જસદણના જંગવડમાં ખેલાયો લોહિયાળ ખેલ
નશામાં ધૂત પિતરાઈએ ભાઈ-ભાભીને ધોકા મારી પતાવી દીધાં
ગાળો બોલવાની ના પાડતાં અશોક ઉર્ફે સૂડો બેકાબૂ બન્યો; પરિવારને મારી નાખવાની ધમકી આપી ચાર સભ્યો પર લાકડાના ધોકાથી હુમલો કર્યો, દંપતીનાં મોત, બે મહિલાઓ ઘાયલ
અગ્ર ગુજરાત, રાજકોટ
રાજકોટ જિલ્લામાં દારૂના નશામાં થતા ઝઘડાઓ જીવલેણ બની રહ્યા છે. શાપરમાં દારૂની મહેફિલ દરમિયાન મિત્રએ મિત્રની હત્યા કરી હોવાની ઘટનાના ગણતરીના કલાકોમાં જસદણ તાલુકાના જંગવડ ગામે વધુ એક લોહિયાળ બનાવ સામે આવ્યો છે. અહીં દારૂના નશામાં ધૂત બનેલા એક શખસે પોતાના જ કૌટુંબિક પરિવાર પર લાકડાના બડીકાથી હુમલો કરી ભાઈ અને ભાભીને મોતને ઘાટ ઉતારી દીધાં હતાં. હુમલામાં અન્ય બે મહિલાઓને પણ માથાના ભાગે ઇજાઓ પહોંચતાં સારવાર માટે હોસ્પિટલમાં ખસેડવામાં આવી હતી. એક જ પરિવારના બે સભ્યોનાં મોતથી ગામમાં અરેરાટી ફેલાઈ ગઈ છે.
આ ઘટનામાં આરોપી અશોક ઉર્ફે સૂડો ગોબરભાઈ ધોડકિયા હોવાનું સામે આવ્યું છે. પરિવારજનોના જણાવ્યા મુજબ અશોક અવારનવાર દારૂ પીને આવીને માથાકૂટ કરતો હતો અને પરિવારના સભ્યોને મારી નાખવાની ધમકીઓ પણ આપતો હતો. ગઈકાલે પણ તે દારૂના નશામાં હાથમાં લાકડાનો બડીકો લઈને ગાળો બોલતો હતો. આ દરમિયાન એક મહિલાએ ગાળો બોલવાની ના પાડતાં તે ઉશ્કેરાયો હતો અને જોતજોતામાં હિંસક બની ચાર સભ્યો પર હુમલો કરી દીધો હતો.
બનાવની વિગત એવી છે કે જંગવડ ગામે રહેતાં લાભુબેન જેન્તીભાઈ ધોડકિયા (ઉં.વ.35) ગત બપોરે નજીકમાં રહેતા પોતાના દિયર પ્રકાશભાઈ બચુભાઈ ધોડકિયાના ઘરે ગયાં હતાં. તે વખતે ઘરની આસપાસ કૌટુંબિક જેઠ અશોક ઉર્ફે સૂડો ગોબરભાઈ ધોડકિયા હાથમાં લાકડાનો બડીકો લઈને ઊભો હતો અને મોટેથી ગાળો બોલી રહ્યો હતો. અશોકની આ હરકત જોઈ પ્રકાશભાઈનાં પત્ની વિલાસબેને તેને ગાળો નહીં બોલવા અને શા માટે ગાળાગાળી કરે છે તેવો ઠપકો આપ્યો હતો.
આટલી વાતમાં જ નશામાં ધૂત અશોકનો પિત્તો ગયો હતો. તેણે આજે તમને બધાને મારી નાખવા છે તેવી ધમકી આપીને હાથમાં રહેલા લાકડાના બડીકાથી લાભુબેનના માથામાં જોરદાર ઘા ઝીંકી દીધો હતો. અચાનક થયેલા હુમલાથી લાભુબેન લોહીલુહાણ હાલતમાં ત્યાં જ ઢળી પડ્યાં હતાં. તેમને બચાવવા માટે વિલાસબેન વચ્ચે પડતાં અશોકે તેમના માથામાં પણ બડીકાનો ઘા માર્યો હતો. ઘરમાંથી દેકારો સાંભળીને પ્રકાશભાઈ બહાર દોડી આવ્યા હતા. જોકે, પત્ની અને ભાભીને બચાવવા વચ્ચે પડેલા પ્રકાશભાઈ પર પણ અશોકે દયા રાખી નહોતી. તેણે પ્રકાશભાઈને નિશાન બનાવી લાકડાના બડીકાથી આડેધડ ઘા ઝીંકવાનું શરૂ કરી દીધું હતું. આ દરમિયાન લાભુબેનના ભત્રીજાની દીકરી પુરીબેન પણ હુમલાખોરને અટકાવવા વચ્ચે પડતાં અશોકે તેને પણ ધોકો મારી ઇજા પહોંચાડી હતી.
