DLC અભિયાન 5.0: રાજકોટ રેલવે ડિવિઝન દ્વારા અત્યાર સુધીમાં 422 ડિજિટલ લાઇફ સર્ટિફિકેટ જારી
એક જ દિવસમાં 43 પ્રમાણપત્રો તૈયાર કરાયા; રેલવે હોસ્પિટલમાં દાખલ વૃદ્ધ અને અસ્વસ્થ પેન્શનરોના બિછાના સુધી પહોંચીને પણ અપાઈ સેવા
અગ્ર ગુજરાત, રાજકોટ
પશ્ચિમ રેલવેના રાજકોટ ડિવિઝન દ્વારા ‘DLC અભિયાન 5.0’ હેઠળ પેન્શનરો અને ફેમિલી પેન્શનરોની સુવિધા માટે ચાલી રહેલી વિશેષ ઝુંબેશ અંતર્ગત ૧૯ નવેમ્બર, ૨૦૨૬ સુધીમાં કુલ 422 ડિજિટલ લાઇફ સર્ટિફિકેટ (DLC) જારી કરવામાં આવ્યા છે. જેમાંથી 43 પ્રમાણપત્રો આજે આયોજિત વિશેષ શિબિરોમાં તૈયાર કરવામાં આવ્યા હતા.
આ અભિયાનની સૌથી સંવેદનશીલ અને પ્રેરણાદાયક બાબત એ રહી કે રાજકોટ રેલવે હોસ્પિટલમાં સારવાર હેઠળ દાખલ અસ્વસ્થ અને વૃદ્ધ નિવૃત્ત રેલકર્મીઓ સુધી એકાઉન્ટ વિભાગના કર્મચારીઓ રૂબરૂ પહોંચ્યા હતા અને તેમના બિછાના પાસે જ ડિજિટલ લાઇફ સર્ટિફિકેટ તૈયાર કરી આપ્યા હતા. સિનિયર ડિવિઝનલ ફાઇનાન્સ મેનેજર શ્રી પવન કુમાર મીના આ અભિયાનને સફળ બનાવવા માટે સતત પ્રયત્નશીલ રહ્યા છે અને તેમણે જણાવ્યું હતું કે અસ્વસ્થ પેન્શનરોને કોઈ તકલીફ ન પડે તે માટે કર્મચારીઓએ હોસ્પિટલ જઈને પણ આ કામગીરી પૂર્ણ કરી છે.
રાજકોટ ડિવિઝનના સિનિયર ડિવિઝનલ કોમર્શિયલ મેનેજર સુનીલ કુમાર મીના દ્વારા જારી કરાયેલી અખબારી યાદી મુજબ, એકાઉન્ટ વિભાગના કર્મચારીઓ દ્વારા પેન્શનરોને પેન્શન એસોસિએશન (રાજકોટ), પીડબલ્યુઆઈ (PWI) કાર્યાલય (થાન), યુનિયન બેંક ઓફ ઈન્ડિયા, સ્ટેટ બેંક ઓફ ઈન્ડિયા (SBI), હાપા રેલવે સ્ટેશન નજીકના સ્થળે જ સુવિધા મળી રહે તે હેતુથી શિબિરો યોજવામાં આવી હતી,
આ પહેલનો મુખ્ય ઉદ્દેશ્ય વરિષ્ઠ નાગરિકો, પેન્શનરો અને ફેમિલી પેન્શનરોને તેમના નજીકના સ્થળોએ ડિજિટલ લાઇફ સર્ટિફિકેટની સુવિધા આપી બિનજરૂરી દોડધામમાંથી રાહત આપવાનો છે. રેલવે પ્રશાસનની આ કામગીરી પેન્શનરો પ્રત્યેની સંવેદનશીલતા, સેવાભાવના અને ડિજિટલ સુવિધાઓને પ્રોત્સાહન આપવાની પ્રતિબદ્ધતા દર્શાવે છે.
‘DLC અભિયાન 5.0’ હેઠળ વિશેષ શિબિરોનું આ આયોજન ૧ નવેમ્બરથી ૩૦ નવેમ્બર, ૨૦૨૬ સુધી ચાલુ રહેશે, જેથી બાકી રહેતા વધુમાં વધુ પેન્શનરો અને ફેમિલી પેન્શનરો નિર્ધારિત સમયમર્યાદામાં આ સુવિધાનો લાભ લઈ શકે.


