ્વારા જેલ પરિસરમાં તપાસ હાથ ધરવામાં આવી રહી છે. વડોદરામાં રાવપુરા પોલીસની ટીમ સેન્ટ્રલ જેલ ખાતે પહોંચી તપાસમાં જોડાઈ હતી, જ્યારે રાજકોટની જેલને પણ ધમકી મળતાં સ્થાનિક પોલીસ અને જેલ સત્તાવાળાઓ સતર્ક બન્યા છે. આ ધમકી માત્ર જેલ પૂરતી મર્યાદિત નથી. ઈ-મેઈલમાં સરકારી કચેરીઓ અને ધાર્મિક સ્થળને પણ નિશાન બનાવવાની વાત કરવામાં આવી હોવાથી કલેક્ટર કચેરી, DGP કચેરી અને મહત્વના સ્થળોએ સુરક્ષા ચકાસણી શરૂ કરવામાં આવી છે. કલેક્ટર કચેરી ખાતે સુરક્ષા તપાસ પૂર્ણ કરવામાં આવી હોવાની માહિતી પણ સામે આવી છે.
ધમકીભર્યા ઈ-મેઈલમાં ખાસ કરીને ‘2008ને ભૂલશો નહીં’ તેવા શબ્દોનો ઉપયોગ કરવામાં આવ્યો છે. વર્ષ 2008માં અમદાવાદમાં થયેલા શ્રેણીબદ્ધ બોમ્બ વિસ્ફોટોની યાદ અપાવતા આ શબ્દોને કારણે સુરક્ષા એજન્સીઓએ ધમકીને ગંભીરતાથી લીધી છે. જોકે, ઈ-મેઈલ મોકલનાર કોણ છે, તેનો હેતુ શું છે અને 2008ના ઉલ્લેખ પાછળ કોઈ ચોક્કસ ષડયંત્ર છે કે માત્ર ભય ફેલાવવાનો પ્રયાસ છે તે અંગે તપાસ બાદ જ સ્પષ્ટતા થશે.
ઈ-મેઈલમાં ખાલિસ્તાનના નામનો ઉપયોગ કરવામાં આવ્યો છે, પરંતુ માત્ર નામના આધારે કોઈ સંગઠન કે વ્યક્તિની સંડોવણી માની શકાય નહીં. સાયબર ક્રાઇમ અને ટેકનિકલ તપાસ દ્વારા ઈ-મેઈલ મોકલનારનું લોકેશન, આઈપી એડ્રેસ અને ડિજિટલ ફૂટપ્રિન્ટ શોધવાની દિશામાં તપાસ મહત્ત્વપૂર્ણ બની રહેશે.
ઉલ્લેખનીય છે કે, અમદાવાદમાં છેલ્લા કેટલાક દિવસોથી બોમ્બથી ઉડાવી દેવાની ધમકીભર્યા ઈ-મેઈલ મળવાનો સિલસિલો જોવા મળી રહ્યો છે. ગત 27 ઓક્ટોબરના રોજ અમદાવાદની નારાયણ ગુરુ સ્કૂલ, પોદાર ઇન્ટરનેશનલ સ્કૂલ, વિદ્યાભારતી સ્કૂલ અને સી.એન. વિદ્યાલય સહિત અનેક શૈક્ષણિક સંસ્થાઓને ધમકી મળી હતી. આ ઉપરાંત અમદાવાદના મેયરની કચેરી અને નરેન્દ્ર મોદી સ્ટેડિયમને પણ નિશાન બનાવવાની ચીમકી આપવામાં આવી હતી.
આ ધમકીભર્યા ઈ-મેઈલમાં 21 નવેમ્બરના રોજ યોજાનારા પંજાબી ગાયક દિલજીત દોસાંજના કોન્સર્ટ દરમિયાન બોમ્બ વિસ્ફોટ કરવાની ચેતવણી પણ આપવામાં આવી હતી. એટલું જ નહીં, મુંબઈમાં અમિતાભ બચ્ચન અને અમદાવાદમાં દિલજીત દોસાંજને બોમ્બ હુમલામાં મારી નાખવાની ધમકીનો પણ ઉલ્લેખ કરાયો હતો. તે વખતે પોલીસ, બોમ્બ સ્ક્વોડ અને ડોગ સ્ક્વોડ દ્વારા તપાસ કરવામાં આવી હતી અને શંકાસ્પદ વસ્તુ મળી ન આવતાં ધમકીઓ અફવા સાબિત થઈ હતી.
અગાઉ અમદાવાદની સ્કૂલો, કોર્ટ અને સરકારી કચેરીઓને મળેલા ધમકીભર્યા ઈ-મેઈલની તપાસમાં સાયબર એજન્સીઓએ પાકિસ્તાન અને બાંગ્લાદેશ સુધીની કડીઓ હોવાની પ્રાથમિક વિગતો મેળવી હતી. ઈ-મેઈલ એકાઉન્ટના ટેકનિકલ વિશ્લેષણમાં વિદેશી લોકેશન પરથી તેનો ઉપયોગ થયો હોવાની શંકા વ્યક્ત કરવામાં આવી હતી. આ અગાઉના કેસોની તપાસમાં હેક કરાયેલા ઈ-મેઈલ એકાઉન્ટનો ઉપયોગ કરીને ધમકીઓ મોકલવાના નેટવર્કની પણ વિગતો સામે આવી હતી. રાજ્યભરમાં જેલોની સુરક્ષા વધારી દેવામાં આવી છે ત્યારે હવે તપાસ એજન્સીઓ સામે સૌથી મોટો પડકાર ધમકી આપનાર અજાણ્યા શખસ સુધી પહોંચવાનો છે. ધમકી માત્ર અફવા છે કે તેની પાછળ કોઈ ગંભીર ષડયંત્ર છુપાયેલું છે તે તપાસ પૂર્ણ થયા બાદ જ બહાર આવશે.