એક પછી એક ચાર સભ્યો પર હુમલો થતાં પરિવારજનોમાં ચીસાચીસ મચી ગઈ હતી. આસપાસના લોકો અને પરિવારના અન્ય સભ્યો દોડી આવતાં હુમલો કરનાર અશોક ત્યાંથી નાસી છૂટ્યો હતો. લોહીલુહાણ હાલતમાં પડેલા ચારેય ઇજાગ્રસ્તોને તાત્કાલિક સારવાર માટે આટકોટની કેડી પરવાડિયા હોસ્પિટલમાં ખસેડવામાં આવ્યા હતા.
હોસ્પિટલમાં ફરજ પરના તબીબોએ વિલાસબેન (ઉં.વ.32)ને તપાસતાં માથામાં ગંભીર ઇજાઓ અને વધુ પડતું લોહી વહી જવાને કારણે તેમને મૃત જાહેર કર્યાં હતાં. જ્યારે તેમના પતિ પ્રકાશભાઈ બચુભાઈ ધોડકિયા (ઉં.વ.35)ની હાલત ગંભીર હોવાથી વધુ સારવાર માટે રાજકોટ સિવિલ હોસ્પિટલમાં ખસેડવામાં આવ્યા હતા. જોકે, અહીં પણ ટૂંકી સારવાર દરમિયાન પ્રકાશભાઈનું મોત નીપજ્યું હતું. આમ, હુમલામાં પતિ-પત્ની બંનેનાં મોત થતાં સમગ્ર બનાવ ડબલ મર્ડરમાં પલટાયો હતો. બીજી તરફ લાભુબેન અને પુરીબેનને પણ ઇજાઓ પહોંચતાં તેમની સારવાર કરવામાં આવી હતી.
ઘટનાની જાણ થતાં આટકોટ પોલીસ મથકના પીઆઈ આઈ.આર. રાઠોડ સહિતનો પોલીસ સ્ટાફ તાત્કાલિક જંગવડ ગામે દોડી ગયો હતો. પોલીસે બનાવના સ્થળે તપાસ હાથ ધરી હતી તેમજ રાજકોટ સિવિલ હોસ્પિટલ ખાતે પણ જરૂરી કાયદેસરની કાર્યવાહી કરી હતી. આ બનાવમાં મૃતક પ્રકાશભાઈનાં ભાભી લાભુબેન જેન્તીભાઈ ધોડકિયાની ફરિયાદના આધારે આરોપી અશોક ઉર્ફે સૂડો ગોબરભાઈ ધોડકિયા વિરુદ્ધ હત્યાનો ગુનો નોંધી તેને સકંજામાં લઈ આગળની કાર્યવાહી હાથ ધરી છે.
પરિવારજનોના જણાવ્યા અનુસાર અશોકને દારૂ પીવાની ટેવ હતી અને નશો કર્યા બાદ તે અવારનવાર પરિવાર સાથે ઝઘડા અને માથાકૂટ કરતો હતો. તેની હરકતોથી કંટાળીને પરિવારના સભ્યો તેનાથી દૂર રહેવા લાગ્યા હતા. તેમ છતાં અશોકની વર્તણૂકમાં સુધારો આવ્યો નહોતો. ગઈકાલે પણ નશાની હાલતમાં આવીને ગાળાગાળી શરૂ કરતાં એક મહિલાએ તેને અટકાવ્યો હતો અને આ સામાન્ય બોલાચાલીએ ભયાનક સ્વરૂપ ધારણ કર્યું હતું. અંતે એક જ પરિવારના બે સભ્યોનાં જીવ ગયા છે અને બે મહિલાઓને ઇજાઓ પહોંચી છે. દારૂના નશામાં થયેલી આ હિંસાએ જંગવડ ગામને હચમચાવી નાખ્યું છે.


