ચલાલામાં આરોપીના રહેણાંક મકાનમાંથી ગેરકાયદે વીજ જોડાણ ઝડપાયું
પોલીસ અને પીજીવીસીએલની સંયુક્ત કાર્યવાહી: ₹1.50 લાખનો દંડ ફટકાર્યો
અગ્ર ગુજરાત, રાજુલા
અમરેલી જિલ્લા પોલીસ વડા સંજય ખરાતની સૂચના અને માર્ગદર્શન હેઠળ જિલ્લામાં અસામાજિક તત્વો તથા ગંભીર ગુનાના આરોપીઓ વિરુદ્ધ કડક કાર્યવાહી હાથ ધરવામાં આવી રહી છે. જે અંતર્ગત ધારી તાલુકાના ચલાલા પોલીસ અને પીજીવીસીએલ વિભાગની ટીમે સંયુક્ત રીતે ચેકિંગ હાથ ધરી ગેરકાયદે વીજ જોડાણ ઝડપી પાડ્યું છે. મળતી વિગતો મુજબ, ચલાલા પોલીસ સ્ટેશનમાં બી.એન.એસ. ની કલમ ૧૦૯(૧), ૧૧૫(૨), ૧૧૮(૧), ૩(૫), ૩૫૨, ૩૫૧(૩), ૫૪ તથા જી.પી. એક્ટ કલમ ૧૩૫ મુજબ નોંધાયેલા ગુનાના આરોપી બાધુભાઈ ધાનાભાઈ વાળા (રહે. મીઠાપુર – ડુંગરી) ના રહેણાંક મકાન પર ચલાલા પોલીસ અને પીજીવીસીએલની ટીમ દ્વારા સંયુક્ત રીતે વીજ ચેકિંગ હાથ ધરવામાં આવ્યું હતું. આ ચેકિંગ દરમિયાન આરોપીના રહેણાંક મકાનમાંથી ગેરકાયદેસર વીજ જોડાણ મળી આવ્યું હતું. જેને પગલે નિયમોનુસાર કાર્યવાહી કરીને અંદાજે રૂ. ૧,૫૦,૦૦૦ નો દંડ ફટકારવામાં આવ્યો છે. આ સમગ્ર કામગીરી ચલાલા પોલીસ સ્ટેશનના પીઆઇ જે. આર. ભાચકન તથા પોલીસ સ્ટાફ અને પીજીવીસીએલની ટીમ દ્વારા કરવામાં આવેલ છે.


